DONDONG MOḶANTUD 5 - Alkitab Singog In Mongondow Masa In Tanaa

Ḷoḷaki

¹ Akuoi in namangoi in gobáku, batoḷ in dodobku, buḷoiku, sinipunku in taḷong mobondu bo toyokayuku mita; kinaanku in ḻipú in pasukan bo bilukku, ininumku in susu bo tubig in anggurku. Pongaan bo ponginumdon yobayat mita, ponginumdon modapot in moḷoḷangu in totabian.

Bobay mita Dondong Inggopatnea Bobay

² Akuoi in nosiug, táe ginaku in nobangon. Indongogaidon, batoḷ in dodobku nonangkokó kon ḷoḻingkop. Bukataipa in ḷoḻingkop, uḻe, batoḷ in dodobku, paḷomaku, intau inta totok in kinotabiku; uḷuku nobuntad in oḷú, buokku nobuntad in oḷú doḷom.

Ḷoḷaki Bobay

³ Ḷambungku iḷongkutkudon; yo degá ḷutudonkupa bui? Sioḷku dinaritankudon, yo degá buikupa kotoron?

⁴ Modoḷodok totok in ginaku sin batoḷ in dodobku nokadai kon kokadaian in ḷoḻingkop.

⁵ Dá nobangondon in akuoi sin momukat kon ḷoḻingkop tuotan in batoḷ in dodobku. Taḷong mobondu mototuyú nongkon ḻima bo gongguyamúku mita, nomuntad kon kokadaian in ḷoḻingkop.

⁶ Binukatanku in ḷoḻingkop sin tuotan in batoḷ in dodobku, táe nomurowdon in sia bo minayá. Mokotanob totok in akuoi mokidongog kon singognea; sinayakku in sia, táe diá nouḻíku. Kinuukku in tangoinea, táe diá sinumubag in sia.

⁷ Akuoi inangoi in moḷoḷukad doḷom kon kotá; binongkug bo sinongkekeban monia in akuoi, aḷuangku in pinakisa inagow monia.

⁸ Podandidon, ei mongodeaga mita in Yerusalem, aka moyodungkuḷ in batoḷ in dodobku, potaaudon kon inia, kon takitku naa in takitbí in tanob.

Bobay mita

⁹ Yo degá batoḷ in dodobmu noiḻiu kon batoḷ in dodob mita ibanea, ei mongodeaga inta totok in moḷunat? Degá batoḷ in dodobmu noiḻiu kon batoḷ mita in dodob ibanea, modapot in iko nopotabá kon inami modandi?

Bobay

¹⁰ Batoḷ in dodobku motorindog bo moḷunat, noiḻiu kon intau mopuḷú noribu.

¹¹ Uḷunea naonda bo buḷawan, buḷawan taakan, buoknea noḻikog bo norondí, ná korondí in kawag.

¹² Matanea naonda bo paḷoma kon bokaká in tubig, paḷoma inta noinggú in susu, nonguyom kon bingkí in tabang.

¹³ Putonginea naonda bo gobá in toyokayu inta mobondu, kuḻit in bibignea bungang bakung inta nopototuyú in taḷong mobondu taakan.

¹⁴ Ḻimanea moropot, nogisising in buḷawan inta iḷambáan in permata, awaknea naonda bo uwaḷa in gajah inta sinabudan in batu nilam.

¹⁵ Sioḷnea naonda bo oigi mita marmar nobudó, inta inoḻitan in buḷawan taakan. Pongongawaknea ná kogaga in buḷud mita kon Libanon, bo ná kotaingkat in pangkoi in aras.

¹⁶ Totuu mokosanang in pososingognea, bayongan yagi-yagi kon inia mokoangá. Natuata batoḷ in dodob bo yobayatku, ei mongodeaga mita in Yerusalem!