DONDONG MOḶANTUD 4 - Alkitab Singog In Mongondow Masa In Tanaa

Ḷoḷaki

¹ Totuu moḷunat in iko, batoḷ in dodobku, totuu, totuubí kon moḷunat in iko. Matamu noibuni kon koḷubungmu naonda bo paḷoma; buokmu naonda bo paanan in bembé inta mosiḻig kon buḷud mita in Gilead.

² Ingiponmu nobudó naonda bo paanan in domba inta bagu ginonsingan bo ininggúan; moyo-moyogapang naonda bo ki adí mita in domba apang, tobatúmai diábí in nobuḻi.

³ Kuḻit in bibigmu naonda bo pita nopura, bo mogaga in bibigmu. Putongimu naonda bo bungai in delima iḷosi, noibuni kon koḷubungmu.

⁴ Sigogowmu naonda bo ḷangkeang i Daud, inta pinosindog sin potagúan kon ḷoḷutam. Boboḷmu notongkai in kaḻeaw toribu, tungkud in intau mita mongobarani.

⁵ Tetému naonda bo ki adí in rusa doyowa, ki adí in kijang apang inta koyogot in moranut kon bonok kon yua-yuak in bungang mobondu.

⁶ Moibog in akuoi mayá kon buḷud in taḷong mobondu, kon buḷud in kamania, modapot in mogirup in tompot doḷo-doḷom, inta monginggamá kon sindip in doḷom.

⁷ Totuubí moḷunat in iko, batoḷ in dodobku, diábí in bogit kon inimu.

⁸ Koḻigai in kita mosiḻig nongkon Libanon, nonikaanku, koḻigai mosiḻig nongkon Libanon. Posiḻigdon nongkon tudu in Amana, nongkon tudu in Senir bo Hermon, tampat pogogutunan in macan tutul bo singa.

⁹ Iko in mokosanang kon ginaku, batoḷ in dodobku, nonikaanku, pooindoimu in nokoangá kon ginaku, takin permata mogaga kon boboḷmu.

¹⁰ Totuu mopia in tabimu, uḻe, nonikaanku, mopia-piabí nongkon anggur. Ḷanamu totuu mobondu, mopia-pia nongkon bayongan toyokayu.

¹¹ Mopia in tosingogonmu mita, nonikaanku, naonda bo biluk taakan bo susu. Ḷambungmu in ná kobondu in Buḷud Libanon.

¹² Batoḷ in dodobku in gobá inta dininding, gobá dininding, bokaká inta kinunsían.

¹³ Kon tua nobiag in pangkoi mita in delima, nopomungai in bungai mita inta totok in mopira in nanamnea. Bungang pacar bo narwastu,

¹⁴ narwastu, koḷawag, kayu manis bo túan, bo noyagi-yagimai in pangkoi in kamania. Taḷong mobondu bo gaharu, takin noyagi-yagimai in toyokayu inta notompiḻí.

¹⁵ Bokaká kon gobáku nopoḷuai in tubig kobiagan inta moiḻig nongkon Libanon!

Bobay

¹⁶ Pobangondon, ei tompot in utuan, angoidon, ei tompot in toḷatan! Pogirupdon kon gobáku, sinbá bondunea in kobóan. Igumon mako batoḷ in dodobku mamangoi kon gobánea, bo mokaan kon bungainea mita inta mopia in nanamnea.