DONDONG MOḶANTUD 1 - Alkitab Singog In Mongondow Masa In Tanaa

¹ Dondong Moḷantud pinomia i Salomo.

Dondong Imitánea Bobay

² Ayokaidon in akuoi; tabimu in mopia-pia in anggur!

³ Iko in mobondu totok, tangoimu naonda bo ḷana mobondu inta noibutak; tuamai mongodeaga mita moibog kon inimu!

⁴ Mokopoḷamemet in kita, o datuku, diádon in akuoi tumuot in gopotmu. Sin popisí in iko dá moḷunganga totok in gina nami, bo modayow kon totabimu in moiḻiu kon anggur; patusdon in mongodeaga mita moibog kon inimu!

⁵ Umpaka morondí, moḷunatbí in akuoi, ei mongodeaga mita in Yerusalem; morondí ná ḷoḷaigan mita in Kedar, táe mogaga naonda bo toipoi mita in komaḻig i Salomo!

⁶ Dika indoianmai in kuḻitku inta morondí, popisí in akuoi nopokak in mata in singgai. Ki guya-guyangku mita sinumorú kon inakó, bo nopotabá kon inakó mogaid kon gobá in anggur; diádon in wakutuku monompiamai kon awakku.

⁷ Pogumandon, uḻe batoḷ in dodobku, kon onda in pinopokaananmu in domba mita, kon onda in pinoposiuganmu kon i monia aka ḷoḷabungneadon? Umpaka yo akuoi ná don onda bo intau mododondaḷoi kon sigad in paanan domba yobayatmu mita?

Ḷoḷaki

⁸ Umpaka dá diá kotaauanmu in tampatnea, uḻeku inta totok in moḷunat kon sigad in bobay mita? Duduiaidon in ḻiod in paanan domba, bo ḷukadaidon in bembému mita kon diug in ḷoḷaigan in gombala mita.

⁹ Batoḷ in dodobku, iko in naonda bo kabaḷo kobaayan inta nogugut kon kereta i datu in Mesir.

¹⁰ Putongimu totuu moḷunat kon sigad in ḷambá, sigogowmu in moḷunat pinakéan in boboḷ permata.

¹¹ Pogaidan nami kon ḷambá buḷawan in iko, manik-manik doman mita nongkon saḷaka.

Bobay

¹² Kon dodai in ki datuku kon tosiugannea, bo mobondu in ḷana narwastuku.

¹³ Batoḷ in dodobku naonda bo taḷong mobondu in bónea, kon dodai in inumuḻid kon dodobku.

¹⁴ Batoḷ in dodobku naonda bo bungang totabian totanga kon gobá mita in anggur En-Gedi.

Ḷoḷaki

¹⁵ Iko in moḷunat totok, batoḷ in dodobku, totuu moḷunat in iko! Matamu naonda bo paḷoma.

Bobay

¹⁶ Totuu mogaga in iko, uḻeku totuu kon mogagabí in iko! Posiugan naton kon tudu in bonok moḷunow.

¹⁷ Pangkoi in aras in mobaḻí oigi in baḷoi naton, bo pangkoi in ḷokuyú in pinogaid kon ḷuntungnea.