DATU MITA IMITÁNEA 20 - Alkitab Singog In Mongondow Masa In Tanaa

Noparang takin Siria

¹ Kon singgai tobatú ki Benhadad, datu in Siria, nosipun kon bayongan in tontaranea, bo noyotakin in 32 in datu mita ibanea takin kereta in parang, bo kabaḷo monia, nongopung bo nonubu in sia kon kotá in Samaria.

² Bo nopotabá in sia kon intau minayá kon i Ahab, datu in Israel, kon kotá tatua takin koyow tanaa,

³ “Ki Datu Benhadad in monuntut sinbá mobogoi in iko kon inia in buḷawan, saḷaka, buḷoimu mita, bo adímu mita inta mongoropot.”

⁴ Ki Ahab in notubag, “Pogumandon kon i tuang datu Benhadad kon moibog in akuoi. Motaaubí in baḻíonnea kapunyaannea in akuoi bo bayongan in kapunyaanku.”

⁵ Onda intua totabá mita tatua namangoi bui kon i Ahab sin mopotaau in tuntutan i Benhadad ibanea. Nanaa in tuntutan tatua, “Tungkuḷ intua datu nami in monuntut sinbá iko in moposarakan kon inia in buḷawan bo saḷaka takin ki buḷoimu mita bo ki adímu mita.

⁶ Táe tanaa in nopotabádon mangoi in sia in porwira mita sin motayak poḷat momoguyaat kon komaḻigmu bo baḷoi mita in pogawaimu, bo mogamá kon bayongan inta inanggap monia koboḻi. Ikoḷom mosia in mamangoi ná oras tanaa.”

⁷ Dá ki Datu Ahab in nogoiní kon bayongan itoi in Israel bo noguman, “Indoiaidon monimu tontaní kon intau tanaa in mokoboditobí kon inaton. Monuntut in sia sinbá akuoi in mobogoidon kon i buḷoi bo ki adíku mita bo buḷawan takin saḷakaku, bo akuoi in diábí nondoí kon onu inta sinuntutnea tatua.”

⁸ Itoi mita bo rayat in noguman, “Donaaidon pandungonmai in sia, Tuang datu! Dika dumudui kon ibognea.”

⁹ Tuamai in ki Ahab notubag kon totabá mita i Benhadad tatua nanaa, “Potaaudon kon i Tuang, datumu tatua kon moibog in akuoi kon onu inta pinoigumnea inta muna, táe aka inta pinoigumnea nogindua tanaa in diábí motaau tarimaanku.” Dá minayádon in totabá mita tatua, onda intua bui namangoi kon i Ahab bo noguman,

¹⁰ “Ki datu nami in mopotabádon mangoi in tontara inta mobayong totok sin morimumud kon kotámu, modapot in ḷobud kinogoguyaatan in kotámu tatua koakutan monia modait tongábí momaké in ḻima monia. Sia in nongibot sinbá dewa mita mohukum, nodapot doman in moḻimod kon inia, aka diá in sia momia kon tua!”

¹¹ Ki Datu Ahab in notubag, “Pogumandon kon i Datu Benhadad: Tontara inta totu-totuu tontara, bainbí mopaḷut mako moparang bo mopia in ginanea, deemanbí kon tungkuḷ in diápa moparang.”

¹² Tubag i Ahab tatua pinotaau kon i Benhadad kon dodai in sia noyotakin in datu mita ibanea inta nobaḻí yobayatnea kon dodai in mosia yogot in nonginumai kon bonu in pinononḷoḷaigan monia. Nokodongogmai kon natua ki Benhadad in nomarenta kon bayongan in porwiranea mita kon mosadiadon monubu kon kotá in Samaria. Dá nosadiadon in mosia.

¹³ Kon dodai intua, nabi tobatú minayá kon i Datu Ahab bo noguman, “Ki Tuhan in noguman: ‘Inontongmu degá in tontara inta mobayong tatua? Popountung-Kubí in iko kon i monia in singgai naa. Kotaauanmu bidon kon Akuoi in ki Tuhan.’ ”

¹⁴ “Ki ine in musti monubu muna?” Ki Ahab in noḻibó. Nabi tatua in notubag, “Tontara mita inta baguneapa, totakin in bupati mita. Natua in guman i Tuhan.” “Bo ki ine in musti modia mayá monubu?” datu tatua in bui noḻibó. “Ki tuang datu tontaní,” tubag i nabi tatua.

¹⁵ Dá ki datu in nopotabá domandon in tontara mita inta nongobagupa totakin in bupati mita. Kobayong monia tua in 232 in tontara. Onda intua inaidannea doman inta ná inaidan in tontara in Israel. Kobayong monia komintan in 7.000 intau.

¹⁶ Pinonubuan in pinangkoi kon dodai in singgai kon tungkuḷ in ki Benhadad bo datu toḷu nopuḷú bo doyowa inta noyopopognea tatua koyogot in nonginum nodapot in nongoḷoḷangudon kon pinononḷoḷaigan monia.

¹⁷ Inta minayá muna in tontara mita inta nongobagupa tatua. Intau mita inta pinotabá i Benhadad motarap kon musung, in nopotaau kon i Benhadad kon tontara topaanan in niondon nopoangoi kon i monia nongkon Samaria.

¹⁸ Ki Benhadad in nomarenta sinbá tontara in musung tatua domokon kobia-biag, diá bidon pandungonmai mongo mamangoi in mosia moparang andeka mamangoi moyodame.

¹⁹ Tontara mita inta mongobagupa mita tatua pinotabádon i Datu Ahab pinangkoi kon kotá in Samaria, bo dinuduian in tontara in Israel.

²⁰ Mosia kon batúannea in noḻimod kon musung inta sinayowan monia. Intau mita in Siria noḷagui, inaḷowan in intau in Israel. Táe nokoḷagui in ki Benhadad. Noḷagui in sia sinumakoi kon kabaḷo bo sinakinan in tongonumai in tontara inta tumotakoi kon kabaḷo.

²¹ Ki Datu Ahab in sinumakin doman noparang bo norimumud kon kereta mita in parang bo noḻimod kon kabaḷonea mita. Kon singgai tatua intau in Siria sinaḷow totok.

²² Onda intua nabi tatua in namangoi kon i Ahab bo noguman, “Tanaa, maníka in ki tuang in mobui bo dugangan kon ropot bo poḷat monompia bui kon tomayá, sin ki datu in Siria in buibí mamangoi monubu kon sempo in pononubú moiduduimai.”

Pinonubuan nogindua in tontara in Siria

²³ Porwira mita i Datu Benhadad in noguman kon i Benhadad, “Ilah mita inta sinumba in bangusa Israel ain nongawasa kon buḷud, tuamai in kita sinaḷow in bangusa tatua. Táe taḷowonbí naton in mosia aka kita in moparang kon ḷopá.

²⁴ Maníka in tanaa ki Tuang datu in momaḷuidon kon datu inta toḷu nopuḷú bodoyowá tatua takin porwira mita i Tuang datu tontaní.

²⁵ Onda intua ki Tuang datu in mopotabádon in tontara inta mobarong ná kobarong in tontara i Tuang datu inta sinaḷow tatua, takin doman kabaḷo bo kereta in parang ná doman koḻipod in kobayongnea. Tubuon naton in bangusa Israel tatua kon ḷopá, bo tanaa in notantú bidon kon mountungbí in kita.” Ki Datu Benhadad in noibog, bo dinumudui kon tonggina in porwira mita tatua.

²⁶ Kon sempo in pononubú noiduduimai nopotabádon in sia in tontaranea bo nopobayá ná kotá in Apek sin monubu kon intau in Israel.

²⁷ Intau in Israel in nobogoidon in pakakat in parangnea kon tontaranea bo nopotabá kon i monia. Bo tontara in Israel tatua in minayá noparang sinilai kon doyowa nopaanan bo nomia kon ḷoḷaigan noyogintayowan in intau mita in Siria tatua. Aka potongkaionmai in tontara in Siria inta mobarong totok tatua nodapot in nopuḻing in ḷopá, yo tontara in Israel tua in tongádon naonda bo doyowa nopaanan in bembé.

²⁸ Bo namangoidon in nabi tobatú kon i Datu Ahab bo noguman, “Naa in pinoguman i Tuhan: ‘Popisí in intau mita in Siria tatua norai kon Akuoi in tongábí nongawasa kon buḷud bo diábí in kon ḷopá, dá popountung-Kubí in moiko nongkon tontara monia inta diádon poḻiuan in kobayongnea tua. Iko bo rayatmu in monotaaubí kon Akuoibí in ki Tuhan.’ ”

²⁹ Pitu nosinggai in koonggotnea in intau in Siria bo intau in Israel tongábí umuran kon bonu in ḷoḷaigan monia, moyogintayowan mako. Kon singgai noginpitu nomangkoidon in mosia mositubuan. Kon bonu in pinoparangan tatua intau in Israel nokoḻimodon kon 100.000 in intau in Siria.

³⁰ Intau mita inta nokoḷagui, noḷagui minayá in kotá in Apek, táe dinding in kotá tatua noumpag bo noibumbun kon 27.000 in intau kon sigad monia. Ki Benhadad in noḷagui doman minayá in kotá tatua bo nogadop kon tobatú baḷoi kon gopot dotá in bonunea.

³¹ Porwiranea mita in namangoi kon inia bo noguman, “Guman in intau, datu mita in Israel in datu mita inta oyúon kototabi. Tuamai, ogoiaipa in wakutu in kami mayá kon tayowon i datu in Israel takin momaké in sosapi nobaḻí tomponuot kon nomanasaḷdon bo tontogot kon sigogow in nobaḻí tomponuot kon sinaḷowdon. Igumon mako diá ḻimodonnea in ki Tuang datu.”

³² Dá nomakédon in mosia in sosapi bo tontogot kon sigogow monia, bo minayá kon tayowon i Datu Ahab poḷat noguman, “Ki Benhadad in ata i Tuang datu. Sia in nopoigum sinbá ki Tuang datu in diá moḻimod kon inia.” Ki Ahab in notubag, “Nobiagpa degá in sia, ki utatku tua?”

³³ Totuu kon porwira mita i Benhadad tatua in mogoḷatdon mako kon tomponuot inta mopia nongkon i Ahab. Dá naonda in ki Ahab noguman “utat”. mosia in baḷúdon notubag, “Totuu, ki Benhadad in ki utat i Tuang datu.” Bo ki Ahab in noguman, “Atodon mangoi in sia kon naa!” Naonda in ki Benhadad noyaput, inanutan i Ahab in sia sinumakoi kon kereta.

³⁴ Bo ki Benhadad in noguman kon inia, “Pobuionkubí kon i Tuang in kotá mita inta ain inagow i amáku nongkon i Tuang. Ki Tuang in motaaubí doman moposindog in pasar kon kotá in Damsyik ná inta pinomia i amáku kon kotá in Samaria.” Tubag i Ahab, “Pinodoyon kon dandi i Tuang tatua, poḷuatonkudon in ki Tuang.” Nopaḷut mako kon tua ki Ahab in nogaid kon dodandian takin i Benhadad bodongka nopomayádon kon inia minayá.

Ki Nabi Tuhan nopotaḷádon kon i Ahab

³⁵ Pinodudui kon parenta i Tuhan, nabi tobatú kon sigad in nabi mita nopotabá kon yobayatnea nokibout kon inia. Táe yobayatnea tatua in doíbí.

³⁶ Bo nabi tatua in noguman, “Popisí in iko in diá motoindudui kon parenta i Tuhan, dá domokon in singa in iko naonda in mobui nongkon naa.” Totuu. Naonda in sia minayá nongkon tua, dinomok in singa tobatú in sia.

³⁷ Onda intua nabi tatua in minayá kon intau ibanea bo noguman, “Boutdon in akuoi!” Dá binoutdon in intau tatua in sia kinoropot totok nodapot in kinekeban.

³⁸ Nopaḷut mako kon tua nabi tatua in nomakut kon pogotnea takin didit topongkó, sinbá diá kotaauan mongo ki ine in sia, bo sinimindog in sia kon bingkí in daḷan mogoḷat kon i datu in Israel moitaḻib.

³⁹ Naonda in ki datu noitaḻib, nabi tatua in nomaḷú kon inia, “Tuang datu Inta Momulia, kon tungkuḷ in akuoi moparangmai kon tampat popoparangan, tontara tobatú in nodia mangoi kon inakó in musung inta kinodomokan. Tontara tatua in noguman, ‘Ḷukadaipa in intau tanaa kopiaan. Aka moḷagui in sia, yo iko in musti ḻimodon ponoḻiu kon inia andeka mobogoi in doit saḷaka 3.000.’

⁴⁰ Táe noiduduimai kon tua naonda in akuoi nobarong in oaidan, intau tatua in nokoḷagui.” Ki datu in notubag, “Iko in nopoḷabúdon in hukumanmu tontaní. Iko in mustibí mobaba tontaní.”

⁴¹ Nabi tatua in nobukádon kon didit inta pinobakutnea kon pogotnea, bo kinotaauandon i datu kon sia tua in nabi tobatú.

⁴² Dá ki Nabi tatua in nogumandon kon i datu, “Naadon inta pinoguman i Tuhan: ‘Intau inta pinoki ḻimod-Ku aindon biniómu mako in minayá. Tuamai iko in mustibí matoi mobaḻí toḻiunea. Tontaramu in morimumudbí popisí in pinomayámudon mako in musung noḷagui.’ ”

⁴³ Ki datu in nobui kon Samaria takin gina diá nosanang bo sinumorú.