DATU MITA IMITÁNEA 17 - Alkitab Singog In Mongondow Masa In Tanaa

Ki Elia bo poninggai noonggot

¹ Oyúon in nabi tangoinea in ki Elia. Sia in nongkon Tisbe, kotá tobatú kon butá in Gilead. Kon singgai tobatú namangoi in sia kon i Datu Ahab bo noguman, “Pinodoyon kon i Tuhan inta nobiag, Allah inta sinumba in intau in Israel bo inta pinogundoianku, akuoi in mopotaau in naa kon i Tuang, kon bonu in doyowa andeka toḷu notaong moiduduimai naa in diábí in oḷú andeka uyan tongopiḻikmai, koḻikudbí in aka pogumankudon.”

² Nopaḷut mako kon tua noguman in ki Tuhan kon i Elia,

³ “Taḷaaidon in tampat tanaa, bayá in utuan kon ḷoḷan Ongkag in Yordan bo pogadopdon kon tua kon diug in Tapá in Kerit.

⁴ Iko in mokouḻíbí kon tubig inumon nongkon tapá tatua, bo ḷagapan kawag in potabá-Ku modia kon kaanonmu.”

⁵ Dinumudui in ki Elia kon parenta i Tuhan tatua, bo minayá in tapá in Kerit poḷat nogutun kon tua.

⁶ Nonginum in sia nongkon tubig in tapá tatua, bo nokaan kon roti bo ponoyá inta dinia in ḷagapan kawag muḷoi in doḷo-doḷom bo ḷoḷabungnea.

⁷ Naonda in noḻin onggotdon nongkon tua, noingkag domandon in tapá tatua sin diádon nonguya-nguyan.

Ki Elia bo boba-bobay kon Sarpat

⁸ Onda intua noguman in ki Tuhan kon i Elia,

⁹ “Tanaa musti in iko mayá in kotá in Sarpat, kon diug in Sidon bo mogutun kon tua. Akuoi in nopotabábí in boba-bobay tobatú sinbá ogoiannea in kaanon in iko.”

¹⁰ Dá minayádon in Sarpat in ki Elia. Naonda in nodapotmai kon bonawang in kotá tatua, inontongnea in boba-bobay tobatú mopuyutmai kon kayu pondungú. Bo noguman in ki Elia kon boba-bobay tatua, “Iná, tuḷungaipa pogamáai kon tubig topilik inumonku.”

¹¹ Naonda in boba-bobay tatua minayá sin mogamá kon tubig tatua, ki Elia in noguman doman, “Iná podiaaipa doman in akuoi kon roti topilik.”

¹² Boba-bobay tatua notubag, “Pinodoyon kon i Tuhan inta nobiag, Allah inta sinumba i Amá, akuoi in mongibot kon diábí in roti kon inakó. Kon inakó in dongkadon topong torigu toyoyakup kon bonu in palo, bo ḷana in zaitun topilik kon botoḷ. Akuoi in yogot mosipun kon kayu pondungú tanaa sin podungúan kon bahan tongopilikpa tatua, sinbá akuoi bo ki adíku in mongaanpa. Dongkadon tua in imbuitnea in kaanon nami, bo mopaḷut mako kon tua mogoḷatdon mako in kami kon kopatoian.”

¹³ “Dika moḻia-ḻiaw in gina i Iná!” guman i Elia, “Aidaidon in kaanon i Iná bo in adí i Iná. Táe pounapa pogaidai kon roti mointok nongkon topong bo ḷana tatua, bo diádon mangoi.

¹⁴ Sin ki Tuhan, Allah inta sinumba in intau in Israel, in noguman kon palo tatua in umuranbí doman kon bonu in topong, bo botoḷ tatua in umuranbí doman kon bonu in ḷana modapot kon singgai ki Tuhan mopoonagdon in uyan kon butá.”

¹⁵ Bo minayádon in boba-bobay tatua nogaid kon onu inta pinoguman i Elia. Dá umurandon oyúon in kaanon nayatoḷu muḷoi in singgai.

¹⁶ Bo ná inta pinoguman i Tuhan pinongin i Elia, palo tatua in umuranbí oyúon in topong kon bonunea, bo botoḷ in umuran doman oyúon in ḷana.

¹⁷ Diá noonggot kon tua adí in boba-bobay tatua notakit. Koonggot-koonggot koyoyiga-koyoyiga in takitnea nodapot in minatoi.

¹⁸ Bo boba-bobay tatua in noguman kon i Elia, “Mogogundoi i Allah, nongonu popoaidbí i Amá in tanaa kon inakó? Degá namangoi in ki Amá sinbá kotoropan i Allah in dosaku, noiyaput in matoi in ki adíku?”

¹⁹ Ki Elia in notubag, “Dia mangoi in adí tatua.” Bo ginamá i Elia in adí ḷoḷaki tatua nongkon i inánea, bo dinianea kon gopot kon ḷundukan, kon gopot inta posiuganmai i Elia. Pinosiug i Elia in adí tatua kon tosiugan,

²⁰ bo nosambayang noropot, “Oo Tuhan, Allahku, nongonu sin pinopoangoi-Mubí in bodito tanaa kon boba-bobay tanaa? Sia in nobogoidon in pogutunan kon inakó bo tanaa in iḻimod-Mubí in ki adínea!”

²¹ Nopaḷut mako kon tua kotoḷu sinongkoban i Elia in adí tatua, poḷat doman nosambayang, “OoTuhan, Allahku, biagpa kaasí in adí tanaa!”

²² Inindongogan i Tuhan in sambayang i Elia; adí tatua in nomangkoidon nogina bo buidon nobiag.

²³ Bo noponagdon bui in ki Elia nongkon gopotnea bo nodia kon adí tatua inogoi kon inánea poḷat noguman, “Iná, naa in ki adí i Iná! Buidon nobiag in sia!”

²⁴ Boba-bobay tatua in notubag, “Tanaa in kinotaauankudon kon ki Amá in mogogundoibí i Allah bo tosingogon i Amá in totuubí nongkon i Tuhan!”