DATU MITA 2 9 - Alkitab Singog In Mongondow Masa In Tanaa

Ki Yehu dinuí nobaḻí datu in Israel

¹ Kon dodai intua ki Nabi Elisa nogoiní kon intau tobatú kon sigad in nabi mita inta sinundúnea bo noguman, “Posadiadon mayá in Ramot kon Gilead, bo diádon in botoḷ inta binonuan in ḷana zaitun tanaa.

² Moiyaputmai in iko kon tua tayakdon in ki Yehu ki adí i Yosapat bo ki ompu i Nimsi. Tongganutaidon in sia mayá in gopot sia-sia mita,

³ bo popobutakdon in ḷana tanaa kon uḷunea, bo singog in naa, ‘Ki Tuhan in noguman kon binaḻí-Neadon in iko datu in Israel.’ Naonda in aidan mako intua, ḷagidon taḷaai in tampat tatua.”

⁴ Nabi inta nobagupa tatua in nobuat bo minayá in Ramot,

⁵ bo noyodungkuḷ i Yehu bo tongguḷu totokan in tontara mita inta koyogot moyosingogmai kon tua. Nabi tatua in noguman, “Tuang, akuoi in nodia kon habar kon i Tuang.” Ki Yehu in notubag, “Kon i ine?” “Tongá kon i Tuang tontaní,” tubag i nabi tatua.

⁶ Onda intua taya dua sinumuot kon bonu in baḷoi, bo nabi inta nobagupa tatua in nopobutak in ḷana zaitun tatua kon uḷu i Yehu bo noguman, “Ki Tuhan Allah in Israel noguman, ‘Akuoi in noduí kon inimu nobaḻí datu kon umat-Ku Israel.

⁷ Iko in moyopú kon motoḷuadí i Ahab ki Tuangmu. Takin natua hukumon-Ku in ki Izebel inta ain noḻimod kon nabi-Ku mita bo mogogundoi-Ku mita ibanea.

⁸ Bayongan in motoḷuadí i Ahab, adí bo ompunea in mustibí matoi. Pomuḷoi in intau ḷoḷaki pinomayá inta noguyangdon andeka inta noguodpa yopúon-Kubí.

⁹ Bayongan in motoḷuadínea in pomiaan-Kubí ná pinogogaid-Ku kon motoḷuadí i Yerobeam bo motoḷuadí i Baesa, datu mita in Israel.

¹⁰ Ki Izebel in diábí ḷobongon. Awaknea in kaanonbí in ungkú kon butá in Yizreel.’ ” Naonda in nosingog mako kon tua, nabi inta nobagupa tatua iḻumuai bo noḷagui.

¹¹ Ki Yehu in buidon minayá kon yobayatnea mita, bo noḻibó in mosia, “Onu in habar? Onu in inangoi in intau nobundai tatua kon inimu?” “Uḻe, kinotaauandon monimu,” tubag i Yehu.

¹² “Diápa, diábí kinotaauan nami!” tubag monia. “Potaaudon mangoi!” Tubag i Yehu, “Sia in nopotaau kon koyow i Tuhan kon akuoi in dinuí i Tuhan nobaḻí datu in Israel.”

¹³ Dá baḷúdon in yobayat mita i Yehu noḷongkut kon jubah mita monia bo nopoompat kon tukad kon tayowon i Yehu. Bo nogirup in mosia kon torompet poḷat nomaḷú, “Ki Yehu in datu!”

Ki Yoram datu in Israel iḻimod

^14-15 Natuata ki Yehu noyopopog noḷawang kon i Datu Yoram inta kon tungkuḷ intua kon Yizreel. Ki Yoram minayá intua sin mokiundam kon kekebnea mita inta nouḻínea kon pinoparangan kon Ramot nonayow kon i Hazael datu in Siria. Ki Yehu in noguman kon yobayatnea mita inta tongguḷu totokan in tontara, “Aka moibog in moiko sinbá akuoi in mobaḻí datu, yo ḷukadai sinbá diá tobatúmai in intau inta ḷumuai nongkon Ramot sin mopotaau kon intau mita kon Yizreel.”

¹⁶ Nopaḷut mako kon tua sinumakoi in sia kon kereta in parangnea bo nobuat minayá in Yizreel. Kon tungkuḷ intua ki Yoram in diápa nopia, bo ki Ahazia datu in Yohuda in kon tua doman nokipodungkuḷ kon inia.

¹⁷ Naonda in moḷoḷukad kon ḷangkeang in kotá in Yizreel nokoontong kon i Yehu bo intaunea mita namangoi, nomaḷú in sia, “Topaanan in intau nopoangoi in naa!” Ki Yoram in notubag, “Potabádon in tontara tobatú tumakoi kon kabaḷo bo mayá monaridi mongo yobayat in mosia tua andeka musung.”

¹⁸ Takin kotako-takoi kon kabaḷo, minayádon in tontara tatua nokipodungkuḷ kon i Yehu bo noguman, “Pinoki ḻibó i datu mongo ki Tuang in namangoi saḷaku yobayat.” “Tua in deemanbí totaaumu!” tubag i Yehu, “Dugangdon mangoi kon inakó.” Inontong in moḷoḷukad kon ḷangkeang tatua kon tontara tatua in noiyaputdon kon paanan tatua, táe diábí nobui mangoi. Dá pinotaauneadon in tua,

¹⁹ bo pinotabádon bui in tontara tobatú ibanea. Tontara tatua in noḻibó doman natua kon i Yehu, bo buipa doman sinubagan i Yehu, “Tua in deemanbí totaaumu! Angoidon dugang mangoi kon inakó!”

²⁰ Moḷoḷukad kon ḷangkeang tatua in nopotaau doman bui kon totabá tatua in noyaput domandon kon paanan tatua táe diábí nobui mangoi. Bo bui in sia noguman, “Degá itoi in paanan tatua in ki Yehu, sin sinumakoi in sia kon kereta in parangnea naonda bo intau nobundai.”

²¹ “Sadia in keretaku,” parenta i Datu Yoram. Kereta in sinadia bo ki Yoram takin ki Datu Ahazia in nobuat minayá nokipodungkuḷ kon i Yehu, kon batúannea sinumakoi kon keretanea-keretanea. Noyodungkuḷ in mosia i Yehu kon gobá inta koḻipod kapunyaan i Nabot.

²² “Degá bo iko nion in namangoi saḷaku yobayat?” iḻibó i Yoram kon i Yehu. Ki Yehu in notubag, “Deemanbí saḷaku yobayat aka nobayongpa in mongonggaing kon naa, bo oyúonpa doman in pososumbaan kon berhala inta pinangkoi i Izebel ki inámu tua?”

²³ “Nion in moḷawangbí, Ahazia!” guman i Yoram sindaḷan nomurow kon keretanea bo noḷagui.

²⁴ Ki Yehu irumopot totok in nomadang kon piotnea bo nopopiot kon ḻikud i Yoram bo noiḷambai kon putúnea. Noumpag in ki Yoram bo minatoi kon keretanea.

^25-26 Bo ki Yehu in noguman kon i Bidkar intaunea, “Degá kinotoropanmupa, kon wakutu in kita sinumakoi kon kabaḷo dinumudui kon i Ahab, ki amá i Yoram? Kon tungkuḷ intua ki Tuhan in noguman kon i Ahab, ‘Kinotaauan-Ku mongo ki ine in noḻimod kon i Nabot bo kon i adínea mita koḷabung, bo akuoi in nodandi kon mohukum kon inimu kon gobá tanaa doman.’ ” “Tuamai,” guman i Yehu noiduduimai kon intaunea tatua, “pogambatdon in awak i Yoram tatua kon gobá i Nabot, sinbá mobaḻídon in hukuman i Allah kon inia.”

Ki Ahazia datu in Yohuda iḻimod

²⁷ Ki Ahazia in nokoontong kon onu inta nobaḻí tatua, dá pinoḷaguinea in keretanea nopobayá in kotá in Bet-Hagan. Ki Yehu in nondudur kon inia bo nomaḷú kon intaunea mita, “Ḻimod domandon in sia!” Piniotan monia in sia bo kinekeban kon daḷan inta nopobayá ná Gur, kon diug in kotá in Yibleam. Táe nokoḷagui in sia nodapot in Megido, bo minatoi in sia kon tua.

²⁸ Pogawainea mita in nogamá kon awaknea bo dinatog monia kon kereta poḷat dinia minayá in Yerusalem bo iḷobong kon bonu in poḷoḷobongan kon datu mita kon kotá i Daud.

²⁹ Ki Ahazia in nobaḻí datu in Yohuda kon dodai in ki Datu Yoram adí i Ahab ain nomarenta kon Israel mopuḷúdon bo mita notaong.

Ki Izebel iḻimod

³⁰ Noiyaputdon in ki Yehu kon Yizreel. Naonda in kinodongogan i Izebel onu inta ain nobaḻí, nonoguḷanoi in sia kon buoknea bo nomaké in cilá, bo iḷumongow monag nongkon jandela in komaḻig.

³¹ Naonda in ki Yehu sinumuot nongin bonawang, ki Izebel in nomaḷú, “Ei Zimri, moḷoḻimod! Mongonu kon naa in iko?”

³² Iḷumangag in ki Yehu kon jandela bo noguman, “Ki ine in moibog kon inakó?” Nokodongogmai kon tua, doyowa toḷu in pogawai in komaḻig iḷumongow monag.

³³ Ki Yehu in noguman kon i monia, “Pogonagdon monag in sia!” Dá pinogonagdon monia in ki Izebel bo iḻigit in kereta in sia dá noitoputdon in dugúnea kon dinding bo kon kabaḷo mita in kereta tatua.

³⁴ Bo sinumuot in ki Yehu kon komaḻig bo nongaan. Onda intua noguman in sia, “Bobay tatua in kinutuk. Umpaka natua táe ḷobongdon in awaknea sin ki adí bobay i datu in sia.”

³⁵ Táe naonda in intau mita minayá nogamá kon awaknea sin ḷobongon, dongkadon ḷungkakánea in nouḻí monia takin tuḷan mita in kokaḷ bo tuḷan mita in sioḷnea.

³⁶ Naonda intua pinotaau kon i Yehu, nogumandon in sia, “Naa in pinotaaudon muna i Tuhan, kon dodai in Sia noguman nanaa pinongin i Elia mogogundoi-Nea: ‘Awak i Izebel in kaanonbí in ungkú mita kon butá in Yizreel,

³⁷ bo kiagat in awak tatua in moitabudon magí mako naonda bo taai in mahaḷuk dá diábí tobatúmai in intau in monotaau kon mayat i ine intua.’ ”