DATU MITA 2 5 - Alkitab Singog In Mongondow Masa In Tanaa

Ki Naaman inundaman

¹ Ki Naaman naa in tongguḷu totokan in tontara in Siria inta kinotabi totok bo ihoromat i datu in Siria. Sin, pinongin i Naaman, ki Tuhan ain nopountung kon tontara in Siria. Ki Naaman naa in tongguḷu totokan in tontara inta motorindog, táe sia in kinotugatan in takit in kuḻit inta mokoondok.

² Kon singgai tobatú intau in Siria nonubu kon butá in Israel. Kon pinonubuan tatua adí bobay tobatú in intau in Israel dinomok bo dinia nobaḻí intau inta dinakop kon parang, onda intua binaḻí bobantung i buḷoi Naaman.

³ Kon singgai tobatú bobantung tatua in noguman kon i tuangnea, “Iná, aka kuma bo ki tuang moibog in mayá mokipodungkuḷ kon nabi tobatú inta nogutun kon Samaria, yo mopiabí i nabi tatua in ki tuang.”

⁴ Naonda in kinodongogan i Naaman in tosingogon tatua, minayá in sia kon i datu bo inoumannea onu inta pinoguman in adí bobay tatua.

⁵ Ki datu in noguman, “Mopia, bayádon kon i datu in Israel. Bain momais kon surat in akuoi kon inia.” Dá nobuatdon in ki Naaman kodia-dia in doit saḷaka 30.000, doit buḷawan 6.000, bo mopuḷú nogapang in ḷambung inta mongopia.

⁶ Nanaa in bonu in surat inta dinianea tatua: “Pongin surat tanaa potaaukudon kon i Tuang, kon tongguḷu totok in tontaraku in ki Naaman, bo poigumon sinbá undamanpa i Tuang in takitnea.”

⁷ Naonda in binaca i datu in Israel in surat tatua, nomera-merak in sia kon ḷambungnea sin nohawatir, poḷat noguman, “Mobodito, nongonubí degá sin ki datu in Siria tatua in nopoigumbí sinbá undamanku in intau tanaa? Deemanbí in akuoi ki Allah inta oyúon in kawasa momiag andeka momatoi kon intau! Notantú bidon kon ki datu in Siria tua in tongábí motayak kon soaḷ kon inakó!”

⁸ Kinodongogan i Nabi Elisa intua, bo nokidia in koyow tanaa kon i datu in Israel, “Nongonu sin mohawatirbí? Potabádon mangoi in intau tanion kon inakó sinbá kotaauanneadon kon naa kon Israel in oyúonbí in nabi tobatú!”

⁹ Tuamai in nobuatdon in ki Naaman takin kereta in kabaḷonea minayá in baḷoi i Elisa, bo sinumogon kon muna in baḷoi.

¹⁰ Ki Elisa in nopotabá kon bobantungnea sin moguman nanaa kon i Naaman, “Bayádon Tuang poinggú bo dumoḷop kopitu kon Ongkag in Yordan, dá totu-totuubí kon mopia in ki Tuang.”

¹¹ Nokodongogmai kon tua, sinumorú in ki Naaman bo noguman, “Kon inakó kamai dá siabí tontaní in ḷumuai bo mokipodungkuḷ kon inakó, bo mosambayang kon i Tuhan, Allahnea, bo moyapu kon awakku inta kinotugatan in takit tatua bo mopiadon in akuoi.

¹² Ongkag in Abana bo Parpar kon Damsyik in mopia-pia kon bayongan in ongkag kon Israel! Motaaubí in akuoi moyinggú kon tua bo mopiadon!”

¹³ Táe bobantungnea mita in dinimiug kon inia bo noguman, “Tuang, akakuma bo ki Tuang in potabá mogaid kon oaidan inta mobogat, yo notantúbí kon aidanbí doman i Tuang. Apa doman tanaa tongábí in sia nokipoinggú kon i Tuang sinbá mopia!”

¹⁴ Tuamai in minayádon in ki Naaman kon Ongkag in Yordan, bo noponag kon tubig tatua poḷat dinumoḷop kopitu ná inta pinoguman i Elisa. Dá nopiadon in ki Naaman. Nosehatdon bui in awaknea naonda bo awak in tayowmobiag.

¹⁵ Bo Nobuidon minayá in sia takin tumotakinnea kon i Elisa. “Tanaa in kinotaauankudon,” guman i Naaman kon i Elisa, “kon sinangkup in dunia tongábí tobatú in Allah, tuata in Allah inta sinumba in intau in Israel. Tuamai, in poigumonku bá moibogpa in ki Tuang motarima kon onu in ogoiku.”

¹⁶ Tubag i Elisa, “Podoyon kon i Tuhan inta nobiag, inta inundoiku, diábí in akuoi motarima kon tombuinag onuka.” Ki Naaman in nomakisa sinbá moibog in ki Elisa kon onu in ogoinea tatua, táe doíbí in ki Elisa.

¹⁷ Bo ki Naaman in noguman, “Aka doípa doman in ki Tuang motarima kon onu inta ogoiku, dá ogoipa in akuoi modia mobui kon butá kinobobayongbí in inta kodiaan in bagal topar. Sin, pinangkoi kon tanaa akuoi in tongá bidon moposumba in kuruban kon i Tuhan, bo diá bidon kon ilah mita ibanea mako.

¹⁸ Aka pakisadon in akuoi mayá moyotakin i datu sin mosambayang kon kuil i Rimon dewa in Siria, yo poigumon mako ampungan i Tuhan in akuoi.”

¹⁹ Guman i Elisa, “Bayádon takin saḷamat.” Bo minayádon in ki Naaman. Diá noonggot naonda in ki Naaman nobuat,

²⁰ ki Gehazi bobantung i Elisa, in norai, “Nongonu sin pinomayábí mako in sia in minayá takin diá noguboḻi? Sabanarnea in mustibí in ki tuangku motarima kon onu in ogoi in intau in Siria tatua! Podoyon kon i Tuhan inta nobiag, mustibí batukonku in sia bo moigum kon onu inta oyúon kon inia!”

²¹ Bo nomatukdon in ki Gehazi kon i Naaman. Naonda in inontong i Naaman kon oyúon in intau namangoi, noponag in sia kon keretanea bo noḻibó, “Nongonu uḻe?”

²² Ki Gehazi in notubag, “Ampung Tuang, akuoi in pinotabá mopotaau kon i Tuang kon bagupabí in nabi inta nobagupa namangoi nongkon Buḷud in Epraim. Ki Tuangku in moigum sinbá ki Tuang in mobogoidon in doit saḷaka 3.000 bo doyowa no par in ḷambung inta mongopia sin ogoi kon nabi doyowa tatua.”

²³ “Ogoikubí uḻe!” guman i Naaman, bo pinakisanea sinbá ki Gehazi in modia kon doit saḷaka 6.000. Binakut i Naaman in doit tatua kon bonu in botutu doyowa, bo nogamá kon doyowa no par in ḷambung inta mongopia. Bayongan intua inogoinea kon bobantungnea doyowa, inta pinotabánea minayá inumuna kon i Gehazi.

²⁴ Naonda in noyaput kon buḷud pinogutunan i Elisa, ki Gehazi in nogamá kon doit bo pakeang tatua nongkon bobantung mita i Naaman, onda intua sinagúnea kon bonu in baḷoi. Bobantung mita tatua in pinotabáneadon nobui,

²⁵ bo sinumuotdon bui in sia kon baḷoi. Ki Elisa in noḻibó, “Nongkon onda in iko?” “Diábí minaya-mayá mako in onda, Tuang” tubagnea.

²⁶ Táe ki Elisa in noguman, “Kon tuabí in ginaku kon dodai in ki Naaman noponag nongkon keretanea sin mokipodungkuḷ kon inimu. Naa in deemanbí wakutunea motarima kon doit sin potaḷui kon gobá in zaitun, gobá in anggur, domba bo sapi takin bobantung mita!

²⁷ Popisí in iko in notarima kon tombuinag tatua, dá tarimaanmu domandon in takit i Naaman. Bo modapotbí in buímu umuran mononoi in mokouḻí kon takit natua!” Naonda in ki Gehazi iḻumuai nongkon tua, nokouḻídon in sia kon takit in kuḻit – kuḻitnea in nobaḻídon nobudó totok.