DATU MITA 2 4 - Alkitab Singog In Mongondow Masa In Tanaa

Ki Elisa notuḷung kon boba-bobay bogá

¹ Kon singgai tobatú ki baḷú in nabi tobatú in minayá kon i Elisa bo noguman, “Amá, ki buḷoiku in minatoidon! Bo kinotaauanbí doman i Amá kon sia tua in intaubí inta motoindudui kon i Allah, táe koboḻi in sia kon intau ibanea. Tanaa in intau tatua in namangoi sin mogamá kon i adíku doyowa bo baḻíonnea ki ata monia, sin poguboḻi kon boḻi i buḷoiku inta ain minatoi tua.”

² “Naonda in pototuḷungku kon i iná?” iḻibó i Elisa. “Onu in oyúon kon baḷoi i iná?” “Diábí koonu bo onu,” tubag in bobay tatua, “koḻikudbí in ḷana in zaitun tobotoḷ nointok.”

³ Ki Elisa in noguman, “Bayádon poḷuan kon botoḷ kobayongon inta diá in bonunea kon topodiugmai i iná.

⁴ Onda intua ki iná bo ki adí mita i iná in tuotdon kon bonu in baḷoi bo ḻingkopai in ḷoḻingkop. Aḻindon in ḷana nongkon botoḷ nointok tatua kon bonu in botoḷ mita tatua, bo potondídon onda inta ain nopuḻing.”

⁵ Dá nobuidon in bobay tatua kon baḷoinea. Naonda in sia bo ki adínea mita sinumuot bo noḻingkop kon ḷoḻingkop in baḷoi, sia in nogamá kon botoḷ nointok inta kon bonu in ḷana zaitun tatua, bo nogaḻin kon ḷana tatua kon botoḷ mita inta inogoi i adínea mita kon inia.

⁶ Naonda in botoḷ mita tatua nopuḻingdon komintan, noigumpa bui in sia kon botoḷ tobatú. “Nodaitdon,” tubag i adínea tobatú. Dá diádon in ḷana tatua iḻumuai.

⁷ Onda intua ki iná tatua buidon minayá kon i Nabi Elisa, bo ki Elisa in noguman, “Potaḷuidon in ḷana mita tatua sin poguboḻi kon bayongan in boḻi i iná, bo ki agatnea in pakéondon i iná kon kobiagan i iná takin adí mita i iná.”

Ki Elisa bo bobay nooyúon kon Sunem

⁸ Kon Sunem oyúon in bobay tobatú inta nooyúon. Kon singgai tobatú kon dodai in ki Elisa minayá in Sunem, bobay tatua in nogoiní kon inia nongaan. Pinangkoi kon tua pomuḷoi in ki Elisa mongandup kon Sunem mongaan in sia kon baḷoi in bobay tatua.

⁹ Onda intua nogumandon in bobay tatua kon i buḷoinea, “Noyakinbí in akuoi kon ki amá inta mokakit mongandup kon naa tua in totu-totuubí kon mogogundoi i Allah.

¹⁰ Maníka bo pogaidan naton kon gopot inta mointok kon ḻimonikan in baḷoi naton, bo posadiaan doman kon tosiugan, meja, kadera, bo togá sinbá motaau in sia mogutun kon naa pomuḷoi in sia mokipodungkuḷ kon inaton.”

¹¹ Kon singgai tobatú ki Elisa namangoi bui in Sunem. Naonda in sia noponik kon gopotnea sin mogogai,

¹² nopotabá in sia kon i Gehazi, bobantungnea, minayá nokioiní in bobay tatua. Naonda in bobay tatua namangoi,

¹³ ki Elisa in noguman kon i Gehazi, “Ḻibódon kon inia mongo naonda in pototuḻíku kon kopopianea kon inaton. Dika-dika ibogonnea akuoi in mayá bo mongonguman kon i datu andeka kon tongguḷu totokan in tontara bo mongonguman kon onu in paraḷunea.” Bobay tatua in notubag, “Akuoi in nogutun kon sigad in ginaḷumku bo diábí in diá in kon inakó naa.”

¹⁴ Dá noḻibódon in ki Elisa kon i Gehazi, “Aka natua, onu in motaau pomiaanku kon inia?” Ki Gehazi in notubag, “Diá in sia kogadí, Amá, bo ki buḷoinea in noguyangdon.”

¹⁵ “Oinídon in bobay tatua,” guman i Elisa. Bobay tatua in namangoi bo sinimindog kon ngara.

¹⁶ Bo ki Elisa in noguman kon inia, “Taong moiduduimai, kon oras ná tanaa, ki iná in mokoyot bidon kon adí mointok ḷoḷaki.” “Amá, dika monguboḷ!” guman in bobay tatua. “Ki Amá naa in mogogundoi i Allah!”

¹⁷ Táe totuubí in onu inta pinoguman i Elisa. Taong noiduduimai, degá ná oras ná tatua bobay tatua nopononggadídon in adí ḷoḷaki tobatú.

¹⁸ Naonda in adí tatua noitoidon, kon singgai tobatú kon sempo in pobatunan kon bungai in boyó, adí tatua in minayá kon i amánea inta kon gobá noyotakin in mororatab mita.

¹⁹ Bo daḻídon in adí tatua nomaḷú kon i amánea, “Adodoia! Monakit totok in uḷuku!” “Diadon in adí tatua kon i inánea,” guman i amánea kon bobantungnea.

²⁰ Adí tatua in dinia pinobayá kon i inánea, bo kinoyotan i inánea in sia. Naonda in ḷoḷabungnea minatoi in adí tatua.

²¹ Dinia i inánea namonik, kon gopot i Elisa, bo pinopouḻidnea kon tosiugan. Onda intua iḻumuai in sia bo iḻingkopannea in ḷoḻingkop,

²² bo minayá nogoiní kon i buḷoinea. Noguman in sia, “Potabádon mangoi in bobantung tobatú mamangoi in naa takin kodia-dia in keledai. Musti ḻimikat in akuoi mayá kon i Nabi Elisa, bo ḷagi mobui mangoi.”

²³ “Nongonu sin mustibí mayá tanaa?” ki buḷoinea in noḻibó. “Singgai naa in deemanbí singgai in Sabat bo deemanbí doman singgai moḷoben Buḷan Mobagu.” “Diábí nongonu,” tubagnea.

²⁴ Naonda in pinopoḷutudneadon in ḷoḻitúan kon keledai tatua, noguman in sia kon bobantungnea, “Untundon in keledai tanaa sinbá ḻimikat totok in sia; dika oḷoian aka diá pogumanku.”

²⁵ Dá nobuatdon in bobay tatua minayá in Buḷud in Karmel kon tampat i Elisa. Nongkon noyayúpa inontongdon i Elisa in bobay tatua nopoangoi. Ki Elisa in noguman kon i Gehazi, “Indoiai, ki iná nongkon Sunem tatua in namangoi!

²⁶ Koḻikatdon bayá pokipodungkuḷai in sia bo ḻibó mongo naonda in kaadaan in motoḷuadínea.” “Mopiabí komintan,” guman in bobay tatua kon i Gehazi.

²⁷ Táe naonda in noiyaput kon tayowon i Elisa, sinumungkud in sia bo ginumakap kon sioḷ i Elisa. Táe dinimiugdon in ki Gehazi sin mopotabá kon inia mayá nongkon tua, táe noguman in ki Elisa, “Biódon mako! Koontongan kon morobonoḷ totok in dodobnea. Táe diábí in pinotaau i Tuhan kon inakó!”

²⁸ Bobay tatua in noguman, “Amá, akuoi in diábí nopoigum in adí kon i Amá. Pinogumanku domandon kon i amá kon donaaidon mobogoi in kamang inta diá in mangaḻenea kon inakó.”

²⁹ Ki Elisa in nobobui kon i Gehazi bo noguman, “Koḻikat! Gamá in tungkudku bo ḷagidon bayá kon baḷoi i iná tanaa. Dikadon mogogai bo momahasa kon i ineka in moyodungkuḷmu kon daḷan. Aka oyúon in intau momahasa kon inimu yo dikadon mokopoonggot in motubag kon tua. Naonda in yaputmu, ukatdon in tungkudku kon awak in adí tatua.”

³⁰ Bobay tatua in noguman, “Amá Elisa! Podoyon kon i Tuhan inta nobiag bo podoyon kon nyawa i Amá, diábí taḷaanku in ki Amá!” Tuamai in nobuatdon in ki Elisa noyotakin i bobay tatua minayá in baḷoinea.

³¹ Ki Gehazi in inumunadon kon i monia sin mopoukat in tungkud i Elisa kon awak in adí tatua, táe diábí in singog andeka tomponuot ibanea kon mobiag in adí tatua. Bo minayádon in ki Gehazi nokipodungkuḷ kon i Elisa bo noguman, “Diábí nobangon in adí tatua.”

³² Naonda in noiyaput kon baḷoi in bobay tatua, ki Elisa tontaní in sinumuot kon gopotnea bo nokoontong kon mayat in adí tatua noiuḻid mako kon tosiugan.

³³ Iḻingkopan i Elisa in ḷoḻingkop bodongka nosambayang kon i Tuhan.

³⁴ Onda intua sinongkobannea in adí tatua bo pinoyodungkuḷnea in bibig, mata bo ḻimanea kon bibig, mata bo ḻima in adí tatua. Popisí in pinomianea in natua dá inumatúdon in awak in adí tatua.

³⁵ Nobangon in ki Elisa bo nodondaḷoi kon bonu in gopot tatua, onda intua bui sinumongkob kon awak in adí tatua. Imbuitnea nobaan kopitu in adí tatua, bo binukáneadon in matanea.

³⁶ Ki Elisa nopotabá kon i Gehazi nogoiní kon i iná in adí tatua, bo naonda in sinumuot in ki iná in adí tatua, nogumandon in ki Elisa kon inia, “Naa iná in ki adímu.”

³⁷ Sinumungkud kon tayowon i Elisa in ki iná tatua bodongka nodia kon i adínea iḻumuai.

Doyowapa doman in mokoherang

³⁸ Kon wakutu tobatú nobaḻídon in bodito kinodaitan in kaanon kon bayongan in butá. Dá nobuidon in ki Elisa kon Gilgal. Naonda in sia motundúmai kon topaanan in nabi mita, nokigamá in sia kon bobantungnea in bejana moḷoben tobatú bo nodungú kon kaanon kon i monia.

³⁹ Tobatú kon sigad in nabi mita tatua in minayá in gobá sin motayak kon kuyat, bo nokouḻí in sia kon naonda bo baḷongká inta tongá kino bia-biagnea. Sinipúnea in bungai in baḷongká ḷoḷog tatua kino bayong, bo dinianea nobui. Diábí kinotaauannea mongo bungai in onu intua, kinoro-koroinea intua bo dinungúnea kon bonu in bejana tatua.

⁴⁰ Naonda in noḷutú, sinila-silaineadon kon nabi mita tatua. Táe bagupa kininsipan monia intua, nomaḷúdon in mosia kon i Elisa, “Amá, rasumbí in naa!” Doídon in mosia nokaan kon tua.

⁴¹ Dá pinoki gamáan i Elisa in topong topiḻik, bo pinopobubudnea kon bonu in bejana tatua. Nopaḷut mako kon tua noguman in sia, “Silaidon bui in onu inta dinungú tatua.” Indoianmai dá diádon mokobodito in kokaanon tatua.

⁴² Kon wakutu ibanea doman, ḷoḷaki tobatú in namangoi nongkon Baal-Salisa. Pinodiaannea mangoi in ki Elisa kon gandum inta bagupa iratab bo roti doman doyowa nopuḷú inta pinomia nongkon gandum bungainea dungkuḷ totok kon taong tatua. Pinoki silai i Elisa in roti mita tatua kon nabi mita tatua,

⁴³ táe bobantung tatua in noguman, “Diábí tugat kon intau mogatut tanaa!” Ki Elisa in notubag, “Silaidon mako sinbá mongaan in mosia, sin ki Tuhan in noguman kon mosia in mongaanbí bo naonda in nopaḷut mako nongaan oyúonpa doman in kiagatnea.”

⁴⁴ Bobantung tatua in nosilai kon kaanon tatua kon i monia, bo nongaan komintan in mosia. Naonda in nongaan mako oyúonpa in kiagatnea ná inta pinoguman i Tuhan.