DATU MITA 2 25 - Alkitab Singog In Mongondow Masa In Tanaa

Yerusalem Noḷabú

¹ Onda intua ki Zedekia in nomarontak kon i Nebukadnezar datu in Babel. Tuamai in ki Nebukadnezar takin bayongan in tontaranea namangoi bo nonubu kon Yerusalem kon singgai impuḷúnea kon buḷan noginpuḷú kon taong noginsiow kon pinomarentaan i Zedekia. Mosia in noposindog in markas kon ḷuai in kotá, noposindog doman in dinding pongopungan,

² bo tantú nongopung kon kotá tatua noidapot kon taong impuḷú bo mitánea kon pinomarentaan i Zedekia.

³ Kon singgai noginsiow buḷan noginggopat kon taong doman tatua kon dodai in malarat in kaanon motoyangdon totok noidapot in rayat diádon ḷaḷat in kaanon,

⁴ dinding in kotá dinangatandon in musung. Doḷom tua, umpaka intau in Babel koyogot mongopung kon kotá tatua, bayongan in tontara in Yohuda noḷagui nopobayá in Ḷopá in Yordan. Mosia in nongin taman in komaḻig, bo iḻumuai nongin bonawang inta nopoyoguput in dinding doyowa tatua.

⁵ Táe tontara in Babel in nogaḷow kon i Datu Zedekia, bo dinomok monia kon rata in Yerikho. Bayongan in intaunea noḷagui nonaḷámai kon inia.

⁶ Onda intua ki Datu Zedekia in dinia kon i Datu Nebukadnezar kon kotá in Ribla, bo pinopoḷabúan in hukuman.

⁷ Ki adínea mita in iḻimod kon tayowonnea. Nopaḷut mako kon tua ki Zedekia in sinurak doman kon mata, bo inumantungan poḷat dinia kon Babel.

Baḷoi Tuhan pinoguyaat

⁸ Kon singgai noginpitu buḷan iḻimanea kon bonu in taong impuḷú bosiownea kon pinomarentaan i Nebukadnezar datu in Babel, namangoidon in Yerusalem in intau tobatú inta ki Nebuzaradan in tangoinea. Sia in monononggina bo tongguḷu totokan in tontara i Nebukadnezar.

⁹ Ki Nebuzaradan in nonurub kon Baḷoi Tuhan, komaḻig in datu, bo bayongan in baḷoi in intau mita inta ihoromat kon Yerusalem.

¹⁰ Bo bayongan in intaunea nogumpag kon dinding mita in kotá tatua.

¹¹ Onda intua bayongan in rayat inta kon kotá, intau mita inta mongopandoi mogaid inta kon tuapa, intau mita inta nobiag nobogá bo intau mita inta ain noḷagui namangoi kon intau in Babel, tua komintan in diniadon i Nebuzaradan.

¹² Táe tongosilai in rayat inta totok in mobogá bo inta diá kokapunyaan in sinaḷáannea kon Yohuda bo pinoki ḷukadannea in gobá in anggur bo gobá mita in tudunea.

¹³ Oigi mita bitú bo kereta mita kon Baḷoi Tuhan takin doman bejana bitúnea in iḷosi in intau in Babel, bo bayongan in bitú in dinia pinobayá in butá monia.

¹⁴ Mosia in nodia doman kon pakakat mita tanaa: sikop mita, tampat in ḷobud kon mezbah, pakakat mita totuduan in togá, palo mita pososipunan kon dugú in biag inta iratá sin pokuruban, palo mita inta pototubáan kon dupa, bo bayongan in pakakat bitú ibanea inta pinaké kon upacara poibadaan.

¹⁵ Pakakat mita buḷawan bo saḷaka, noitakin doman in palo mita mongointok bo pindan mita inta potuduanmai kon baga in ginamá i Nebuzaradan tontaní.

¹⁶ Pakakat mita bitú inta pinomia i Datu Salomo sin pakéon kon Baḷoi Tuhan, inta oigi doyowa, kereta mita bo bejana moḷoben, komintan mongobogat totok dá diádon kosimbangan.

¹⁷ Oigi bitú doyowa tatua in notongkai; kon batúannea waḷu nometer in koḷantudnea bo oyúon in uḷu tobatú in oigi bitú tatua koḷantudnea in mogatut bo toḷu nopuḷú nosenti. Kon ḻibumai in batúan uḷu in oigi tatua oyúon in sinoḷatak inta iḷambáan in bungai in delima nongkon bitú.

Intau in Yohuda dinia kon Babel

^18-19 Koḻikud intua, ki Nebuzaradan in nodomok doman kon i Imang Moḷoben ki Seraya, ki Zepanya imang mototongod kon oaidan, moḷoḷukad kon ngara in Baḷoi Tuhan taya toḷu, monononggina i datu taya ḻima inta kon kotápa, tongguḷu totok in tontara, toḻindua in tongguḷu totok in tontara inta monoinutmai kon administrasi in tontara, bo intau moḷoben 60 ibanea.

²⁰ Intau mita tatua in nodaitnea dinia kon i Datu Nebukadnezar kon kotá in Ribla,

²¹ kon butá in Hamat. Mosia iroriga kon tua bodongka iḻimod. Natuata in intau mita in Yohuda dinia pinobayá in pinoḷumbúan.

Ki Gedalya gubernur in Yohuda

²² Nopaḷut mako kon tua ki Datu Nebukadnezar in noduí kon i Gedalya ki adí i Ahikam ki ompu i Sapan, nobaḻí gubernur kon Yohuda sin momarenta kon bayongan in intau inta nogutunpa kon tua.

²³ Naonda in porwira mita bo tontara in Yohuda inta doí sinumungkud kon Babel nokodongog kon pinoduían tatua, mosia komintan in namangoi kon i Gedalya kon Mizpa. Porwira mita tatua in ki Ismael ki adí i Netanya, ki Yohanan ki adí i Kareah, ki Seraya ki adí i Tanhumet nongkon kotá in Netopa, bo ki Yazanya nongkon kotá in Maakha.

²⁴ Ki Gedalya in noguman kon i monia komintan, “Moiko in diákabí motoguondok kon intau mita inta nokadai kon pomarentaan in Babel. Pogutundon kon butá naton tanaa bo umaḻídon bobantung i datu in Babel. Ḷukadanku kon moiko in mosaḷamatbí.”

²⁵ Táe kon buḷan impitunea kon taong tatua ki Ismael ki adí i Netanya ki ompu i Elisama inta buípa in datu, minayá noyotakin in intau mopuḷú kon Mizpa. Mosia in nonubu bo noḻimod kon i Gedalya takin intau in Yohuda bo intau in Babel inta noyotakin i Gedalya kon tua.

²⁶ Dá bayongan in rayat in Yohuda, nooyúon andeka inta nobogá, noyotakin in porwira mita noḷagui kon Mesir sin noondok kon intau in Babel.

Ki Yoyakhin pinoḷuaidon nongkon ponjara

²⁷ Kon singgai nogindoyowa nopuḷú bo pitu kon buḷan impuḷú bodoyowá kon taong intoḷu nopuḷú bo pitu naonda in ki Yoyakhin dinia kon pinoḷumbúan, ki Ewil-Merodakh in nobaḻí datu in Babel. Kon taong tatua doman pinoontongneadon in tabinea kon i Yoyakhin, bo pinoḷuaineadon kon ponjara,

²⁸ bo nopiadon in pinogogaidnea. Ki Yoyakhin in inogoiannea in ḷoḻitúan inta noiḻiu nongkon datu mita ibanea inta iḷumbú doman kon Babel.

^29-30 Ki Yoyakhin in diá bidon nogiḷambung in ḷambung in intau in ponjara bo biasanea in mongaan kon komaḻig bo inogoian doman in doit sin pakéon kon kobiagannea.