DATU MITA 2 24 - Alkitab Singog In Mongondow Masa In Tanaa

¹ Kon bonu in pinomarentaan in Datu Yoyakim, ki Nebukadnezar datu in Babel nonubu bo nopotungkud in Yohuda. Toḷu notaong in koonggotnea ki Yoyakin in sinumungkud kon i Nebukadnezar, táe noiduduimai kon tua nomarontak in sia.

² Ki Tuhan in nopotabá in banselang mita inta nomaké in touḷut in parang nongkon bangusa in Babel, Siria, Moab, bo Amon sin monayow kon i Yoyakin bo moyopú kon Yohuda, podudui kon onu inta ain pinoguman-Nea pinongin in nabi mita mogogundoi-Nea.

³ Totuubí kon tua in mustibí mobaḻí, sin ki Tuhan in nogumandon kon bangusa in Yohuda in ḷumbúonbí nongkon butá inta inogoi i Tuhan kon i monia. Mosia in iḷumbú sin popisí in bayongan dosa inta inaidan i Datu Manasye;

⁴ noiḷontú totok popisí in pinoḻimodan inta inaidannea kon intau mita inta diá kotaḷá. Ki Tuhan in doíbí mongampung kon i Manasye sin popisí in aidnea mita tatua.

^5-7 Bayongan in butá, pinangkoi kon Ongkag in Eprat noidapot kon pinosigadan in Mesir kon dotá in utuan inta noituot kon butá pinomarentaan in datu in Mesir, kinawasa in datu Babel. Tuamai datu in Mesir in diádon kon dodai in onda ḷumuai nongkon butánea sin mayá moparang. Ouman ibanea kon i Datu Yoyakin in pinais kon bonu in buk Ouman in Datu mita in Yohuda. Naonda in ki Yoyakin minatoi, ki adínea ḷoḷaki inta ki Yoyakhin in nobaḻí datu nonoḻiu kon inia.

Ki Yoyakhin datu in Yohuda

⁸ Ki Yoyakhin in umur 18 notaong kon dodai in sia nobaḻí datu in Yohuda, bo nomarenta in sia kon Yerusalem toḷu nobuḷan in koonggotnea. Ki inánea in ki Nehusta ki adí i Elnatan nongkon Yerusalem.

⁹ Ná doman ki amánea, ki Yoyakhin in binaradosa doman kon i Tuhan.

¹⁰ Kon bonu in pinomarentaan i Yoyakhin, tontara mita inta kon bonu in tongganut in porwira mita in Nebukadnezar, minayá nonubu kon Yerusalem, bo nongopung kon kotá tatua.

¹¹ Kon dodai in kotá tatua kinopung ki Nebukadnezardon tontaní in namangoi in Yerusalem,

¹² bo ki Datu Yoyakhin takin i inánea, i adínea mita, in porwiranea mita takin pogawai mita in komaḻignea sinumungkud kon i Nebukadnezar. Bo ki Yoyakhin in sinahang. Tua in nobaḻí kon taong noginwaḷu kon pinomarentaan i Nebukadnezar.

¹³ Bayongan in pakakat buḷawan inta pinomia i Datu Salomo sin pakéon kon Baḷoi Tuhan, pinoguraat i Nebukadnezar. Bo bayongan in pakakat inta koboḻi inta kon bonu in Baḷoi Tuhan tatua bo kon komaḻig in dinianea minayá in Babel. Bayongan intua nobaḻí noidudui kon onu inta ain siningog i Tuhan muna.

^14-16 Ki Datu Yoyakhin, ki inánea, ki buḷoinea mita, pogawainea mita, bo itoi mita in Yohuda – kobayong monia komintan in 7.000 in intau inta ihoromat – dinomok bo dinia pinobayá in Babel. Noitakin doman in intau mita inta mopandoi mogaid bo mononontaḷ kobayongnea in 1.000 in intau, komintanbí intau mita inta moropot bo inta mongobarani moparang. Intau mita buí in datu, bo intau mita inta ihoromat in dinia doman minayá in pinoḷumbúan – kobayong monia tua in 10.000 in intau. Gogió bo bayongan in intau inta nogutun kon Yerusalem in dinia; inta kinotaḷáan in dongkadon rayat inta nobiag nobogá totok.

¹⁷ Onda intua ki Nebukadnezar noduí kon i Matanea pokuamáan i Yoyakhin, nobaḻí datu in Yohuda, bo nomaḷui kon tangoinea nobaḻí ki Zedekia.

Ki Zedekia datu in Yohuda

¹⁸ Ki Zedekia in umur 21 notaong kon dodai in sia nobaḻí datu in Yohuda. Nomarenta in sia kon Yerusalem 11 notaong in koonggotnea. Ki inánea in ki Hamutal, ki adí i Yeremia nongkon kotá in Libna.

¹⁹ Ná doman ki Datu Yoyakim, ki Datu Zedekia in binaradosa doman kon i Tuhan.

²⁰ Ki Tuhan in sinumorú totok kon intau mita in Yerusalem bo intau in Yohuda dá diádon inindoian-Neamai in mosia.