DATU MITA 2 23 - Alkitab Singog In Mongondow Masa In Tanaa

Ki Yosia in nonginggamá kon pososumbaan kon dewa

¹ Ki Datu Yosia in nogoiní kon bayongan itoi in Yohuda bo Yerusalem.

^2-3 Bo minayá in sia takin i monia kon Baḷoi Tuhan, dinuduian in imang mita, nabi mita bo bayongan in rayat, pinomayá inta nobiag bogá andeka inta nobiag nooyúon. Kon tayowon monia komintan, kon diug in pal inta sinantú kon i datu, sinimindog in ki datu bo nobaca kinoropot in bayongan tombonu in buk dodandian inta ain nouḻí kon bonu in Baḷoi Tuhan. Onda intua ki datu nomia kon dodandian takin i Tuhan kon motoindudui kon i-Nia, bo mopobayá intua takin ḻimbatú in gina bo dimukud in bayongan parenta bo hukum-Nea mita. Ki datu in nodandi doman kon dumudui kon sarat dodandian i Tuhan takin umat-Nea mita inta ain pinais kon bonu in buk tatua. Bayongan in rayat sinumakin nodandi kon motoinduduibí kon dodandian tatua.

⁴ Nopaḷut mako kon tua ki datu in nomarenta kon i Imang Moḷoben ki Hilkia, imang mita mogogopod bo moḷoḷukad inta nopobayá in oaidan kon ngara in Baḷoi Tuhan, sinbá mopoḷuai nongkon baḷoi tatua in bayongan pakakat inta pinaké posumbaan kon i Baal Dewi Asyera, bo tundi mita. Bayongan in pakakat mita tatua sinubá i Datu Yosia kon ḷuai in kotá kon diug in Ḷopá in Kidron, bo ḷobudnea in dinia kon Betel.

⁵ Pinopogogaineadon in imang mita inta ain dinuí i datu mita in Yohuda sin mopobayá in oaidan kon tampat pososumbaan kon dewa kon kotá mita in Yohuda bo kon diugmai in Yerusalem; bo imang mita doman inta noposumba in kuruban kon i Baal, mata in singgai, buḷan, pakakat mita in ḷangit bo tundi mita.

⁶ Patong mita i Dewi Asyera pinoḷuainea nongkon bonu Baḷoi Tuhan, bo dinia kon ḷuai in kotá kon Ḷopá in Kidron. Kon tua patong tatua sinubá, bo buingnea in dinodok kino rumomok, bo ḷobudnea in pinorarit kon tudu in poḷoḷobongan kon intau mita.

⁷ Gopot mita kon bonu in Baḷoi Tuhan inta pinaké in sundaḷ mita in kuil sin sumundaḷ mosumba kon dewa, in irimumud. (Kon gopot mita tatua bobay mita nogaboḷ kon didit sin pakéon kon posumbaan kon i Dewi Asyera.)

^8-9 Bayongan in imang inta nogutun kon kotá mita in Yohuda in pinoki angoian i Yosia kon Yerusalem, bo kon ondaka kon bayongan in butá in Yohuda pinoponajisnea in mezbah mita in dewa kon tampat inta ain pinobogoian in imang mita kon kuruban. Imang mita tatua in diádon inogoi mopobayá in ibada kon Baḷoi Tuhan. Táe, mosia in motaaubí in mokaan kon roti diá iragian inta sinadia kon yobayat mita topogaidan monia. Mezbah mita inta ain sinantú kon posumbaan kon dewa kon diug in Bonawang i Yosua walikota in butá tatua, in inumpag. Bonawang tatua in noiukat kon dotá in koḷoigi in Bonawang totokanea kon daḷan tumuot in kotá.

¹⁰ Topet, inta tampat pososumbaan kon dewa kon Ḷopá in Hinom, pinonajis. Takin natua diádon in intau inta motaau moposumba in adínea mobaḻí kuruban angagon kon i Dewa Molokh.

¹¹ Bayongan in kabaḷo inta ain sinontaní in datu mita in Yohuda sin pakéon posumbaan kon mata in singgai in iḷumbú, bo kereta mita inta pinaké kon posumbaan tua in sinubá doman. (Kereta mita tatua in kon bosí in Baḷoi Tuhan – kon diug in ngara – diá noyayú nongkon yuang mita pogogutunan i Natan Melekh, pogawai moḷantud tobatú.)

¹² Mezbah mita inta pinosindog in datu mita in Yohuda kon atop kon ḻimonik mita in gopot i Datu Ahas in irimumud. Ná doman tua in mezbah mita inta pinosindog i Datu Manasye kon bosí posiḷosi in Baḷoi Tuhan, irimumud i Yosia, bo iḷumbú kon Ḷopá in Kidron.

¹³ Ná doman tua in mezbah mita kon dotá in pomukaan kon Yerusalem kon dotá in toḷatan Buḷud in Koraatan pinonajis. Mezbah mita tatua in pinosindog i Datu Salomo sin posumbaan kon dewa mita inta mokorongó – inta ki Asytoret dewi in bangusa in Sidon, Kamos dewa in bangusa in Moab, bo Milkom dewa in bangusa Amon.

¹⁴ Tugu mita in dewa bo patong i dewi Asyera in inumpag, bo butá inta pinoposindogan in tugu mita bo patong mita tatua, binumbunan i Yosia in tuḷan mita in intau.

¹⁵ Sia in nomoguyaat doman kon tampat pososumbaan kon Betel inta pinosindog i Datu Yerobeam adí i Nebat – datu inta ain nokopopisí kon intau in Israel nogaid kon dosa. Bo ki Yosia in noḷosi kon mezbah kon tampat pososumbaan tatua, bo sinubánea takin patong i Dewi Asyera inta kon tua.

¹⁶ Onda intua ki Yosia in nobobui bo nokoontong kon tongonumai in poḷoḷobongan kon tudu in buḷud. Dá nopotabá in sia kon intau nongokai kon poḷoḷobongan, bo nopoḷuai in tuḷannea mita bodongka sinubá kon mezbah inta koyogot in sinubá tatua. Natuata in pinononajisnea kon mezbah tatua. Dá nobaḻídon in onu inta ain pinoguman koḻipod i nabi Tuhan kon dodai in ki Datu Yerobeam simindog mako kon diug in mezbah tatua kon pinorayaan tobatú. Nopaḷut mako kon tua ki Datu Yosia in nokoontong kon poḷoḷobongan tobatú bui.

¹⁷ Dá noḻibó in sia, “Poḷoḷobongan i ine in naa?” Intau mita in Betel in notubag, “Tua in poḷoḷobongan in nabi tobatú i Tuhan inta nokoimontandon namangoi in naa nongkon Yohuda, bo nonoḻindap kon onu mita inta bagu pinomia i Tuang kon mezbah tanaa.”

¹⁸ “Dikabí onu-onuon in poḷoḷobongan tatua,” parenta i datu. “Pomayádon mako in tuḷannea mita kon tua dika pampingon!” Dá tuḷan mita i nabi inta nongkon Yohuda tatua in diábí in onu bo onu bo natua doman in tuḷan mita in nabi nongkon Samaria inta iḷobong kon tua.

¹⁹ Kon batúan in kotá kon Israel, ki Datu Yosia in nogumpag kon bayongan in tampat pososumbaan kon dewa inta pinosindog in datu mita in Israel, bo inta ain nokopopisí kon ki Tuhan sinumorú. Onu inta ain inaidan i Datu Yosia kon Betel, tua in inaidannea doman kon mezbah mita kon bayongan in Israel.

²⁰ Bayongan in imang inta nopobayá in oaidan kon tampat mita pososumbaan kon dewa iḻimodnea kon tudu in mezbah mita inta pinopobayáan monia in oaidannea. Bo kon batúan in mezbah tatua notubá in ki Yosia kon tuḷan mita in intau. Nopaḷut mako kon tua nobui in sia kon Yerusalem.

Ki Yosia norame kon Paska

²¹ Onda intua ki Datu Yosia in nomarenta kon rayat moraya kon Paska ná inta pinais kon bonu in buk Dodandian takin i Tuhan. Pinongin natua mosia in mohoromatbí kon i Tuhan, Allah monia.

²² Pinangkoipa kon bangusa in Israel pinarenta in pahlawan mita diápa kon dodai in onda in datu in Israel andeka datu in Yohuda inta nomia kon rame Paska ná tatua.

²³ Tongábí kon taong impuḷú bo waḷu kon pinomarentaan i Yosia tatua bo Paska in bui irame kon Yerusalem sin mohoromat kon i Tuhan.

Ponoimbaguan mita ibanea inta inaidan i Yosia

²⁴ Kon mopoaid in hukum mita inta pinais kon bonu in buk inta nouḻí i Imang Moḷoben ki Hilkia kon Baḷoi Tuhan, bayongan in mogogoiní kon dimukud bo mononoḻindap in pinoguntun i Datu Yosia nongkon Yerusalem bo nongkon bayongan in Yohuda, bo iḷumbúnea in bayongan dewa in tonibuḷoi, berhala, bo pakakat mita inta pinaké kon posumbaan kon dewa mita.

²⁵ Diápa kon dodai in onda in datu in ná ki Datu Yosia inta nogundoi kon i Tuhan takin ḻimbatú in ginanea, bo noponiata intua kon kobobiag bo aidnea, podudui in bayongan in hukum inta kon bonu in buk i Musa. Naonda in noiduduimai kon i Datu Yosia, diá bidon in datu in ná sia tua.

²⁶ Táe oaid i Datu Manasye ain nokopomuká kon torú i Tuhan kon Yohuda; bo torú-Nea tatua in diápabí noinggamá.

²⁷ Ki Tuhan in noguman, “Onu inta ain inaidan-Ku kon Israel, in pomiaan-Kubí doman kon Yohuda. Intau in Yohuda in ḷumbúon-Kubí doman kon butá inta ogoi-Ku kon i monia. Doíon-Kubí in Yerusalem, kotá inta piniḻí-Ku, bo baḷoi-Ku doman tanaa, inta podudui in singog-Ku in mobaḻí tampat poibadaan kon i-Nakó.”

Buit in pinomarentaan i Yosia

^28-30 Ki Datu Yosia in minatoi kon pinoparangan kon Megido kon dodai in sia minayá nonubu kon Nekho, datu in Mesir, inta koyogot in namangoi takin tontaranea sin motuḷung kon datu in Asyur kon bingkí in Ongkag in Eprat. Mayat i Datu Yosia in ginamá in pogawainea mita bo dinia nobui pinotakoi kon kereta pinobayá in Yerusalem. Kon tua iḷobong in sia kon poḷoḷobongan in datu mita. Bo rayat in Yohuda in nomiḻí bo noduí kon i Yoahas ki adínea ḷoḷaki nobaḻí datu nonoḻiu kon inia. Ouman ibanea kon i Datu Yosia in pinais kon bonu in buk Ouman in Datu mita in Yohuda.

Ki Yoahas datu in Yohuda

³¹ Ki Yoahas in umur 23 notaong kon dodai in sia nobaḻí datu in Yohuda, bo nomarenta in sia kon Yerusalem toḷu nobuḷan in koonggotnea. Ki inánea in ki Hamutal ki adí i Yeremia nongkon kotá in Libna.

³² Ki Yoahas in binaradosa kon i Tuhan ná mogoguyangnea.

³³ Pinomarentaan i Yoahas in nopaḷut naonda in ki Nekho datu in Mesir nodomok kon inia kon Ribla, kon butá in Hamat, bo pinakisanea in Yohuda moguboḻi kon iba kon inia kobayongnea in 3.400 nokilo in saḷaka bo 34 nokilo in buḷawan.

³⁴ Onda intua ki datu Nekho in noduí kon i adí ḷoḷaki i Yosia inta ki Elyakim in tangoinea nobaḻí datu in Yohuda, bo binaḷuiannea in tangoi i Elyakim nobaḻí Yoyakim. Ki Yoahas in dinianea minayá in Mesir bo minatoi in sia kon tua.

Ki Yoyakin datu in Yohuda

³⁵ Baḻíon poguboḻi kon iba inta sinuntut in datu in Mesir, ki Datu Yoyakin noigum kon pajak nongkon rayat podudui in komampuan monia kon batúannea.

³⁶ Ki Yoyakin in umur 25 notaong kon dodai in sia nobaḻí datu in Yohuda, bo nomarenta in sia kon Yerusalem mopuḷú bomitá notaong in koonggotnea. Ki inánea in ki Zebuda, ki adí i Pedaya nongkon kotá in Ruma.

³⁷ Ki Yoyakin in binaradosa kon i Tuhan naonda bo mogoguyangnea.