DATU MITA 2 21 - Alkitab Singog In Mongondow Masa In Tanaa

Ki Manasye datu in Yohuda

¹ Ki Manasye in umur 12 notaong kon dodai in sia nobaḻí datu in Yohuda, bo sia in nomarenta kon Yerusalem 55 notaong in koonggotnea. Ki inánea in ki Hepzibah.

² Ki Manasye in binaradosa kon i Tuhan, sin dinumudui kon kabiasaan mita inta moraat in bangusa mita inta pinoguntun i Tuhan nongkon Kanaan kon dodai intau in Israel sinumuot kon butá tatua.

³ Tampat mita pososumbaan kon dewa inta ain inumpag i Hizkia ki amánea in buineabí pinosindog. Noposindog in sia in mezbah mita sin poibadaan kon i Baal, bo nogaid kon patong i Dewi Asyera, ná inta pinomia i Ahab datu in Israel. Ki Manasye in nosumba doman kon tundi mita.

⁴ Ki Tuhan in ain noguman kon Yerusalem in tampat koangoian-Nea bo tampat pooibadaan kon i-Nia, táe kon tua kon Baḷoi Tuhan, ki Manasye in noposindogdon in mezbah mita kon dewa mita.

⁵ Kon bosimai in Baḷoi Tuhan posiḷosi tua pinoposindoganneadon in mezbah mita sin posumbaan kon tundi mita.

⁶ Ki Adínea in pinosumbanea nobaḻí kuruban payongon. Ki Manasye in nomaké doman in mongonggaing, bo mododoyangow, ponggaing, bo mopoigum in totundú kon dimukud mita. Binaradosadon totok in sia kon i Tuhan noidapot in nokopomukádon kon torú-Nea.

⁷ Lambang i Dewi Asyera in sinagúnea kon bonu in Baḷoi Tuhan, bokaka soaḷ tampat tatua ki Tuhan in nogumandon kon i Daud bo kon i Salomo ki adínea ḷoḷaki, “Baḷoi-Ku bo Yerusalem naa, inta ain piniḻí-Ku nongkon sigad in butá in suku in Israel inta mopuḷú bo doyowa, in tampat inta ain sinantú-ku mobaḻí tampat pooibadaan kon i-Nakó.

⁸ Bo aka umat in Israel motoindudui kon bayongan in parenta-Ku bo dumudui kon hukum mita inta inogoi i Musa mogogundoi-Ku kon i monia, dá Akuoi in diábí mopomayá mako kon i monia poguntunon nongkon butá inta ain inogoi-Ku kon mogoguyang monia.”

⁹ Táe intau in Yohuda in diá motoindudui kon i Tuhan, bo ki Manasye in nokopopisídon kon i monia nogaid kon dosa inta moiḻiu in raatnea nongkon dosa inta pinomia in bangusa mita inta pinoguntun i Tuhan nongkon Kanaan kon dodai in umat in Israel sinumuot kon butá tatua.

¹⁰ Tuamai in pinongin nabi mita, mogogundoi mita i Tuhan, ki Tuhan in noguman,

¹¹ “Ki Datu Manasye in moraatbí totok. Oaidnea in moraa-raat nongkon oaid in intau in Kanaan. Pinongin berhala mita inta pinomianea, sia in nokopopisídon kon intau in Yohuda binaradosa.

¹² Tuamai, Akuoi, ki Tuhan Allah inta sinumba in intau in Israel, mopoangoidon in bodito inta totok in moḷoben kon Yerusalem bo kon Yohuda dá bayongan in intau inta mokodongog kon tua in moitaḻikokogdon.

¹³ Yerusalem in hukumon-Kubí ná pinohohukum-Ku kon Samaria bo kon i Ahab datu in Israel takin buínea. Yerusalem in radatan-Ku kodariton naonda bo pindan inta iyuyúan bo pinotongkob.

¹⁴ Intau mita inta nogutunpa kon tua in pomayá-Kudon mako mobaḻí kokaanon in musungnea mita, inta momilang kon i monia bo mogagow kon butá monia.

¹⁵ Bayongan tua in aidan-Kubí kon umat-Ku sin mosia in binaradosadon kon i-Nakó bo nopomukádon in torú-Ku pinangkoipa kon mogoguyang monia iḻumuai nongkon Mesir noidapot in singgai naa.”

¹⁶ Koḻikud in nokopopisí kon intau in Yohuda binaradosa kon i Tuhan pinongin nosumba kon berhala, ki Manasye in noḻimod doman kon nobayong totok in intau inta diá kotaḷá dá dugú in moiḻig kon bayongan in tampat kon Yerusalem.

¹⁷ Ouman ibanea kon i Datu Manasye bo dosanea mita, in pinais kon bonu in buk Ouman in datu mita in Yohuda.

¹⁸ Ki Manasye in minatoi bo iḷobong kon taman in komaḻig, inta taman i Uza. Ki Amon ki adínea ḷoḷaki in nobaḻí datu nonoḻiu kon inia.

Ki Amon datu in Yohuda

¹⁹ Ki Amon in umur 22 notaong kon dodai in sia nobaḻí datu in Yohuda bo nomarenta in sia kon Yerusalem doyowa notaong in koonggotnea. Ki inánea in ki Mesulemet ki adí i Harus, intau in Yotba.

²⁰ Ná ki amánea, sia in binaradosa doman kon i Tuhan.

²¹ Sia in dinumayan kon aid mita i amánea, bo nosumba kon berhala mita inta sinumba i amánea.

²² Diábí in sia nobiag dinumudui kon ibog i Tuhan, noidapotbí in nonaḷámai in sia kon i Tuhan, Allah inta sinumba in mogoguyangnea.

²³ Pogawai mita i Datu Amon in noyopopog bo noḷawang kon inia bo noḻimod kon inia kon komaḻig.

²⁴ Táe rayat in Yohuda in noḻimod kon intau mita inta noḻimod kon i Datu Amon tatua, bo noduí kon i Yosia ki adínea, nobaḻí datu.

²⁵ Ouman ibanea kon i Amon in pinais kon bonu in buk Ouman in Datu mita in Yohuda.

²⁶ Ki Amon in iḷobong kon poḷoḷobongan kon taman i Uza. Ki Yosia ki adínea in nobaḻí datu nonoḻiu kon inia.