DATU MITA 2 20 - Alkitab Singog In Mongondow Masa In Tanaa

Ki Datu Hizkia notakit bo inundaman

¹ Kon tungkuḷ intua ki Datu Hizkia in binituḷ inta totokdon in mobogat bo gogiódon matoi. Ki Nabi Yesaya ki adí i Amos in minayá nokipodungkuḷ kon inia bo noguman, “Ki Tuhan in nongoyow sinbá ki Tuang Datu in monoḻisídon kon bayongan in oaidan, sin ki Tuang in diádon mopia. Diádon moonggot bo matoi in ki Tuang Datu.”

² Ki Hizkia in nomurow bo sinumayow kon dinding bo nosambayang,

³ “Tuhan, toropa kaasí in akuoi naa inta ain nogundoi kon ini-Mu sinumoḷutui bo notuḻid in gina. Akuoi in umuranbí noḷongasi dinumudui kon ibog-Mu.” Bo nongombaḷdon totok in ki Hizkia.

⁴ Ki Yesaya in nonaḷámaidon kon i Hizkia, táe kon dodai in sia diápa nonaḷámai nongkon palas kon yuak in komaḻig, ki Tuhan in nopotabá kon inia

⁵ buipa bayá kon i Hizkia, datu in umat i Tuhan, bo potaau in koyow tanaa, “Akuoi, ki Tuhan, Allah inta sinumba i Daud mogoguyangmu, ain nokodongog kon sambayangmu bo nokoontongdon kon ḷuámu. Undaman-Kudon in iko; toumá in iko in mayádon kon Baḷoi-Ku.

⁶ Dugangan-Kupa in umurmu mopuḷú bo ḻima notaong bui. Iko bo kotá in Yerusalem in poḷuat-Kudon nongkon i datu in Asyur. Kotá tanaa in oḻingoian-Kudon sin moḷukad kon tangoi-Ku tontaní bo popisí doman in dodandian-Ku takin mogogundoi-Ku ki Daud.”

⁷ Bo nokigamá in kukis bungai in ara in ki Yesaya kon intau bo pinopoḻeponea kon bituḷ i datu sinbá mopia in sia.

⁸ Ki Datu Hizkia in noḻibó, “Onu in mobaḻí tomponuot kon ki Tuhan in mongundamdon kon inakó bo toumá in akuoi in motaaudon bui mayá in Baḷoi Tuhan?”

⁹ Ki Yesaya in notubag, “Ki Tuhan in mobogoibí in tomponuot kon i Tuang datu kon Sia in mogintompodbí kon dandi-Nea. Tanaa, onu in koibog i Tuang Datu: oḻinow kon jam inta nobaḻí totundú in mata in singgai inta pinomia i Datu Ahas umuna 10 nogares andeka umundok 10 nogares?”

¹⁰ Ki Hizkia in noguman, “Aka tongá momia sinbá oḻinow tatua umuna 10 nogares in mogampangbí. Tuamai in pomiadon in sia umundok 10 nogares.”

¹¹ Ki Yesaya in nosambayang kon i Tuhan, bo ki Tuhan in nopobaḻí kon oḻinow tatua inumundok 10 nogares kon jam totundú in mata in singgai tatua.

Totabá mita nongkon Babel

¹² Degá ná doman wakutu kon dodai intua ki datu in Babel, inta ki Merodakh-Baladan ki adí i Baladan, nokodongog kon ki Datu Hizkia in bagupa nopia kon takit. Dá nopotabá in intau in sia modia kon surat bo tombuinag kon i Hizkia.

¹³ Ki Hizkia in notomu kon totabá mita tatua bo nopoontong kon i monia in bayongan in kooyúonannea, inta buḷawan bo saḷaka, pododungú mita bo ḷana mobondu, bo bayongan in pakakat in tontaranea. Diábí in tobatúmai in kon komaḻig bo kon bayongan in dodatuan nea inta diá pinoontong kon i monia.

¹⁴ Onda intua ki Nabi Yesaya in namangoi kon tayowon i Datu Hizkia bo noḻibó, “Nongkon onda in intau mita tatua? Onu in guman monia?” Ki Hizkia in notubag, “Mosia in nongkon Babel, butá inta noyayú.”

¹⁵ “Onu in indoian monia kon komaḻig?” iḻibó bui i Yesaya. “Bayongan in yagi-yagi!” tubag i Hizkia. “Diábí in tobatúmai in kon bonu in pononagúan in komaḻig in diá pinoontongku kon i monia.”

¹⁶ Bo ki Yesaya in noguman kon i datu, “Ki Tuhan in noguman kon

¹⁷ moiangoibí in wakutunea kon bayongan in kaoyúonan kon bonu in komaḻigmu bo inta ain sinipun in mogoguyangmu dapot in singgai naa, in diaandon mayá in Babel. Diábí in kotaḻiban.

¹⁸ Nongkon i adí bo ompumu oyúon in gamáan bo baḻíon pogawai in komaḻig sin mobantung kon i datu in Babel.”

¹⁹ Ki Datu Hizkia in notubag, “Mopiabí doman in koyow i Tuhan inta pinotaaumu kon inakó.” Notubag natua in sia sin irainea: “Asaḷ bo dodatuan ku in umuran moaman bo modame kon bonu in akuoi mobiagpa.”

Imbuit in pinomarentaan i Hizkia

²⁰ Ouman ibanea kon i Datu Hizkia, kon onu mita in pinomianea inta mopia, bo naonda in pinogogaidnea kon tabang bo got in tubig sin mopoangoi in tubig kon kotá, tua komintan in pinaisdon kon bonu in buk Ouman in datu mita in Yohuda.

²¹ Ki Hizkia in minatoi, bo ki Manasye ki adínea in nobaḻí datu nonoḻiu kon inia.