DATU MITA 2 2 - Alkitab Singog In Mongondow Masa In Tanaa

Ki Elia biningkat namonik soroga

¹ Noiyaputdon in wakutunea ki Tuhan modia kon i Elia mamonik in soroga pongin uḷu in tompot. Kon dodai intua ki Elia bo ki Elisa in nobuatdon nongkon Gilgal,

² bo kon daḷan ki Elia in noguman kon i Elisa, “Kon naapa. Akuoi in pinotabá i Tuhan mayá in Betel.” Táe ki Elisa in notubag, “Podoyon kon i Tuhan inta nobiag bo podoyon kon nyawa i Amá, akuoi in diábí monaḷámai kon i Amá.” Dá mosia in noyotakin nongingguput kon bobayáan nodapot in Betel.

³ Tongopaanan in nabi inta nogutun kon tua in minayá nokipodungkuḷ kon i Elisa bo noḻibó, “Kinotaauanmu degá kon singgai in naa in ki tuangmu monaḷámaidon kon inimu sin diaandon i Tuhan mamonik?” “Oo, kinotaauankubí,” tubag i Elisa. “Táe natuabí, dikadon mongonguman kon tua in kita.”

⁴ Onda intua nogumandon in ki Elia kon i Elisa, “Kon naapa, akuoi in pinotabá i Tuhan mayá in Yerikho.” Táe ki Elisa in notubag, “Podoyon kon i Tuhan inta nobiag bo podoyon kon nyawa i Amá, akuoi in diábí monaḷámai kon i Amá.” Dá taya dua in nongingguputdon kon bobayáan noidapot in Yerikho.

⁵ Topaanan in nabi inta nogutun kon tua minayá nokipodungkuḷ kon i Elisa bo noḻibó “Kinotaauanmudon degá kon singgai in naa ki tuangmu in diaandon i Allah bo monaḷámaidon kon inimu?” “Oo, kinotaauanku,” tubag i Elisa, “Táe kibio-biómaidon, dikadon mongonguman kon tua in kita.”

⁶ Onda intua nogumandon in ki Elia kon i Elisa, “Kon naapa. Akuoi in pinotabá i Tuhan mayá in Ongkag in Yordan.” Táe ki Elisa in notubag, “Podoyon kon i Tuhan inta nobiag bo podoyon kon nyawa i Amá, diábí in akuoi monaḷámai kon i Amá.” Dá nongingguputdon in mosia kon bobayáan nodapot in Ongkag in Yordan,

⁷ bo nabi ḻima nopuḷú in dinumudui kon i monia. Ki Elia bo ki Elisa in sinumogon kon bingkí in ongkag, bo nabi inta ḻima nopuḷú tatua in sinimindog diá noyayú kon tua.

⁸ Noḷongkut in ki Elia kon jubahnea, iḻitodnea bo pinomobaknea kon tubig in ongkag tatua. Dá nosilaidon doyowa in tubig in ongkag tatua, dá notaaudon in taya dua i Elisa minaya-mayá kon gantog inta noingkag.

⁹ Naonda in noiyaput in ḷoḷan, ki Elia in noguman kon i Elisa, “Igumdon onu in koibogmu kon inakó kon dodai in diápa diaan mamonik i Tuhan in akuoi bo monaḷámaidon kon inimu!” Ki Elisa in notubag, “Ogoidon kon inakó in kawasa i Amá, sinbá akuoi in mobaḻídon toḻiu i Amá.”

¹⁰ “Uḻe, mororigabí totok intua,” tubag i Elia. “Táe aka ontongonmu in akuoi kon dodai in akuoi diaan mamonik i Tuhan, dá onu in pinoigummu tua in ogoibí. Aka diá koontonganmu, yo onu in pinoigummu in diábí ogoi.”

¹¹ Kobaya-bayá, umuran in taya dua mongonguman. Bo daḻídon in kereta inta kodoko-dokot inta inugut in kabaḷo namangoi nopoyoguat kon inayadua bo diniadon namonik in uḷu in tompot minayá in soroga in ki Elia.

¹² Inontong i Elisa intua bo nomaḷú in sia, “Elia, Amáku! Amáku! Moḷoḷukad kon Israel inta motorindog! Diádon in ki Amá!” Dá diádon inontong i Elisa in ki Elia. Takin robonoḷ in dodob ki Elisa nomerak kon jubahnea nosilai doyowa,

¹³ bo nopuyut kon jubah i Elia inta noḷabú. Nopaḷut mako kon tua nobui in sia bo sinimindog kon bingkí in Ongkag in Yordan,

¹⁴ bo nopomobak in jubah i Elia tatua kon tubig poḷat noguman, “Kon onda in ki Tuhan, Allah i Elia tatua?” Naonda in pinomobaknea mako in jubah tatua kon tubig in ongkag tatua, nosilai doyowa in tubig tatua bo minayá in sia in ḷoḷan.

¹⁵ Nabi kon Yerikho inta ḻima nopuḷú tatua in nokoontong kon inia, bo noguman, “Kawasa i Elia in pinampingdon kon i Elisa!” Mosia in namangoi kon inia bo sinumungkud kon tayowonnea

¹⁶ bo noguman, “Kami in ḻima nopuḷú in naa, komintan mongoropot. Tuamai, koḻigai in kita mayá motayak kon i Elia ki tuangmu tua. Degá bo Roho i Tuhan in nodiadon kon inia pinobayá in buḷud andeka kon ḷopá, bo sinaḷáan kon tua.” “Dikadon!” tubag i Elisa.

¹⁷ Táe umuranbí doman pakisaan monia dá noibogdon in sia. Dá minayádon in nabi taya ḻima nopuḷú tatua bo notayak kon i Elia toḷu nosinggai in koonggotnea, táe diábí nouḻí monia in sia.

¹⁸ Bo nobuidon mangoi in mosia kon i Elisa inta nogoḷat mako kon Yerikho. “Ain pinogumanku kon donaaidon mayá in moiko!” guman i Elisa kon i monia.

Mokoherang mita inta pinomia i Elisa

¹⁹ Tongonumai intau in Yerikho namangoi kon i Elisa bo noguman, “Amá, ná inta ain inontong tontaní i Amá, kotá tanaa in mopia, táe tubignea in diábí mopia bo mokopopisí kon bobay mita inta nonogusian, koukaian.”

²⁰ “Pogamádon kon palo inta nobagupa,” guman i Elisa, “bo bonuai in simuton.” Dá diniadon mangoi monia kon inia onu inta pinoigumnea tatua.

²¹ Bo minayádon in ki Elisa kon uḷuan in ongkag tatua bo noponabud in simuton tatua kon bonu in tubig bo noguman, “Naadon inta siningog i Tuhan: ‘Tompiaan-Kudon in tubig tanaa sinbá diádon mokopopisí kon kopatoian andeka koukaian!’ ”

²² Nongkon dodaidon intuata nopiradon in tubig tatua pinodudui ná tosingogon i Elisa.

²³ Nopaḷut mako kon tua nobuatdon in ki Elisa nongkon Yerikho minayá in Betel. Kon yuak in daḷan topaanan in mongoadí iḻumuai nongkon kotá bo nopoyagi-yagimai kon inia. “Ei ḷogat, ḷogat, bayádon nongkon naa!” guman monia noropot.

²⁴ Ki Elisa in nobobui bo inimindoi kon i monia bo nogodi-godi kon i monia pinodoyon kon tangoi i Tuhan. Kon dodai doman intua iḷumuaidon in beruang kobaayan doyowa nongkon kayuon bo nomera-merak kon opat nopuḷú bodoyowá in mongoadí inta kon sigad in mongoadí mita tatua.

²⁵ Ki Elisa in nongingguputdon kon bobayáan minayá in Buḷud in Karmel, onda intua nobui kon Samaria.