DATU MITA 2 19 - Alkitab Singog In Mongondow Masa In Tanaa

Ki Datu nopoigum in tonggina kon i Nabi Yesaya

¹ Kon dodai in ki Datu Hizkia nokodongog kon habar in intaunea toḷu tatua, nomerak in sia kon ḷambungnea bo nomaké in sosapi nobaḻí tomponuot kon morobonoḷ in dodobnea, bo minayá kon Baḷoi i Tuhan.

² Onda intua nopotabá in sia kon i Elyakim, tongguḷu in komaḻig, ki Sebna momomais in negara, bo imang mita inta nogogoguyangdon, sin mokipodungkuḷ kon i Nabi Yesaya ki adí i Amos. Mosia in nogisosapi doman.

³ Naa in koyow i Hizkia inta pinotaau monia kon i Yesaya, “Singgai in naa singgai inta mokorobonoḷ kon gina, ihukum in kita bo pinopoompámai. Kita naa in naonda bo bobay inta mononggadídon táe kinodaitandon in ropot.

⁴ Ki Datu in Asyur in nopotabádon in porwiranea moḷantud tobatú sin mopoompámai kon i Allah inta nobiag. Dika-dika bo kinodongogandon i Tuhan Allahmu in singog nopoompámai tatua, bo mohukumdon kon i monia inta nosingog tatua! Tuamai in posambayangdon kon i Allah sin kobiagan in intau mita naton inta nobiagpa.”

⁵ Naonda in notarima mako kon koyow nongkon i Datu Hizkia tua,

⁶ ki Yesaya in nopotabá kon totabá mita tatua mopotaau in tubag tanaa, “Ki Tuhan in noguman, ki Tuang Datu in dikabí moondok in mokodongog kon tosingogon in bobantung mita i datu in Asyur tatua kon ki Tuhan in diábí mokoposaḷamat kon i naton.

⁷ Baḻíonbí i Tuhan in ki datu Asyur tua mokidongog kon habar in tompot dá mobuidon in sia kon butánea tontaní, bo ḻimodon in sia kon tua.”

Intau in Asyur nokidia bui in habar gogondok ibanea

⁸ Porwira in Asyur tatua in nokouḻídon kon habar kon datunea in nonaḷámaidon kon Lakhis bo koyogot in moparang monayow kon kotá in Libna, diá noyayú kon tua. Dá minayádon in porwira tatua kon tua sin mokipodungkuḷ kon i datunea tatua.

⁹ Ki datu in Asyur in notarimadon kon habar kon tontara in Mesir inta kon bonu in tongganut i Tirhaka datu in Sudan taya-tayamangoidon sin monubu kon i monia. Tuamai, ki datu in Asyur nokidiadon in surat kon i Hizkia datu in Yohuda.

¹⁰ Nanaa in bonu in surat tatua, “Dika koakaḷan in dandi i Allahmu inta pongatamu tua kon iko in diábí moḷabú kon bonu in ḻimaku.

¹¹ Iko in nokodongogdon kon bayongan in butá inta sinubu in datu mita in Asyur, in irimumudbí komintan. Dikabí morai kon iko in kotaḻiban!

¹² Kon dodai in mogoguyangku norimumud kon kotá in Gozan, Haran, bo Rezep, poḷat noḻimod kon intau in Eden inta nogutun kon Telasar, diábí in tobatúmai in nongkon dewa mita monia in nokoposaḷamat kon i monia.

¹³ Kon onda in datu mita in kotá in Hamat, Arpad, Separwaim, Hena, bo Iwa?”

¹⁴ Ki Hizkia in notarima kon surat tatua nongkon totabá mita, bo binacanea. Onda intua minayá in sia kon Baḷoi Tuhan, bo binukánea in surat tatua kon tayowon i Tuhan,

¹⁵ bo nosambayang, kainia, “Tuhan, Allah in Israel, inta iḻimitú kon tudu in Kerub, Tongábí Iko tontaní in Allah inta nongawasa kon bayongan in dodatuan kon dunia naa. Ikobí in nomaḻí kon ḷangit bo butá.

¹⁶ Tuhan, indoiaipa kaasí in onu inta koyogot in nobaḻí kon inami. Indongogaipa kaasí in singkuḻe i Sanherib kon ini-Mu, o Allah inta nobiag!

¹⁷ Kinotaauanbí nami komintan, Tuhan, kon datu mita in Asyur ain nomutú kon nobayong in bangusa bo norimumud kon butá mita monia.

¹⁸ Dewa mita in sinurub doman bo irimumud, sin dewa mita tatua in totuubí kon diá in kawasa. Mosia tua in tongábí patong nongkon kayu bo batu pinomia in intau.

¹⁹ O Tuhan, Allah nami, poḷuatdon in kami nongkon intau mita in Asyur tatua, sinbá bayongan in intau kon dunia in monotaaudon kon tongábí Iko tontaní in Allah.”

Koyow i Yesaya kon i datu

²⁰ Onda intua nokidia in ki Yesaya in koyow kon i Datu Hizkia kon nobaḻí tubag in sambayang i datu,

²¹ ki Tuhan in noguman, “Kotá in Yerusalem kinumosing bo nopoompámai kon inimu, Sanherib.

²² Kinotaauanmu degá mongo ki ine in sinibáanmu bo pinopoompámumai tatua? Akuoi, Allah in Israel, Allah inta motusi! Mokaḷakuang totok in dodiamu kon i-Nakó.

²³ Iko in nopotabá mangoi in totabá takin ambungangaḷ in singog kon takin bayongan in kereta in parangmu nopotungkudon in iko in buḷud mita inta totok in mongoḷantud kon Libanon. Iko in dinumodiadon kon iko in nomupuḷ kon pangkoi mita in ḷokuyúnea inta totok in moḷantud bo inta totok in mopia bo poḷat irumudak kon kayuonnea mita inta totok in apow.

²⁴ Iko doman in dinumodia kon iko in nongaḻi kon parigí bo nonginum kon tubig kon butá mita ibanea, bo tontaramu mita in noritak kon Ongkag in Nil noidapot in noingkag.

²⁵ Degá diápa dodai in onda in iko nokodongog kon bayongan intua in aindon sinomayá-Ku nongkon dungkuḷpamai? Bo tanaa in aidan-Kudon. Akuoibí in nobogoi in kawasa kon inimu sin morimumud kon kotá mita inta oyúon in poḷoḷukadan nobaḻídon utag.

²⁶ Intau mita inta nogutun kon tua in diádon kodaya, noitaḻikokog in mosia bo inagían in ondok. Mosia in naonda bo bonok kon payoyan andeka bonok inta nobiag kon tudu in atop, inta moingkag aka irupon in tompot in pomukaan inta mopatú.

²⁷ Táe nodait-Kubí kinotaauan in iko nion. Kinotaauan-Kubí in onu inta pinomiamu bo kon onda in kobayáanmu.

²⁸ Kinotaauan-Kubí kon iko in sinumorú totok kon i-Nakó, bo kinodongogan-Ku domandon in kaḷakuangmu tatua. Tanaa in popopakéan-Kudon in kokarit kon ngiungmu bo rante kon bibigmu, sinbá uguton-Kudon in iko mongin daḷan inta binayáanmu kon tungkuḷ in namangoi.”

²⁹ Ki Yesaya in nokidia doman in koyow tanaa kon i Hizkia, “Naadon in mobaḻí tomponuot kon inimu. Taong tanaa bo taong moiduduimai intau in mokaanbí kon gandum inta nobiag tontaní. Táe mopaḷut mako kon tua mosia in motaaudon momuḷa kon gandum bo anggur bo poḷat mokaan kon bungai in boyónea.

³⁰ Intau in Yohuda inta nobiagpa in mobiagbí motompia naonda bo pinomuḷa inta moonag totok in uakatnea bo mopomungaidon in bungainea.

³¹ Kon Yerusalem bo koḻimonik in Buḷud in Sion in oyúonbí intau mita inta mosaḷamat, sin ki Tuhan in nonantúdon kon tatua in mobaḻíbí.

³² Naadon inta siningog i Tuhan soaḷ datu in Asyur: ‘Diábí in sia moituot in Yerusalem andeka mopopiot in piotnea potaná kon kotá tatua. Tontara mita inta nomaké in kaḻeaw in diábí moidiug kon kotá tatua, bo kon ḻibuneamai in diábí poposindogan in ambong sin pongopungan.

³³ Datu in Asyur in mobuibí mongin daḷan inta binayáannea kon tungkuḷ in namangoi, takin diábí tumuot kon kotá tatua. Akuoi, ki Tuhan, ain nosingog.

³⁴ Kotá in Yerusalem in tuḷungan-Kubí bo ḷukadan-Ku sin moḷukad kon tangoi-Ku bo podoyon doman kon dodandian-Ku takin in mogogundoi-Ku ki Daud.’ ”

³⁵ Doḷom doman tua malaekat i Tuhan in namangoi kon pinononḷoḷaigan in intau in Asyur, bo noḻimod kon 185.000 in tontara. Nobangon monik doḷo-doḷom mayat mita monia tatua in noiyayitdon magí mako.

³⁶ Dá inumundokdon in ki Sanherib datu in Asyur bo nobui kon Niniwe.

³⁷ Kon singgai tobatú, kon tungkuḷ in sia koyogot in moibada kon bonu in kuil in Dewa Nisrokh, iḻimod in sia in kedang i Adramelekh bo i Sarezer, ki adínea mita ḷoḷaki. Nopaḷut mako kon tua noḷagui in mosia kon butá in Ararat. Dá ki Esarhadon, ki adínea ḷoḷaki inta ibanea, in nobaḻí datu nomaḷui kon inia.