DATU MITA 2 18 - Alkitab Singog In Mongondow Masa In Tanaa

Ki Hizkia datu in Yohuda

¹ Kon taong nogintoḷu kon pinomarentaan i Datu Hosea adí i Ela kon Israel, ki Hizkia ki adí i Ahas in nobaḻí datu kon Yohuda.

² Kon dodai intua umurdon in sia 25 notaong bo nomarenta in sia kon Yerusalem 29 notaong in koonggotnea. Ki inánea in ki Abia adí i Zakharia.

³ Ki Hizkia in nogaid kon onu inta mokosanang kon gina i Tuhan ná ki Daud mogoguyangnea.

⁴ Irimumudneadon in tampat mita pososumbaan kon dewa, bo inumpagnea domandon in tugunea mita poḷat nomoguyaat kon patong i Dewi Asyera. Bo irimumudnea doman in uḷag bitú inta pinomia i Musa inta sinangoian Nehustan. Sin, noidapot in kon dodai intua intau in Israel tantúpa doman motubá kon dupa sin mohoromat kon uḷag bitú tatua.

⁵ Kon sigad in bayongan datu in Yohuda, pinomayá inta noiuna andeka inta noidudui kon i Hizkia, diábí in ná sia. Sia in mopirisaya kon i Tuhan, Allah in Israel,

⁶ bo mosatia kon i-Nia. Diábí kon dodai in onda in sia moḷawang kon i Tuhan. Bayongan in parenta i Tuhan inta inogoi pinongin i Musa, totu-totuubí kon dinuduian i Hizkia.

⁷ Tuamai in ki Tuhan umuran motuḷung kon inia dá bayongan inta ḷongasionnea in nodaitbí kodapotan. Sia in nomarontak kon i datu in Asyur, bo doíbí tumungkud kon inia.

⁸ Sinaḷownea in intau in Pilistin, bo nogagow kon tampat pinogutunan monia, nongkon ḻipú inta mointok noidapot in kotá inta totok in moḷoben, noitakin doman in Gaza bo butá mita inta kon diugneamai.

⁹ Kon taong noginggopat kon pinomarentaan i Hizkia, inta taong noginpitu kon pinomarentaan i Datu Hosea kon Israel, ki Salmaneser datu in Asyur in nonubu kon Israel bo nongopung kon Samaria.

¹⁰ Naonda in kinopung toḷu notaong in koonggotnea, noḷabú in Samaria. Tua in nobaḻí kon taong noginggonom kon pinomarentaan i Hizkia, bo taong noginsiow kon pinomarentaan i Hosea.

¹¹ Onda intua datu in Asyur nodia kon intau mita in Israel nobaḻí intau mita inta sinokodakop kon parang bo pinobayá in Asyur; tongosilai kon i monia tua in pinopoutun kon kotá in Halah, tongosilai in kon diug in Ongkag in Habor kon butá in Gozan, bo tongosilai doman in kon kotá mita in butá in Madai.

¹² Samaria in noḷabú popisí in intau Israel diá motoindudui kon i Tuhan, Allah monia. Mosia in noḻiong kon dodandian inta pinomia i Tuhan takin i monia, bo mosia in iḻimimpat kon bayongan in parenta i Musa, mogogundoi-Nea. Mosia in doíbí mokidongog bo doí doman dumudui.

Intau in Asyur nopogogondok kon Yerusalem

¹³ Kon taong impuḷú bo opat kon pinomarentaan i Hizkia datu in Yohuda, kotá mita in Yohuda inta oyúon in poḷoḷukadan in sinubu bo sinaḷow i Sanherib, datu in Asyur.

¹⁴ Dá kon i Sanherib inta kon Lakhis, pinoki diaan i Hizkia in habar nanaa, “Akuoi naa in noitaḷádon. Tuamai, poigumonku in mogogaidon in ki Tuang monubu kon inami. Bayongan inta poigumon i Tuang in daitonkubí ogoi.” Sanherib in notubag kon ki Hizkia in musti mokidia kon inia in 10.000 nokilo in saḷaka, bo 1.000 nokilo in buḷawan.

¹⁵ Tuamai, bayongan in saḷaka kon Baḷoi i Tuhan bo kon bonu in kas in komaḻig pinoki atod i Hizkia kon Sanherib.

¹⁶ Buḷawan kon ngara mita in Baḷoi Tuhan bo inta ain pinoḷutud i Hizkia tontaní kon ngara mita in ḷoḻingkop, in ginamánea poḷat pinoki atodnea doman kon i Sanherib.

¹⁷ Táe datu in Asyur tatua in nopotabádon mangoi nongkon Lakhis in tontara inta mobarong sin monubu kon Yerusalem. Tontara mita tatua in dinia in toḷu in porwira moḷantud, tobatú in tongguḷu totok in tontara, tobatú in mopoposadia in oinumon, bo tobatú in moḷoḷukad kon i datu. Naonda in noiyaput kon kotá tatua mosia in nogamá kon tampat kon gobá, inta sinangoian Gobá in Penatu kon diug in got inta ḷuaian in tubig nongkon tabang kon ḻimonikan.

¹⁸ Bo nomaḷú in mosia nogoiní kon i Datu Hizkia. Dá pogawai i Hizkia taya toḷu in iḻumuai nokipodungkuḷ kon i monia. Pogawai taya toḷu tatua in ki Elyakim adí i Hilkia tongguḷu in motoḷuadí kon komaḻig, ki Sebna momomais in negara, bo ki Yoah ki adí i Asap momomais in komaḻig.

¹⁹ Porwira tobatú in Asyur tatua in noguman kon i monia, “Poyaputdon kon i Hizkia in tosingogon i datu Asyur tanaa: ‘Nongonu sin iko in tumangoibí moropot?

²⁰ Kainimu kamai dá tosingogon in motaaubí monombaḷui kon siasat bo ropot in tontara? Ki ine in pongatamu, modapot in mokobaḻíbí in iko moḷawang kon Asyur?

²¹ Totuubí kon iko nion in mogoḷatbí mako kon totuḷung in Mesir, táe tua in notongkaibí in ná noponungkud in pangkoi in padang; dika-dika moputoḷ in tungkud tatua bo moiturak in ḻimamu. Natuata in dodia in datu in Mesir kon bayongan intau inta mogoḷat mako kon totuḷungnea.’ ”

²² Noiduduimai kon tua porwira in Asyur tatua in noguman, “Andeka degá moiko in mosingog kon moiko in moharap mako kon i Tuhan, Allahmu? Kon dodai in ki Hizkia nomarenta kon bá intau in Yohuda bo Yerusalem in tongá bidon moibada kon tayowon in mezbah kon Yerusalem, yo inta iyompatnea tua in mezbah bo tampat mita posumbaan kon i Tuhan tontaní.

²³ Tanaa in podoyon kon tangoi i datu in Asyur mokobaḻíbí in akuoi monantú kon aka ogoiandon in moiko in 2.000 in kabaḷo, yo notantú bidon kon diádon tugat in intau monimu in tumakoi kon kabaḷo natua in kobayongnea!

²⁴ Umpaka tongá monayow kon porwira nami inta totokkabí in moompá, yo moiko nion in diá bidon in mangaḻenea. Táe moiko in mogoḷatpa doman mako kon Mesir in mokidia mangoi in totuḷung kereta in parang bo tontara inta tumakoi kon kabaḷo!

²⁵ Kai monimu kamai kami naa in monubu bo monaḷow kon butámu in diábí in totuḷung i Tuhan? Ki Tuhanbí tontaní in nopotabá kon inami monubu bo morimumud kon tua!”

²⁶ Bo ki Elyakim, ki Sebna, bo ki Yoah in noguman kon porwira tatua, “Tuang, tumonsingogdon in Aram aka moyosingog nami, komangaḻeanbí nami. Dika momaké in tosingogon in Ibrani, sin komangaḻeandon in rayat inta kon tudu in dinding kotá tatua.”

²⁷ Tubag in porwira tatua, “Eta tongá kon i monimu bo kon i datumu in pinopotabáan kon inakó i datu in Asyur kon mopotaau in bayongan in tanaa? Diá! Akuoi in moyosingog takin rayat inta iḻimitú kon dinding tatua, inta moyotakin monimu mokaan kon taainea tontaní bo monginum kon tapangnea tontaní.”

²⁸ Onda intua porwira tatua in sinimindog bo nomaḷú nomaké in tosingogon in Ibrani, “Indongogaidon onu inta pinoguman i datu in Asyur:

²⁹ ‘Dika moibog akaḷan i Hizkia; diábí in sia mokoposaḷamat kon i monimu.

³⁰ Dika mokidongog kon dondouḷugnea kon mogoḷat kon i Tuhan. Dikabí morai kon ki Tuhan in moposaḷamat kon i monimu andeka mogimaḷow kon tontara in Asyur in mogagow kon kotámu.

³¹ Dika indongogan in ki Hizkia. Akuoi, datu in Asyur in moguman kon i monimu sinbá ḷumuai nongkon kotá bo tumungkudon. Bá moiko in motaaudon mokaan kon bungai in anggur nongkon gobámu tontaní, bo mokaan kon bungai in ara nongkon pangkoi in aramu tontaní, poḷat monginum kon tubig nongkon parigímu tontaní,

³² moidapot in moiko pampingonku kon butá tobatú inta notongkai in butámu tontaní. Kon tua in oyúon in gobá in anggur inta mopomungai in anggur kon inimu, bo gobá in gandum inta mobogoi in topong sin kaanonmu. Kon butá tatua in mobayong in pangkoi in zaitun, ḷana in zaitun bo biluk. Aka moiko in dumudui kon onu inta pinogumanku tanaa kon inimu, yo mobiagbí in moiko, diábí matoi. Dika indongogan in ki Hizkia! Tongábí in sia monguboḷ kon i monimu takin moguman kon ki Tuhan in moposaḷamatbí kon i monimu.

³³ Nokoimontandon degá in dewa in bangusa ibanea in nokosaḷamat kon butánea nongkon kawasaku?

³⁴ Kon onda degá in dewa mita in butá in Hamat bo Arpad? Kon onda degá in dewa mita in Separwaim, Hena, bo Iwa? Oyúon degá in namangoi noposaḷamat kon Samaria?

³⁵ Dewa táonda degá inta nokoimontandon nopoḷuat kon butánea nongkon kawasaku? Mokoposaḷamat degá in ki Tuhan kon Yerusalem?’ ”

³⁶ Nokodongogmai kon tua, intau mita in Yerusalem diábí notubag, sin ki Datu Hizkia in nogumandon kon i monia kon kibio-biómaidon.

³⁷ Dá ki Elyakim, ki Sebna, bo ki Yoah in nomerak kon ḷambung monia nobaḻí tomponuot kon morobonoḷ in dodob monia, bo minayá nopotaau intua kon i datu in onu inta ain siningog in porwira in Asyur tatua.