DATU MITA 2 16 - Alkitab Singog In Mongondow Masa In Tanaa

Ki Ahas datu in Yohuda

¹ Kon taong impuḷú bo pitu kon pinomarentaan i Datu Pekah adí i Remalya kon Israel, ki Ahas ki adí i Yotam in nobaḻí datu in Yohuda.

² Kon dodai intua umurnea in 20 notaong, bo nomarenta in sia kon Yerusalem 16 notaong in koonggotnea. Diábí in sia dinumudui kon dodia mopia i Datu Daud, mogoguyangnea, táe nomiabí kon inta kinoyaat in gina i Tuhan, Allahnea.

³ Nobiag in sia naonda bo datu mita in Israel, noidapot in noposumba in adínea ḷoḷaki tontaní nobaḻí kuruban kon dewa, podudui in kabiasaan moraat in intau mita inta ain pinoguntun i Tuhan nongkon butá in Kanaan kon tungkuḷ in intau in Israel sinumuot kon butá tatua.

⁴ Ki Ahas in noposumba in kuruban bo notubá kon dupa kon tampat mita pososumbaan kon dewa kon buḷud mita bo kon siungon in kayu mita nobambar.

^5-6 Kon tungkuḷ intua datu in Edom in nongawasa bui kon kotá in Elat bo nopoguntun kon intau mita in Yohuda inta nogutun kon tua. Intau in Edom noiduduimai kon tua in namangoi bo nogutun notantú kon kotá tatua dapot in singgai naa. Kon tungkuḷ doman intua ki Rezin datu in Siria bo ki Pekah datu in Israel nonubu bo nongopung kon Yerusalem, táe diá nokotaḷow kon i Ahas.

⁷ Ki Ahas in nopotabá in totabá minayá kon i Tiglat-Pileser datu in Asyur takin koyow tanaa, “Akuoi in bobantungmu inta mosatia, tuamai, poigumonku angoidon bo posaḻamatdon in akuoi nongkon i datu in Siria bo datu in Israel inta koyogot in monubu kon inakó.”

⁸ Ki Ahas in nogamá doman kon buḷawan bo saḷaka nongkon Baḷoi Tuhan, takin kapunyaan in komaḻig, bo pinoki dia nobaḻí tombuinag kon i datu in Asyur tatua.

⁹ Ki Datu Tiglat-Pileser in notubag kon oigum i Ahas, bo nonubu poḷat nogagow kon Damsyik. Intau mita inta nogutun kon tua in dinianea nobaḻí intau mita inta sinoko dakop bo dinia pinobayá in Kir, bo datunea, inta ki Datu Rezin, in iḻimodnea.

¹⁰ Naonda in ki Datu Ahas minayá in Damsyik sin mokipodungkuḷ kon i Datu Tiglat-Pileser, nokoontong in sia kon mezbah kon kotá tatua. Bo nokidia in sia kon i imang Uria kon Yerusalem sonto in mezbah tatua takin ukurannea inta noitombubung komintan.

¹¹ Dá ki Uria in noposindogdon in mezbah tobatú pinodudui kon sonto bo ukuran inta sinarimanea tatua, bo iniḷapatan kon dodai in diápa nobui in ki Ahas.

¹² Noiyaputmai nongkon Damsyik, ki Ahas in nokoontong kon mezbah tatua in noḷapatdon.

¹³ Bo kon tudu in mezbah tatua noposumba in sia in kuruban biag bo kuruban gandum. Nopobutak doman in sia in kuruban anggur bo dugú in kuruban dodamean kon tudu in mezbah tatua.

¹⁴ Ki Ahas in nokoontong kon mezbah bitú inta pinotondí kon i Tuhan noiukat kon sigad in Baḷoi Tuhan bo mezbahnea inta nobagu. Tuamai in mezbah bitú tatua in pinampingnea nongkon muna in Baḷoi Tuhan pinobayá in dotá in utuan in mezbahnea inta nobagu tatua.

¹⁵ Nopaḷut mako kon tua noguman in sia kon i Uria, “Pakédon in mezbahku inta moḷoben tanaa sin potubaan kon kuruban inta ogoi in rayat, bo pobutakdon doman kon tua in kuruban anggur inta ogoi in rayat. Pobutak domandon kon tudu in mezbah tatua in dugú in bayongan biag inta pinosumba. Bo mezbah bitú inta koyongan tatua in pomayádon mako bá akuoidon in mopomaké sin mopoigum in topotundú nongkon dimukud mita.”

¹⁶ Ki Uria in nogaid kon onu in pinarenta i datu.

¹⁷ Noiduduimai kon tua ki Ahas in nongokai kon kereta mita bitú inta pinaké kon Baḷoi Tuhan, bo inungkaknea in tampayang mita in kereta mita tatua. Kuyon bitú inta moḷoben inta kon ḻikud in sapi bitú mopuḷú bodoyowá tatua in ginamánea doman bo inukatnea kon tudu in aip nongkon batu.

¹⁸ Bo podondouḷug kon gina i datu in Asyur, ki Ahas in nongokai kon dangkuḷon i datu kon Baḷoi Tuhan, bo noḻingkop kon ngara tumuot inta tongá tuotan i datu.

¹⁹ Ouman ibanea kon i Datu Ahas in pinais kon bonu in buk Ouman in Datu mita in Yohuda.

²⁰ Ki Ahas in minatoi bo iḷobong kon poḷoḷobongan in datu mita kon kotá i Daud. Ki Hizkia ki adínea in nobaḻí datu nonoḻiu kon inia.