DATU MITA 2 14 - Alkitab Singog In Mongondow Masa In Tanaa

Ki Amazia datu in Yohuda

¹ Kon taong nogindua kon pinomarentaan i Yoas adí i Yoahas kon Israel, ki Amazia ki adí i Yoas in nobaḻí datu kon Yohuda.

² Kon dodai intua bagu in sia umur doyowa nopuḷú bo ḻima notaong, bo sia in nomarenta kon Yerusalem doyowa nopuḷú bo siow notaong in koonggotnea. Ki inánea in ki Yoadan nongkon Yerusalem.

³ Ki Amazia in nogaid kon onu inta mokosanang kon gina i Tuhan, táe diábí in sia ná ki Daud, mogoguyangnea. Naonda bo ki amánea,

⁴ diábí doman in sia norumbun kon tampat mita pososumbaan kon dewa, dá rayat in umuranbí doman moposumba in kuruban bo motubá kon dupa kon tua.

⁵ Bo naonda in noropotdon in ḷoḻitúannea saḷaku datu, ki Amazia in nohukum minatoi kon pogawai mita inta noḻimod kon i amánea.

⁶ Táe ki adí mita in pogawai mita tatua in diábí iḻimodnea, sin dinumudui in sia kon parenta i Tuhan kon bonu in Buk i Musa inta noguman nanaa, “Dika mohukum matoi kon guyanga popisí in aid moraat inta pinomia i adí mita monia, bo dika doman mohukum matoi kon adí mita popisí in aid moraat inta pinomia in guyanga monia. Kon batúan in intau in tongábí hukumon popisí in aid moraat inta pinomia monia tontaní.”

⁷ Kon pinoparangan tobatú, ki Amazia in noḻimod kon 10.000 in tontara in Edom kon Ḷopá in Asin, bo nogagow kon kotá in Sela. Kotá tatua in sinangoiannea Yokteel. Dapot in tanaa mako kotá tatua in umuranpabí doman Yokteel in tangoinea.

⁸ Onda intua ki Amazia nopotabá in totabá minayá kon i Yoas datu in Israel sin monontot kon inia moparang.

⁹ Táe ki Datu Yoas in nokidia in tontubag nanaa, “Komintanmai yo bo bonganga kon Buḷud in Libanon in mokidiabí in habar nanaa kon pangkoi in ḷokuyú, ‘Ei pangkoi in ḷokuyú, ogoidon in ki adímu mongodeaga kon i adíku sin baḻíon ki buḷoinea.’ Táe onda intua noitaḻibdon kon tua in biag in kayuon inta noritak kon bo bonganga tatua.

¹⁰ Iko, Amazia, in mododiadon, popisí in iko nokotaḷowdon kon intau in Edom. Yo, degá diápa tugat in kinountunganmu tatua? Mopia-piabí kon pogutundon in iko kon baḷoi! Onubí in mangaḻenea motayak kon masala inta tongá mokopopisí kon koboditoanmu takin rayatmu?”

¹¹ Táe ki Amazia datu in Yohuda in diábí nopandungmai kon tosingogon mita i Yoas datu in Israel. Tuamai, ki Datu Yoas takin intaunea mita in nobuat bo minayá in Bet-Semes kon Yohuda bo noparang takin i Amazia kon tua.

¹² Tontara in Yohuda in sinaḷow bo bayongan in tontaranea noḷagui bo nobui kon baḷoinea-baḷoinea.

¹³ Ki Yoas in nodomok kon i Amazia, bodongka minayá in Yerusalem bo norumbun kon dinding in kotá tatua degá doyowamai nogatut nometer in koḷanggónea, pinangkoi kon Bonawang in Epraim nodapot kon Bonawang kon Sikunea.

¹⁴ Bayongan in buḷawan bo saḷaka takin bayongan in pakakat inta nouḻí kon Baḷoi Tuhan, bo bayongan in kapunyaan in komaḻig, takin in tongonumai in intau inta dinomok in dinia i Yoas kon Samaria.

¹⁵ Ouman ibanea kon i Datu Yoas, noitakin doman in koropotnea noḷawang kon i Amazia datu in Yohuda in pinaisdon kon bonu in buk Ouman Datu mita in Israel.

¹⁶ Ki Yoas in minatoi bo iḷobong kon poḷoḷobongan kon datu mita kon Samaria. Ki Yerobeam II ki adínea in nobaḻí datu nonoḻiu kon inia.

Ki Amazia datu in Yohuda minatoi

¹⁷ Naonda in ki Yoas datu in Israel minatoi, ki Amazia datu in Yohuda in nobiagpa mopuḷú bo ḻima notaong.

^18-21 Kon Yerusalem oyúon in intau mita inta moibog moḻimod kon i Amazia. Tuamai in noḷagui in sia minayá in Lakhis, táe musungnea mita in nomatuk kon inia kon tua bo noḻimod kon inia. Mayatnea in pinodatog kon kabaḷo pinobayá in Yerusalem, bo iḷobong kon poḷoḷobongan kon datu mita kon kotá i Daud. Dá rayat in Yohuda in noduídon kon i Uzia, ki adí ḷoḷaki i Amazia in nobaḻí datu monia. Kon dodai intua ki Uzia in bagupa umur 16 notaong. Ouman ibanea kon i Datu Amazia in pinaisdon kon bonu in buk Ouman in Datu mita in Yohuda.

²² Naonda in minatoi mako in ki amánea, ki Uzia in nogagow bui kon kotá in Elat bo pinosindognea bui.

Ki Yerobeam II datu in Israel

²³ Kon taong impuḷú bo ḻima kon pinomarentaan i Amazia ki adí i Yoas kon Yohuda, ki Yerobeam II ki adí i Yoas in nobaḻí datu in Israel, bo nomarenta in sia kon Samaria 41 notaong in koonggotnea.

²⁴ Binaradosa in sia kon i Tuhan, sin dinumudui kon aid moraat i Datu Yerobeam I inta ain nokopopisí kon intau in Israel nogaid kon dosa.

²⁵ Ki Yerobeam II tanaa inta nogagow bui kon bayongan in butá in israel, nongkon daḷan in Hamat kon utuan noidapot in Laut Mati kon toḷatan. Tua in pinodudui kon dandi i Tuhan, Allah in Israel, inta pinongin in mogogundoi-Nea, ki Nabi Yunus ki adí i Amitai intau in Gat-Heper.

²⁶ Inontong i Tuhan kon totuudon mororiga in intau in Israel, bo diá tobatúmai intau in motuḷung kon i monia.

²⁷ Diábí in makusud i Tuhan morimumud kon Israel kinoouput in dunia naa, tuamai in sinuḷungan-Nea in mosia pinongin i Datu Yerobeam II.

²⁸ Ouman ibanea kon i Datu Yerobeam II, inta kobobaraninea kon poparangan mita bo naonda in pinogogagownea bui kon Damsyik bo Hamat nongkon Yohuda bo pinobui kon Israel, tua komintan in pinais kon bonu in buk Ouman in Datu mita in Israel.

²⁹ Ki Yerobeam II in minatoi bo iḷobong kon poḷoḷobongan kon datu mita. Ki Zakharia ki adínea ḷoḷaki in nobaḻí datu nonoḻiu kon inia.