DATU MITA 2 13 - Alkitab Singog In Mongondow Masa In Tanaa

Ki Yoahas datu in Israel

¹ Kon taong nogindoyowa nopuḷú bo toḷu kon pinomarentaan i Yoas adí i Ahazia kon Yohuda, ki Yoahas ki adí i Yehu in nobaḻí datu in Israel, bo nomarenta in sia kon Samaria mopuḷú bo pitu notaong in koonggotnea.

² Ná doman ki Datu Yerobeam inta nomarenta noiuna kon inia, ki Yoahas in binaradosa doman kon i Tuhan bo nokopopisí kon intau in Israel binaradosa doman. Diábí kon dodai in onda in sia in nonaḷámai kon oaidnea mita inta moraat.

³ Tuamai in sinumorú in ki Tuhan kon Israel dá pinomayá-Neadon mako in ki Hazael datu in Siria bo ki Benhadad ki adínea in nopobui-buimai nonaḷow kon Israel.

⁴ Bo ki Yoahas in nosambayang kon i Tuhan, bo inindongogan i Tuhan in sambayang tatua, sin ki Tuhan in nokoontong kon moromúdon totok in pinonondorot i datu in Siria kon intau in Israel.

⁵ Ki Tuhan in nobogoi in itoi tobatú kon Israel inta moḷuat kon i monia nongkon kawasa in Siria dá mosia in mobiag motompiadon bui ná dungkuḷmai.

⁶ Umpaka natua táe intau in Israel in diábí doman nogogai in mogaid kon dosa mita inta pinangkoi i Datu Yerobeam. Mosia in umuranbí mogaid kon dosa mita tatua, bo mopomayádon mako kon patong i Dewi Asyera umuran kon Samaria.

⁷ Tontara mita in Israel aindon iyopú i datu in Siria dá ki Datu Yoahas in dongkadon kotontara 50 inta tumotakoi kon kabaḷo, 10 in kereta in parang, bo 10.000 in tontara.

⁸ Ouman ibanea soaḷ ki Datu Yoahas bo bayongan inta pinomianea in pinais kon bonu in buk Ouman in Datu mita in Israel.

⁹ Minatoi in sia bo iḷobong kon Samaria. Ki Yoas ki adínea in nobaḻí datu nonoḻiu kon inia.

Ki Yoas datu in Israel

¹⁰ Kon taong nogintoḷu nopuḷú bo pitu kon pinomarentaan i Datu Yoas kon Yohuda, ki Yoas adí i Yoahas in nobaḻí datu in Israel bo nomarenta kon Samaria mopuḷú bo onom notaong in koonggotnea.

¹¹ Sia in binaradosa doman kon i Tuhan sin dinumudui kon raat i Datu Yerobeam inta ain nokopopisí kon intau in Israel nomia kon dosa.

¹² Ouman ibanea soaḷ ki Datu Yoas, noitakin doman in pononongganutnea kon pinoparangan nonayow kon i Amazia datu in Yohuda, pinais kon bonu in buk Ouman in Datu mita in Israel.

¹³ Ki Yoas in minatoi bo iḷobong kon poḷoḷobongan kon datu mita kon Samaria. Ki Yerobeam II ki adínea in nobaḻí datu nonoḻiu kon inia.

Ki Elisa minatoi

¹⁴ Kon singgai tobatú ki Nabi Elisa in notakit moyoyiga, bo ki Datu Yoas in namangoi noindoi kon inia. Naonda in inontongnea kon ki Elisa in motoyongdon matoi, ki datu tatua in nongombaḷ bo noguman, “Amáku, Amáku, inta mototuḷung moḷoben in Israel!”

¹⁵ “Gamádon in puḷu in piot bo piotnea!” guman i Elisa kon inia. Ginamá doman i Yoas,

¹⁶ bo ki Elisa in nopotabádon kon inia mosadia momiot. Dá nosadia domandon in ki datu, bo inukat i Elisa in ḻimanea kon tudu in ḻima i datu.

¹⁷ Onda intua pinodudui kon parenta i nabi tatua, ki datu in nomukat kon jandela inta noitayow kon Siria. “Popopiotdon in piotmu!” guman i Elisa. Dá naonda in pinopopiotdon i datu in piot tatua, ki nabi tatua in nomaḷú, “Ikobí nion in piot i Tuhan. Takin piot tatua ki Tuhan in monaḷowbí kon Siria. Iko in moparang monayow kon intau in Siria kon Apek moidapot in taḷowonmu in mosia.”

¹⁸ Pinotabá i Elisa in ki Datu Yoas mogamá kon piotnea mita ibanea bo pinododot kon butá. Ki datu in nondodot doman kon butá kotoḷu, bodongka nogogai.

¹⁹ Sinumorú in ki Elisa bo noguman, “Sabanarnea iko in mondodotbí moidapot in koḻima andeka koonom, dá korimumudanmudon in bangusa in Siria. Táe tanaa iko in monaḷowbí kon inia tongá moidapot in kotoḷu.”

²⁰ Diá noonggot kon tua minatoidon in ki Elisa bo iḷobong. Kon dodai intua banselang mita in Moab biasamai in monubu kon butá in Israel komintan in totaong.

²¹ Kon singgai tobatú kon dodai in tongonumai in intau moḷobongmai kon intau minatoi, daḻídon in mosia nokoontong kon banselang in Moab namangoi. Baḷúdon in mosia nopogambat mako naníon in mayat tatua kon bonu in pinoḷobongan kon i Elisa bo noḷagui. Naonda in mayat tatua noiḻiai kon tuḷan i Elisa, mayat tatua in nobiag bui bo sinimindog.

Parang kon sigad in Israel bo Siria

²² Kinoouput in pinomarentaan i Yoas, ki Hazael datu in Siria umuranbí nondorot kon intau in Israel.

²³ Táe notabi in ki Tuhan kon umat-Nea bo inampungan-Nea in mosia. Doíbí in Sia mopomayá mako yopúon táe sinuḷungan-Neabí in mosia, sin monorop kon dodandian-Nea takin i Abraham, i Ishak bo i Yakub. Dapot in tanaa diábí kon dodai in onda in koḻiongan-Nea in umat-Nea.

²⁴ Onda intua ki Hazael datu in Siria minatoi, bo ki Benhadad adínea in nobaḻí datu.

²⁵ Bo ki Yoas datu in Israel nonaḷow kon i Benhadad kotoḷu bo nogamá bui kon kotá mita inta ain inagow i Benhadad kon dodai in pinomarentaan i Datu Yoahas ki amá i Yoas.