DATU MITA 2 12 - Alkitab Singog In Mongondow Masa In Tanaa

Ki Yoas datu in Yohuda

¹ Kon taong noginpitu kon pinomarentaan i Yehu kon Israel, Ki Yoas in nobaḻí datu kon Yohuda. Sia in nomarenta kon Yerusalem 40 notaong in koonggotnea. Ki inánea in ki Zibya nongkon kotá in Bersyeba.

² Kon bonu in totundú i Imang Yoyada, ki Yoas in umuranbí nogaid kon onu inta mokosanang kon gina i Tuhan kinoouputbí in kinobiagan.

³ Tongá nokomanasaḷan, tampat pososumbaan kon dewa mita diá sinokorumbunnea, dá rayat in umuranbí moposumba in kuruban bo motubá kon kamania kon tua.

⁴ Kon singgai tobatú ki Yoas nogoiní kon imang mita bo pinoki tagúannea in doit inta nouḻí nongkon sosumba mita kon Baḷoi Tuhan, pinomayá doit inta pinoguboḻi kon pinopobogoian in kuruban, andeka doit inta sinantúbí inogoi takin ibog tontaní.

⁵ Kon batúan in imang musti monotaau kon doit inta pinosumba in bayongan in umat. Doit tatua in pakéon ponompia kon onu inta nogoguyaat kon Baḷoi Tuhan.

⁶ Noidapot kon taong nogindoyowa nopuḷú bo toḷu kon pinomarentaan i Yoas, imang mita in diápabí doman nonompia kon onu inta nogoguyaat kon Baḷoi Tuhan.

⁷ Tuamai nogoiní in ki Yoas kon i Imang Yoyada takin imang mita ibanea, bo noguman, “Nongonu sin diápabí doman in moiko nonompia kon Baḷoi Tuhan? Pinangkoi kon singgai in naa diádon motaau in moiko mokadai kon doit inta sinarima monimu. Mustidon ogoi monimu komintan intua sin pakéon ponompia kon Baḷoi Tuhan.”

⁸ Noibog in imang mita kon diádon mosipun kon doit nongkon rayat, bo diá domandon umuran moḷukad kon ponompiaan kon Baḷoi Tuhan.

⁹ Dá nogamá ki Yoyada kon kas tobatú bo binubuan kon taḷobnea bodongka inukat kon diug in mezbah kon dotá in koḷanan ngara in Baḷoi Tuhan. Bayongan in doit inta pinosumba kon Baḷoi Tuhan in bonuon kon kas tatua in imang mita inta nopobayá in oaidan monia kon ngara tuotan.

¹⁰ Pomuḷoi in aka doit kon bonu in kas tatua mobayongdon, momomais i datu takin Imang Moḷoben mamangoi bo mogiap kon doit tatua, bodongka bakuton.

¹¹ Naonda in paison mako in kobayongnea, doit tatua in ogoi kon intau mita moḷoḷukad kon pogaidan kon ponompiaan kon Baḷoi Tuhan. Moiduduimai kon tua intau mita inta moḷoḷukad kon oaidan tatua in moguboḻi kon pogaidan in intau mita inta monompiamai kon Baḷoi Tuhan tatua,

¹² intau mita inta mopoyoguntuḷ in batu takin mongongurig. Moḷoḷukad doman mita in motaḷui kon kayu bo batu, bo poḷat monoḻisí kon bayongan inta pinaké kon ponompiaan tatua.

¹³ Táe doit tatua in diábí in topiḻikmai in pakéon kon pomiaan kon pongonginuman inta nongkon saḷaka, palo, torompet, pakakat mita in togá andeka pakakat mita ibanea nongkon buḷawan andeka saḷaka.

¹⁴ Bayongan tua uboḻian kon mogogaid mita bo potaḷui kon pakakat mita in bangunan inta paraḷu pakéon.

¹⁵ Moḷoḷukad mita kon oaidan tatua in mongotuḻidbí mita totok in gina dá diá bidon paraḷu poiguman kon lapuran soaḷ in doit.

¹⁶ Doit inta nongkon kuruban toḻiu in karugian bo nongkon kuruban pongampungan kon dosa diábí bonuon kon kas tatua. Doit tatua in ogoi kon imang mita.

¹⁷ Kon dodai intua ki Hazael datu in Siria nonubu bo iḻitúannea in kotá in Gat. Bo moniatdon in sia monubu kon Yerusalem doman.

¹⁸ Dá ki Yoas in nokidia in doit potobut kon inia. Doit tatua in nouḻínea nongkon bayongan in sosumba inta koḻipod ain inogoi i Yoas tontaní kon i Tuhan bo i Yosapat, i Yoram bo i Ahazia, datu mita inta nomarenta noiuna kon inia. Bo nongkon bayongan doman buḷawan kon bonu in kas in Baḷoi Tuhan bo komaḻig in datu. Dá diá notuoi nonubu in ki Hazael kon Yerusalem.

^19-21 Onda intua pogawai mita in komaḻig in Yohuda noyosingog moḷawang kon i Datu Yoas. Doyowa in intau kon sigad monia tua, inta ki Yozakar adí i Simeat, bo ki Yozabad adí i Somer, noḻimod kon i Yoas kon baḷoi tobatú inta pinosindog kon tudu in butá inta binonturung kon dotá in pomukaan kon Yerusalem, bo daḷan mosiḻig kon Sila. Ki Yoas in iḷobong kon poḷoḷobongan kon datu mita kon kotá i Daud. Ki Amazia ki adínea in nobaḻí datu nomaḷui kon inia. Ouman ibanea soaḷ ki Datu Yoas in pinais kon bonu in buk Ouman in Datu mita in Yohuda.