DATU MITA 2 10 - Alkitab Singog In Mongondow Masa In Tanaa

Buí i Ahab iḻimod

¹ Ki Datu Ahab in kogadí bo kogompu pitu nopuḷú in kon kotá in Samaria. Tuamai in ki Yehu nokidia in surat kon Samaria, kon intau mita inta nonompia kon i adí bo ompu i Ahab bo kon pongawasa mita takin guhanga mita in ḻipú kon kotá tatua. Nanaa in bonu in surat,

² “Ki adí bo ki ompu i Ahab kon bonu in ḻima monimu, bo kon i monimu in oyúon kereta in parang, kabaḷo bo pakakat in parang bo kotá inta oyúon in poḷoḷukadan. Tuamai, koḷamemetdon naonda in moiko motarima kon surat tanaa,

³ piḻídon inta totok in mopia kon sigad in adí bo ompu i Ahab tatua bo duídon in sia mobaḻí datu, bo poḷongasidon motuḷung kon inia.”

⁴ Pongawasa mita in Samaria inagían in ondok. Mosia in noguman, “Ki Datu Yoram bo ki Datu Ahazia in diábí doman nokotaḷow kon i Yehu, apa doman kita!”

⁵ Tuamai in tongguḷu in komaḻig bo walikota takin guhanga mita in ḻipú bo intau mita inta noḷukad kon i adí bo ompu i Ahab tua in nokidia in habar nanaa kon i Yehu, “Kami in motoguondokbí kon i Tuang bo mosadiabí in kami mogaid kon onuka in pokiaid i Tuang kon i nami. Diábí in kami moduí kon i ineka sin mobaḻí datu. Aidaidon onu in mopia kon mata i Tuang.”

⁶ Bo ki Yehu in bui nokidia in surat kon i monia, nanaa in bonunea, “Aka moiko moibog kon inakó, bo mosadia doman dumudui kon bayongan in parentaku, yo ḻimodon in ki adí bo ki ompu i Ahab tua, bo ikoḷom kon oras doman nanaa diádon mangoi in uḷu mita monia kon inakó kon Yizreel.” Ki adí bo ki ompu i Datu Ahab inta pitu nopuḷú tua in nogutun kon guhanga mita in ḻipú kon kotá in Samaria, bo sinompiamai monia.

⁷ Naonda in notarima kon surat i Yehu, guhanga mita in ḻipú in kotá in Samaria tatua noḻimod kon i adí bo ompu i Ahab inta pitu nopuḷú tatua bo uḷu mita monia in binonu kon karansi bo pinoki dia kon i Yehu inta kon Yizreel.

⁸ Naonda in pinotaau kon i Yehu intua, pinarentanea sinbá uḷu mita tatua in poyoguntuḷon mobaḻí doyowa noguntuḷ kon bonawang in kotá, bo pobiódon mako kon tua modapot in mobangon monik.

⁹ Doḷo-doḷom iḷumuaidon in ki Yehu kon bonawang, bo noguman kon intau mita inta noyosipun kon tua, “Akuoi naa inta noyopopog noḷawang kon i Datu Yoram bo noḻimod kon inia; diábí in taḷá monimu kon tua. Táe intau mita tanaa in deemanbí akuoi in noḻimod.

¹⁰ Naadon in buktinea kon bayongan inta siningog i Tuhan soaḷ adí bo ompu i Ahab in mobaḻíbí. Ki Tuhan in nogaidon kon bayongan inta pinoguman-Nea pinongin i Elia mogogundoi-Nea.”

¹¹ Onda intua ki Yehu in noḻimod kon bayongan in ginaḷum i Ahab ibanea inta nogutun kon Yizreel, bo bayongan in pogawai, yobayat mita inta modagin bo imangnea mita; diábí in tobatúmai in binió mako nobiag.

Ginaḷum motoḷuadí i Datu Ahazia iḻimod

¹² Ki Yehu in nonaḷámaidon kon Yizreel bo minayá in Samaria. Kon yuak in daḷan, kon tampat inta sinangoian “Ḻipú in Gombala”.

¹³ noyodungkuḷ in sia in tongonumai in ginaḷum motoḷuadí i Ahazia datu in Yohuda. Sia in noḻibó, “Ki ine in moiko?” “Kami naa in ginaḷum motoḷuadí i Ahazia,” tubag monia. “Kami in mayá in Yizreel sin mokipodungkuḷ kon bayongan in motoḷuadí i datu takin adí bo ompu i Bokí Izebel.”

¹⁴ “Domok in mosia kobia-biag!” parenta i Yehu kon intaunea mita. Dá dinomokdon in intau mita tatua, bo iḻimod kon diug in parigí inta noingkag, kobayong monia tua in opat nopuḷú bo doyowa. Diábí tobatúmai in binió mako nobiag.

Bayongan in ginaḷum motoḷuadí i Ahab iḻimod

¹⁵ Ki Yehu in nongingguputdon kon bobayáannea. Kon yuak in daḷan, sinontomu in sia i Yonadab ki adí i Rekhab. Ki Yehu in nobogoi in nohoromat kon inia bo noguman, “Notongkaibí degá in gina naton? Moibog degá in iko motongod kon inakó?” “Oo,” tubag i Yonadab. “Aka natua, modatipa in kita,” tubag i Yehu. Nododatian in mosia, bo sinuḷungan i Yehu in ki Yonadab sinumakoi kon keretanea,

¹⁶ poḷat noguman, “Koḻigai dudui bo indoiai tontaní naonda in akuoi dumudui kon onu inta pinoguman i Tuhan.” Bo noyotakindon in mosia sinumakoi kon kereta minayá in Samaria.

¹⁷ Noiyaputmai intua ki Yehu in noḻimod kon bayongan in ginaḷum motoḷuadí i Ahab, diábí tobatúmai in sinaḻiban. Tua in nobaḻí pinodudui kon onu inta pinoguman i Tuhan kon i Elia.

Mososumba mita kon Baal iḻimod

¹⁸ Pinotabádon i Yehu nosipun in bayongan intau inta nogutun kon Samaria bo noguman in sia, “Ki Datu Ahab in diá totok motoindudui in mogundoi kon i Baal; akuoibí in motoi-toindudui in sia.

¹⁹ Tuamai in sipundon in bayongan in nabi Baal bo bayongan in intau inta mosumbamai kon i Baal takin imangnea mita; dikabí in taḻiban. Mobogoi in akuoi in sosumba moḷoben kon i Baal. Ki ine in diá momangoi yo hukumon matoi.” Táe tua in tongábí akaḷ i Yehu sinbá mokoḻimod kon bayongan in mososumba kon Baal.

²⁰ Ki Yehu in nomarenta nanaa: “Tantúdon in singgai tobatú sin posumbaan kon i Baal!” Dá sinantúdon in intau in singgai tatua

²¹ bo pinotaaudon i Yehu kon bayongan in Israel. Kon singgai tatua namangoidon in bayongan mososumba kon i Baal, diábí tobatúmai in kinotaḻiban. Sinumuot in mosia kon kuil i Baal bo nopuḻing in bangunan tatua nongkon muna dapot in tumi.

²² Ki Yehu in nomarenta kon intau inta monoḻisímai kon ḷambung mita in ibada kon kuil tatua sinbá mobogoidon in ḷambung mita tatua kon intau mita inta mamangoi moibada kon i Baal. Naonda in inaidan in parenta tatua,

²³ sinumuot in ki Yehu kon kuil tatua noyotakin i Yonadab ki adí i Rekhab, bo noguman kon intau mita kon tua, “Taridiaidon komintan mongo bayongan inta namangoi naa in tongábí mososumba kon i Baal. Dikabí modapot in kokadapatan kon naa in intau inta mosumba kon i Tuhan.”

²⁴ Bo ki Yehu takin ki Yonadab noposumba in kuruban kon i Baal. Kon ḷuai in bangunan, ki Yehu in nokiḷukadon kon 80 in intau moḷoḷukad bo porwira mita. Bo sia in nobogoi domandon in parenta tanaa kon i monia, “Mustibí in moiko moḻimod kon bayongan in intau tatua. Ki ine in mopomayá mako kon tobatúmai in kon sigad monia tua in moḷagui, yo ḻimodonbí!”

²⁵ Bo naonda in ki Yehu nopaḷut noposumba in kuruban tatua, iḻumuai in sia bo noguman kon pongawal mita bo porwira mita tatua, “Tuotdon bo ḻimod komintan in mosia. Dikabí pomayá mako in tobatúmai mokoḷagui!” Dá sinumuotdon in mosia takin kokada-kadai in kedang inta irabutdon kon gumánea bo noḻimod kon bayongan in intau kon tua, bodongka pinogambat monia kon ḷuai in mayat mita tatua. Onda intua sinumuot in mosia kon bonu totok in kuil,

²⁶ bo nopoḷuai in patong in Baal bo sinubá in patong tatua.

²⁷ Patong tatua in irimumud takin baḷoinea bo tampat tatua in binaḻídon poḷoḷumbúan kon tubig dapot in singgai naa.

²⁸ Natuata in pinonondarit i Yehu kon pososumbaan kon Baal kon Israel.

^29-31 Tuamai in ki Tuhan noguman kon i Yehu, “Bayongan inta pinarentaku kon inimu inta aidanmu kon buí i Ahab aindon inaidanmu. Tuamai in modandi in Akuoi kon adí bo ompumu modapot in buímu inggopatnea in mobaḻíbí datu kon Israel.” Táe diá noḻimbatú in gina i Yehu in dinumudui kon hukum i Tuhan, Allah in Israel. Dinumuduibí in sia kon aid i Yerobeam inta nokopopisí kon intau in Israel binaradosa pinongin nosumba kon sapi buḷawan inta pinosindognea kon Betel bo kon Dan.

Ki Yehu minatoi

³² Kon tungkuḷ intua ki Tuhan momangkoidon mogin intok kon butá kawasa in Israel. Ki Hazael datu in Siria in nogagow kon bayongan in butá in Israel

³³ kon dotá in pomukaan kon Ongkag in Yordan noidapot in toḷatan nopobayá ná kotá Aroër kon diug in Ongkag in Arnon, noituot doman in butá in Gilead bo Basan, tampat pinogutunan in suku Gad, Ruben bo Manasye dotá in pomukaan.

³⁴ Ouman ibanea soaḷ ki Yehu, noitakin doman in kobobaraninea, pinais kon bonu in buk Ouman in Datu mita in Israel.

^35-36 Ki Yehu in nomarenta nobaḻí datu in Israel 28 notaong in koonggotnea. Minatoi in sia bo iḷobong kon Samaria. Bo ki Yoahas ki adínea in nobaḻí datu nonoḻiu kon inia.