DATU MITA 2 1 - Alkitab Singog In Mongondow Masa In Tanaa

Ki Elia bo ki Datu Ahazia

¹ Naonda in minatoi mako in ki Ahab datu in Israel, intau mita in Moab in nomarontak kon Israel.

² Kon singgai tobatú ki Datu Ahazia nongkon Israel noḷabú nongkon dangkuḷon kon ḷundukan in komaḻignea kon Samaria, nodapot in sia kinekeban nodaḷom. Dá nopotabá in sia in intau sin moḻibó kon i Baal-Zebub, dewa in kotá in Ekron kon Pilistin, degá mopiapa in sia mongo diádon.

³ Táe malaekat i Tuhan in nopotabá kon i Elia, nabi nongkon Tisbe, minayá nokipodungkuḷ kon totabá mita i Datu Ahazia tatua sin moguman, “Eta degá kon Israel in diá in Allah modapot in moiko mayá mopoigum in totundú kon i Baal-Zebub, dewa in kotá in Ekron tatua?

⁴ Potaau kon i datu kon ki Tuhan in noguman nanaa, ‘Iko in diábí mopia, matoibí in iko!’ ” Naonda in inaidan mako i Elia in parenta i Tuhan tatua,

⁵ nobuidon in totabá mita tatua kon i datu, bo ki datu in noḻibó, “Nongonu sin nobui in moiko?”

⁶ Mosia in notubag, “Ḷoḷaki tobatú in namangoi nokipodungkuḷ kon inami, bo nopotabá kon inami nobui sin mopotaau kon i Tuang Datu nanaa, ‘Eta degá diá in kon Israel in Allah, nodapot in iko mopotabá mopoigum in totundú kon i Baal-Zebub, dewa in kotá in Ekron? Iko in diábí mopia, matoibí in iko!’ ”

⁷ “Naonda in batangan in intau tatua?” iḻibó i datu.

⁸ “Jubah bo bogot in ogotannea in pinomia nongkon kuḻit,” tubag monia. “O, ki Elia intua!” guman i datu.

⁹ Bo pinotabáneadon in porwira tobatú takin ḻima nopuḷú in intaunea sin mayá modomok kon i Elia. Porwira tatua in minayá bo nokotambak kon i Elia ḻimitú mako kon buḷud tobatú. “Ei, mogogundoi i Allah,” guman in porwira tatua, “pinoki siḻigan i datu in iko!”

¹⁰ “Aka akuoi naa totuu mogogundoi i Allah,” tubag i Elia, “yo poigumon mako tuḷú moḷabú nongkon ḷangit bo momokak kon inimu takin intaumu mita!” Kon dodai doman intuata noḷabú in tuḷú bo poḷat nomokak kon porwira tatua takin intaunea ḻima nopuḷú.

¹¹ Bo bui in ki datu nopotabá in porwira tobatú ibanea takin intaunea ḻima nopuḷú doman. Mosia in minayá bo noguman kon i Elia, “Ei, mogogundoi i Allah, pinotabá i datu in iko mosiḻigdon in tanaa!”

¹² “Aka totuu kon akuoi in mogogundoi i Allah,” tubag i Elia, “yo poigumon mako tuḷú in moḷabú nongkon ḷangit bo momokak kon inimu takin bayongan in intaumu!” Kon dodai doman intuata tuḷú i Allah in noḷabú bo nomokak kon porwira tatua takin bayongan in intaunea inta ḻima nopuḷú.

¹³ Komintanpa doman in ki datu in nopotabá kon porwira tobatú takin intaunea ḻima nopuḷú. Porwira tatua in notakod kon buḷud bo naonda in yaputnea kon i Elia sinumungkud in sia bo noguman, “Ampungaidon in kami, uḻe bobantung i Allah! Kotabipa in akuoi bo intauku mita tanaa. Dikabí ḻimodon in kami!

¹⁴ Porwira doyowa ibanea takin intau mita monia in minatoi kinaan in tuḷú nongkon ḷangit, táe akuoi in mopoigum, kotabipa in akuoi!”

¹⁵ Kon dodai doman intua malaekat i Tuhan in noguman kon i Elia, “Dika moondok! Duduidon kon inia mosiḻig kon buḷud tanaa.” Dá tuamai in minayá in ki Elia noyotakin in porwira tatua bo minayá kon i datu.

¹⁶ Bo ki Elia in noguman kon i datu, “Ki Tuhan in noguman, ‘Iko in nopotabá in intau nopoigum in topotundú kon i Baal-Zebub dewa in kotá in Ekron naonda bo kon Israel in diá in Allah inta motaau poḻibóan. Tuamai iko in diábí mopia, iko in matoibí!’ ”

¹⁷ Dá minatoidon in ki Ahazia ná inta pinoguman i Tuhan pinongin i Elia, popisí in ki Ahazia in diá kogadí kon ḷoḷaki, dá ki Yoram ki utatnea in nobaḻí datu nomaḷui kon inia. Tua in nobaḻí kon taong nogindua kon pinomarentaan i Yehoram adí i Yosapat, datu in Yohuda.

¹⁸ Ouman ibanea kon onu inta pinomia i Datu Ahazia in pinais kon bonu in buk Ouman in datu mita in Israel.