DANIEL 7 - Alkitab Singog In Mongondow Masa In Tanaa

KI DANIEL NONGONGUMAN KON OONTONGONNEA MITA 7:1–12:13 Oontongon i Daniel soaḷ mahaḷuk opat

^1-2 Kon doḷom tobatú, kon taong imitánea ki Belsyazar nobaḻí datu kon Babel, akuoi, ki Daniel in sinumogoindop bo nokouḻí kon oontongon. Togoindop tatua in pinaisku bo naa in poyaputku onu inta inontongku: Tompot moropot nogirup nongkon bayongan tampat bo nokopopisí kon nomuká in deḷang kon baḷangon.

³ Onda intua opat in mahaḷuk moḷoben totok in nomuká nongkon bonu in tubig, noyo-noyoposimai kon batúannea.

⁴ Inta muna batangannea in naonda bo singa, táe kokoḻikipan ná koḻikip in ḷagapan garuda. Naonda in inindoianku, daḻídon norabut in koḻikipnea bo noḷabú; noibingkat in sia nongkon butá bo pinosindog kon sioḷ doyowa naonda bo intau, bo inogoian in raian intau.

⁵ Mahaḷuk inta nogindua batangannea in naonda bo beruang. Sia in sinimindog kon sioḷnea tumi, bo notangaḷ kon tuḷan gutuk toḷu. Dinongogku in singog in noguman kon inia, “Yo, kaandon in ponoyá kinooibogmubí!”

⁶ Naonda in sinaridikumangoi, noitukat domandon in mahaḷuk ibanea. Batangannea in naonda bo macan tutul, táe kon ḻikudnea oyúon in koḻikip in ḷagapan bo uḷunea in opat. Koontongan mokobangkaḷ in sia.

⁷ Kon dodai in akuoi inimindoi mako kon inia, mahaḷuk inggopatnea nomuká. Sia in totok in moropot bo motoyang bo mokokoningkim. Takin ingiponnea mita inta mongoḷoben bo ná kotogat in uatoi, sia in nomutuk bo nokaan kon kokaanonnea, bo noritak kon ki agatnea mita. Noyoposi in mahaḷuk mita inta noiuna sia in kotungoi mopuḷú.

⁸ Koyogotpa in akuoi nonaridimai kon tungoinea mita, bo daḻídon in tungoi tobatú ibanea nobiag kon sigadnea. Tungoi tatua nointok, táe nokosisí bo norabut kon toḷu in tungoi inta muna nobiag tatua. Tungoi nointok tatua in oyúon matanea naonda bo mata in intau bo bibig inta nongonguman takin ambungangaḷ bo noḷoḷatú.

Oontongon soaḷ Sia inta mononoi

⁹ Koyogotpa in akuoi nonaridipa mako, tongonumai in tampat pomomarentaan koyogot in inukat. Bo Sia inta mononoi iḻimitú kon tudu in tobatú tampat pomomarentaan mita tatua. Pakeang-Nea bo buok-Nea in nobudó nodarit naonda bo kapot. Tampat pomomarentaan-Nea takin rodanea mita in nodoko-dokot popisí tuḷú iḷumekep,

¹⁰ bo tuḷú ḷumekep nongkon pomomarentaan tatua. Ribuan in intau nogundoi kon i-Nia bo jutaan in intau sinimindog kon tayowon-nea. Onda intua pinangkoidon in sidang pongadilan, bo buk mita in binukádon.

¹¹ Kon dodai in akuoi koyogotpa moindoi mako kon tua, dinongogkupa doman in tungoi nointok tatua nongambungangaḷ takin iḷumoḷatú. Onda intua mahaḷuk inta inggopatnea tatua iḻimod bo awaknea in pinogambat kon bonu in tuḷú nodapot in nopayong.

¹² Mahaḷuk mita ibanea in irabutdon in kawasanea, táe mosia in inogoipabí in nobiag nodapot in wakutu inta ain sinantú.

¹³ Kon bonu in ontongonku doḷom tua, inontongku in oyúon in naonda bo intau. Sia in namangoi takin iḻibu in goḷom bo dinia minayá kon i-Nia inta mononoi.

¹⁴ Sia in inogoian in kahoromatan bo kawasa saḷaku datu, dá bayongan in intau nongkon bayongan in bangusa, inanakan bo singog in nogundoi kon i-Nia. Kawasa-Nea in modapot in mononoi, pomarentaan-Nea in diábí poḷabúon.

Oontongon mita tatua ininsilangan in mangaḻenea

¹⁵ Oontongon mita inta inontongku tatua in mokotoboḻingu bo mokoḻia-ḻiaw kon ginaku.

¹⁶ Bo diniuganku in intau tobatú inta sinimindog kon tua bo pinoigumanku kon insilang kon bayongan intua komintan. Dá pinotaaunea domandon.

¹⁷ Sia in noguman, “Mahaḷuk mongoḷoben totok mita opat tatua in dodatuan opat inta moitukat mangoi kon dunia naa.

¹⁸ Táe umat i Allah Inta Totok in moḷantud in motarimabí kon hak momarenta bo pomarentaannea in modapotbí in mononoi.”

¹⁹ Onda intua ibogonku komangaḻean in mahaḷuk opat inta noyo-noyoposi tua; inta totok in mokokoningkim tua bo inta norimumud bo noḻiom kon kokaanonnea takin konuku bitúnea bo ingipon uatoinea, bo poḷat doman noritak kon ki agatnea mita.

²⁰ Ibogonku in kotaauanku doman in soaḷ tungoi mopuḷú kon uḷunea bo soaḷ tungoi nointok inta nomuká noiduduimai bodongka norabut kon tungoi toḷu inta nobiag muna tua. Tungoi nointok tatua in komata bo bibignea in mongonguman kon ambungangaḷ takin iḷumoḷatú. Sia in mokokoningkim totok noiḻiu kon tungoi mita ibanea tatua.

²¹ Kon dodai in sinaridikumai, tungoi tatua in moparang monayow kon umat i Allah bo nonaḷow kon i monia.

²² Onda intua Sia inta mononoi tatua namangoi bo nobogoi in kaputusan inta nopobanar umat i Allah Inta Totok in moḷantud. Noiyaputdon in wakutunea mosia in motarima kon kawasa sin momarenta.

²³ Naa in insilang inta nouḻíku, “Mahaḷuk inta inggopatnea tatua in dodatuan inta inggopatnea inta simindog kon butá bo noyoposi in dodatuan mita ibanea. Dodatuan tatua in morimumud bo mokaan kon bayongan in dunia naa bo moyuntai kon kiagatnea.

²⁴ Tungoi mopuḷú tatua in datu mopuḷú inta nomarenta kon dodatuan tatua. Onda intua datu tobatú ibanea in moiangoi; sia in moyoposibí totok in datu mita inta muna, bo sia in monaḷowbí kon datu taya toḷu.

²⁵ Sia in mosingogbí monayow kon i Allah Inta Totok in moḷantud bo mondorot kon umat i Allah. Sia in moḷongasibí momaḷui kon hukum mita bo singgai mita moḷoben in agama in umat i Allah, bo mosia in kawasaanneabí kon bonu in toḷu bo tobotak in taong.

²⁶ Bo pongadilan in soroga in mosidang bo morabut kon kawasanea poḷat morimumud kon inia modapot in moinggamá.

²⁷ Kawasa bo koḷoḷoben in bayongan in dodatuan kon dunia in ogoi kon umat i Allah Inta Totok in moḷantud. Kawasa monia momarenta in diábí in imbuitnea bo bayongan in mongongawasa kon dunia naa in mobantungbí kon i monia takin toindudui.”

²⁸ Tuatadon in pinoyaput naa. Moḻia-ḻiaw totok in ginaku dá nobilaidon, táe diábí tobatúmai intau in pinopotaauanku intua komintan.