DANIEL 4 - Alkitab Singog In Mongondow Masa In Tanaa

Togoindop Nebukadnezar induanea

¹ Naadon in palakat i Datu Nebukadnezar inta pinoki dianea kon intau mita nongkon bayongan in bangusa, inanakan bo singog kon sinangkub in dunia: “Salam kobiagan motompia!

² Akuoi in moibog mongonguman kon inta mokoherang bo mujizat inta ain pinomia i Allah Inta Totok in moḷantud kon inakó.

³ Totuu moḷoben in mujizat inta pinomia-Nea! Totuu motoyang in inta mokoherang inta inaidan-Nea! Ki Allah in mobaḻíbí datu modapot in mononoi. Sia in mongawasa modapot in kopaḷutannea.”

⁴ Akuoi in nogutun bo nobiag takin notompia kon bonu in komaḻigku bo nobiag nooyúon totok.

⁵ Táe kon doḷom tobatú kon tungkuḷ in akuoi nosiugpa sinumogoindop in akuoi bo nokouḻí kon oontongon inta mokoḻia-ḻiaw totok kon ginaku.

⁶ Bo inoiníku in intau mita inta mongopandoi inta nogutun kon Babel sin moginsilang kon inakó mangaḻe in togoindop tatua.

⁷ Táe naonda in mononoḻindap, mototaau bo intau mita inta mobayong in sinotaau bo intau mita inta nonotaau in bobayá in tundi namangoi bo inoumanku in togoindopku tatua kon i monia, yo diábí tobatúmai in intau in nokopoguman kon mangaḻenea.

⁸ Imbuitnea namangoidon in ki Daniel inta dinonoi doman ki Beltsazar naonda bo tangoi in dewaku. Ki Daniel in kinawasaan in dimukud in dewa mita inta motusi. Inoumanku doman kon inia in togoindopku, kon inakó,

⁹ “Ei, Beltsazar, itoi in intau mita inta kototaau, kinotaauanku kon iko in kinawasa in dimukud in dewa mita inta motusi, dá diábí in noibuni kon inimu. Indongogaidon in togoindopku tanaa, bo ininsilangandon in mangaḻenea.

¹⁰ Kon dodai in akuoi nosiugpa, inontongku in pangkoi in kayu inta nobiag kon yua-yuak in dunia.

¹¹ Pangkoi in kayu tatua noḷantud totok; pangkoinea in moḷoben bo moropot. Ḷuntungnea in nodapot in ḷangit, dá koontonganbí in bayongan in intau kon sinangkub in dunia naa.

¹² Daunnea mita in nongoḷunow bo bungainea in modatog totok, tugatbí kaanon in bayongan inta nogutun kon dunia naa. Mahaḷuk mita ḻindong in nosiug mako kon siungonnea bo ḷagapan mita in nonompugad kon tanganea mita. Bo bayongan in mahaḷuk motaaubí mokaan kon bungainea mita.

¹³ Naonda in irai-raikumai in oontongon tatua, inontongku in malaekat tobatú in noponag nongkon soroga, koontongan in sia kon kiḷuka-ḷukadmai bo nokopoingat.

¹⁴ Noropot in singognea in noguman, ‘Pupuḷdon in pangkoi in kayu tatua bo pongkódon in tanganea mita, tontakdon in daunnea mita bo poraritdon in bungainea mita. Untundon in mahaḷuk mita inta nosiug mako kon siungonnea bo ḷagapan mita inta nonompugad kon tanganea mita.

¹⁵ Táe pomayádon mako in tuodnea noikanom mako kon bonu in butá. Togotdon in rante uatoi bo bitú bo taḷaaidon kon rawang in bonok. Pomayádon mako in sia buntadan in topuot, bo mobiag moyotakin in mahaḷuk mita bo mobobiag mita.

¹⁶ Pomayádon mako in gina in intaunea mobaḷui mobaḻí gina in mahaḷuk kon bonu in pitu notaong.

¹⁷ Tuata in bontow in tosingogon nami malaekat mita inta umuran kiḷuka-ḷukadmai bo inta tantú nokopoingat. Makusud nami in bá intau mita kon ondaka yo mongaku, kon ki Allah Inta Totok in moḷantud in kitogi kawasa kon dodatuan in intau bo dodatuan tatua in ogoi-Nea kon i inekabí in piniḻí-Nea, nodapotbí in kon intau inta totok in diá in mangaḻenea!’

¹⁸ Ei Beltsazar, tuata in togoindopku. Tanaa in pogumandon kon inakó in mangaḻenea. Diábí tobatúmai in kon sigad in intau mita mongopandoi inta kon bonu in dodatuanku in nokopotaau kon inakó in mangaḻenea, táe iko in mokopotaaubí, sin iko in kinawasa in dimukud in dewa mita inta motusi.”

Ki Daniel noginsilang kon mangaḻe in togoindop tatua

¹⁹ Nokodongogmai kon tua, ki Daniel inta dinonoi doman ki Beltsazar, noitaḻikokog bo noitongau notoyong. Dá akuoi, ki Datu Nebukadnezar in noguman kon inia, “Beltsazar, dikabí moḻia-ḻiaw in ginamu popisí in togoindop takin mangaḻenea tua.” Ki Beltsazar in notubag, “Tuangku, mopia-piabí aka kuma bo bayongan inta mobaḻí inta sinoḻindap in togoindop tatua bo moiuma kon musung mita i Tuangku bo deeman kon i Tuangku.

²⁰ Pangkoi in kayu inta inontong i Tuangku totok in moḷantud inta ḷuntungnea nodapot in ḷangit, bo koontongandon in bayongan in intau kon dunia.

²¹ Daunnea mita inta nongo ḷunow bo bungainea mita in modatog dá tugatbí kaanon in bayongan tombonu in dunia naa. Mahaḷuk mita ḻindong umuḻid mako kon siungonnea, bo ḷagapan mita in monompugad kon tanganea mita.

²² Oo, Tuangku, ki Tuangkubí in pangkoi in kayu inta moḷantud bo moropot tatua. Koḷoḷoben i Tuangku modugang modapot in ḷangit bo kawasa i Tuangku in moiyoyanú modapot kon popod in dunia.

²³ Ki Tuangku in nokoontong doman kon malaekat tobatú noponag nongkon soroga bo noguman, ‘Pupuḷdon in pangkoi in kayu tanaa bo yompatdon, táe pomayádon mako in tuodnea moimuḷa mako kon butá. Togotdon in rante uatoi bo bitú bo taḷaaidon kon rawang in bonok. Pomayádon mako in sia mobuntad in oḷú bo mobiag moyotakin in mahaḷuk mita kon bonu in pitu notaong.’

²⁴ Tuangku, naa in mangaḻe in oontongon tatua, bo naadon in inta ain sinantú i Allah Inta Totok in moḷantud kon i Tuangku tontaní.

²⁵ Ki Tuangku in poguntunon nongkon yua-yuak in intau bo mobiagdon kon sigad in mahaḷuk mita kon rawang. Pitu notaong in koonggotnea ki Tuangku in mokaan kon bonok naonda bo sapi bo mosiug kon rawang inta diá in oḻi-oḻingoinea, modapot in mobuntad kotugatan in oḷú. Mopaḷut mako kon tua ki Tuangku in mongakudon kon ki Allah Inta Totok in moḷantud in kitogi kawasa kon dodatuan in intau, bo dodatuan tatua in ogoi-Nea kon i inekabí in piḻíon-Nea.

²⁶ Malaekat mita in nomarenta sinbá tuod in pangkoi in kayu tatua pomayá mako in moimuḷa mako kon butá. Tua in mangaḻenea kon ki Tuangku in mobaḻípabí datu naonda in ki Tuangku mongakudon kon ki Allah in kitogi kawasa kon sinangkub in dunia naa.

²⁷ Tuamai in aka motaau dá ki Tuangku in dumuduipa kon tonggina in bobantung naa. Dikadon in ki Tuangku mogaid kon dosa, táe aidaidon in onu inta mopia bo moadil, bo kotabidon in intau nobiag nobogá. Takin natua ki Tuangku in umuranbí mobiag mopia-pia mako.”

²⁸ Bayongan intua in nobaḻí kon inakó, ki Datu Nebukadnezar.

²⁹ Mopuḷú bodoyowá nobuḷan noiduduimai, kon dodai in akuoi nodondaḷoi kon taman kon ḷundukan kon ḻimonik in baḷoi in komaḻigku kon Babel,

³⁰ akuoi in noguman, “Indoiai, totuu motoyang in kotá in Babel! Akuoibí in noposindog kon tua nobaḻí ki iná in negara sin moponiata kon kawasa bo ropotku, koḷoḷantud bo koḷoḷobenku!”

³¹ Diápa nopaḷut in akuoi nosingog bo kinodongogandon in singog nongkon ḷangit, “Datu Nebukadnezar, indongogaidon in naa! Kawasamu saḷaku datu in ginamádon nongkon inimu.

³² Iko in poguntunon nongkon sigad in intau mita, bo mobiag moyotakin in mahaḷuk mita kon rawang. Pitu notaong in koonggotnea iko in mokaan kon bonok naonda bo sapi. Mopaḷut mako kon tua iko in mongakudon kon Ki Allah Inta Totok in moḷantud in kitogi kawasa kon dodatuan in intau bo dodatuan tatua in inogoi-Nea kon i inekabí inta piniḻí-Nea.”

³³ Kon dodai doman intuata, tosingogon mita tatua noniata. Akuoi, ki Nebukadnezar inuntun nongkon sigad in intau mita bo nokaan kon bonok naonda bo sapi. Awakku nobuntad in oḷú, buokku in noḷanggódon naonda bo bubuḷ in boniá, bo konukuku in nádon koḷanggó in konuku in ḷagapan.

Ki Nebukadnezar nodayow kon i Allah

³⁴ Naonda in pitu notaong inta sinantú tatua noitaḻibdon, iḷumangag in akuoi kon ḷangit, bo nosadardon bui in ginaku. Dá dinayowku in ki Allah Inta Totok in moḷantud. Inuntu bo pinomuliaku in Sia inta nobiag mononoi tua. “Ki Allah in mobaḻí datu modapot in mononoi. Sia in nongawasa modapot in kopaḷutannea.

³⁵ Bangusa mita kon dunia diá in mangaḻenea. Ki Allah in nongawasa kon malaekat kon soroga bo intau kon dunia. Diá tobatúmai intau in mokoḻimpat kon ibog-Nea, diábí in mokobaḻí moḻibó mongo onu in pomiaan-Nea.”

³⁶ Naonda in nosadardon bui in akuoi, dá koḷoḷoben, kamuliaan bo kopopia in dodatuanku inogoidon bui kon inakó. Akuoi in sinontomu in pogawaiku mita bo in intau moḷobenku mita, bo akuoi in pinoki kadaiandon bui in dodatuanku, nodapotbí in kamuliaanku in nodugangdon kon inta muna.

³⁷ Dá tanaa in akuoi, ki Nebukadnezar modayow, mopoḷantud bo mopomulia kon i Datu in Soroga. Bayongan in oaidan-Nea in moitutui bo moadil, bo Sia in mokopotungkudbí kon intau mita inta moḷoḷatú.