DANIEL 3 - Alkitab Singog In Mongondow Masa In Tanaa

Ki Nebukadnezar nomarenta sinbá rayat mosumba kon patong buḷawan

¹ Kon singgai tobatú ki Datu Nebukadnezar nomia kon patong buḷawan tobatú inta koḷantudnea in doyowa nopuḷú bo pitu nometer bo kooḷadnea in gogió bo toḷu nometer, Pinosindognea intua kon ḷopá in Dura kon Propinsi Babel.

² Onda intua ki datu nogoiní kon bayongan in datu in wilayah, gubernur, bupati, monononggina in negara, mokokadai kon doit, hakim, intau inta monotaau totok in hukum, bo bayongan tongguḷu in daerah sin mamangoi kon upacara pomaḷutan kon patong inta ain pinosindognea tatua.

³ Naonda in mosia komintan namangoi bo sinimindog kon tayowon in patong tatua,

⁴ nomaḷúdon noropot totok in intau i datu, “Utat mita nongkon bayongan in bangusa, suku in bangusa bo bahasa! Indongogaidon in parenta i datu tanaa:

⁵ Aka torompet mosingog, duduian in pogirupan kon bansí, kecapi, rababo, gambus, serdam, bo pakakat mita in musik ibanea, yo tai utat mita in mustibí dumokó mosumba kon patong buḷawan inta ain pinosindog i Datu Nebukadnezar.

⁶ Ki ine in doí dumudui kon parenta tanaa, yo baḷúdon pogonag kon tuḷú inta koyogot in modokot.”

⁷ Dá naonda in nokodongog kon pakakat mita in musik tatua pinosingog, intau mita nongkon bayongan in bangusa, suku bangusa bo bahasa, dinumokó bo nosumba kon patong buḷawan tatua.

Yobayat i Daniel taya toḷu sinapudan kon doí dumudui kon parenta i datu

⁸ Tongonumai in intau in Babel nomaké kon kasampatan tatua sin mopobodito kon intau in Yahudi.

⁹ Mosia in noguman kon i Datu Nebukadnezar, “Mobiagdon in ki Tuangku modapot in mononoi!

¹⁰ Ki Tuangku tontaní ain nopoḷuai in parenta kon naonda in pakakat mita in musik posingogon, bayongan in intau musti dumokó bo mosumba kon patong buḷawan tatua,

¹¹ bo ki ine in doí dumudui kon parenta tatua yo pogonag kon tuḷú inta kodoko-dokot.

¹² Táe tongonumai in intau in Yahudi inta ain inogoian i Tuangku in oaidan saḷaku pomarenta kon propinsi in Babel ain nonganggap kon diábí in mangaḻenea in parenta i Tuangku tatua. Mosia tua in ki Sadrakh, ki Mesakh bo ki Abednego. Intau mita tatua in doíbí mosumba kon ilah mita i Tuangku bo doí doman mosumba kon patong buḷawan inta pinosindog i Tuangku.”

¹³ Nokodongogmai kon tua sinumorúdon totok in ki datu, bo nomarenta sinbá intau taya toḷu tatua in diaan kon tayowonnea.

¹⁴ Ki Datu in noḻibó kon i monia, “Sadrakh, Mesakh bo Abednego! Totuu degá kon moiko in doí mosumba kon ilahku mita bo doí doman dumokó mosumba kon patong buḷawan inta ain pinosindogku tatua?

¹⁵ Yo, tanaa, moibog degá in moiko dumokó bo mosumba kon patong tatua kon dodai in musik posingogon? Aka moiko doí, yo moiko in baḷúdon pogonag kon bonu in tuḷú inta kodoko-dokot. Bo dewa degá táonda in mokoposaḷamat kon i monimu nongkon kawasaku?”

¹⁶ Ki Sadrakh, ki Mesakh bo ki Abednego in notubag, “Tuang inta momulia, kami in diábí monungkuḷ moposaḷamat kon awak nami.

¹⁷ Aka ki Allah inta sinumba nami mokoposaḷamat kon inami nongkon tuḷú inta kodoko-dokot tatua bo nongkon kawasa i Tuangku, yo notantúbí kon aidan-Nea intua.

¹⁸ Táe aka kuma bo doí doman in Sia moposaḷamat, yo igumon mako ki Tuangku in monotaau kon kami in diábí mosumba kon dewa i Tuangku bo diábí doman mosumba kon patong buḷawan inta pinosindog i Tuangku tatua.”

Ki Sadrakh, ki Mesakh bo ki Abednego iḷabúan in hukuman matoi

¹⁹ Dá sinumagabdon in torú i Datu Nebukadnezar kon i Sadrakh, Mesakh bo kon i Abednego, dá inumuradon totok in pogotnea. Sia in nomarenta sinbá tuḷú dugangan kopitu in kopatúnea nongkon inta biasamai.

²⁰ Bo pinotabánea in tongonumai in intau inta totok in moropot nongkon tontaranea sin motokig kon i Sadrakh, kon i Mesakh bo kon i Abednego, bo poḷat nopogambat kon i monia kon tuḷú inta kodoko-dokot tatua.

²¹ Dá ḷagidon sinokig in taya toḷu tatua sinokig kinorigon koḷambu-ḷambung nolongkap, nogiḷambung, jubah, nogisapoyo bo pakeang ibanea, bodongka pinogambat kon bonu in tuḷú inta kodoko-dokot tatua.

²² Popisí in parenta i datu tatua totuu motogat, dá tuḷú tatua in inaidandon totok in kinopatú dá dokot in tuḷú nomokak nodapot in minatoi kon intau mita inta nobuat kon i Sadrakh, kon i Mesakh bo kon i Abednego pinodiug kon tuḷú.

²³ Natuata, taya toḷu tatua noḷabú kon bonu in tuḷú inta kodoko-dokot tatua.

²⁴ Daḻídon noitaḻikokog in ki Datu Nebukadnezar. Baḷú in sia sinimindog bo nomaḷú kon pogawainea mita, “Totuubí degá kon kita in koina in notokig kon intau toḷu bo nopogambat kon i monia kon bonu in tuḷú tatua?” Mosia in notubag, “Totuubí, Tuangku.”

²⁵ Tubag i datu, “Táe nongonu sin taya opatbí in inontongku in intau nodondaḷoi kon yua-yuak in tuḷú tatua? Mosia in diábí noitogot bo beresibí diá nongonumai. Bo taya opat tatua pogot monia in naonda bo dewa.”

Pinoḷuatdon kon hukuman bo pinoponik in pangkat

²⁶ Bo ki Nebukadnezar in dinimiug kon ngara in pinonontuḷúan tatua bo nomaḷú, “Sadrakh, Mesakh bo Abednego, mogogundoi mita i Allah Inta Totok in moḷantud! Ḷuaidon nongkon tuḷú tanion!” Dá iḷumuaidon in mosia.

²⁷ Bayongan in oḻit i datu, gubernur mita, bupati, bo pogawai mita ibanea iḻimibu kon i nayatoḷu tatua bo nokoontong kon mosia in beresibí diá iḻiai in tuḷú. Buok monia in diábí nopokak, bo pakeang monia in diábí nobaḷui, nodapot in diábí in bó in poyok kon i monia.

²⁸ Bo nogumandon in ki datu, “Dinayo-dayowdon in ki Allah inta sinumba i Sadrakh i Mesakh bo i Abednego. Sia in nopotabádon kon malaekatnea sin moposaḷamat kon bobantungnea taya toḷu tatua inta mopirisaya kon i-Nia. Mosia in iḻimimpatdon kon parentaku bo moibo-ibogbí kon matoi aka mosumba andeka modayow kon dewa taondaka koḻikudbí in ki Allah monia tontaní.

²⁹ Tuamai in akuoi in momarenta kon bayongan in intau nongkon bangusa, inanakan andeka bahasa onuka, inta moningkuḻe kon i Allah inta sinumba i Sadrakh, i Mesakh bo i Abednego, yo pongko-pongkóonbí bo baḷoinea in umpagon bo baḻíon bonturungan in apug. Sin diábí in dewa in mokoaid kon onu inta inaidan i Allah tatua.”

³⁰ Naonda intua ki datu nopoponikdon in pangkat i Sadrakh, i Mesakh bo i Abednego, dá nobaḻídon in mosia intau mita moḷoben kon propinsi Babel.