DANIEL 11 - Alkitab Singog In Mongondow Masa In Tanaa

¹ Siabí inta pinotabá mobantung bo moduḷu kon inakó kon taong imitánea kon pinomarentaan i Darius intau in Media tatua.

² Bo onu inta pogumanku kon inimu in totuubí.” Malaekat tatua in noguman, “Toḷu in datu ibanea in momarenta kon Persia, dinuduian in datu inta inggopatnea inta mooyu-oyúon nongkon inta ibanea. Kon dodai in moḷantudon totok in kawasa bo kaoyúonannea, sia in mopoyogintayowdon in ropotnea takin dodatuan in Yunani.

Dodatuan in Mesir bo Dodatuan in Siria

³ Onda intua momukádon in datu tobatú inta motorindog totok. Sia in momarentabí kon dodatuan inta totok in moḷoben bo mogaidbí kon onu in koibognea.

⁴ Táe kon dodai in koḻimonikdon totok in sia, dodatuannea in mobotak bo mosilai opat notonsilai. Datu mita inta deeman buínea in momarenta mobaḻí toḻiunea, bo mosia in diábí ná koropotnea.

⁵ Datu in butá in toḷatan in mobaḻíbí moropot. Táe tobatú kon sigad in itoi in tontaranea, in moropo-ropotbí nongkon inia, bo sia in momarenta kon dodatuan inta moḷobe-ḷoben nongkon tua.

⁶ Tongonumai notaong noiduduimai ki datu in butá in toḷatan in noyopakatdon takin datu in butá in utuan bo mopotonibuḷoi kon i adínea bobay takin i datu in butá in utuan tatua. Táe pinonobatúan tatua diábí mononoi, bo ki adínea bobay tatua in ḻimodonbí, natua doman in ki buḷoi bo ki adínea bo bobantungnea mita inta ain nogatod kon inia.

⁷ Diá noonggot kon tua, intau tobatú inta ginaḷum i adí bobay in datu tatua in mobaḻí datu. Sia in monububí kon tontara in datu kon butá in utuan, monubu kon dinding tondoknea bo poḷat monaḷow kon inia.

⁸ Kon tungkuḷ in sia mobui kon Mesir, diaanneabí in patong in dewa in musungnea bo pakakat buḷawan bo saḷaka inta ain pinosumba kon i dewa tatua. Tongonumai notaong noiduduimai kon tua diábí in sia monubu kon i datu in butá in utuan.

⁹ Onda intua ki datu in butá in utuan in monububí kon butá in toḷatan, táe sia in upetonbí modapot in umundok bo mobui mayá in butánea tontaní.

¹⁰ Bo ki adí ḷoḷaki mita i datu kon butá in utuan in monouḷutdon sin moparang bo inoinínea in intau mobarong sin baḻíon tontara. Tobatú kon sigad monia tua in monubu naonda bo ḷunud. Kon ponubuan induanea sia in monubu kon dinding tondok in musung.

¹¹ Dá sinumorúdon in ki datu in butá in toḷatan, bo mayábí in sia kon popoparangan bo monayow kon i datu in butá in utuan. Sia in mokotaḷowbí kon tontara mobarong inta dinia i datu in butá in utuan.

¹² Onda intua moyunggagábí in sia sin nountung bo popisí in noḻimodon kon nobayong in musung, táe kawasanea in diábí mononoi.

¹³ Kon induaneadon ki datu in butá in utuan bui mogoiní kon intau mobayong baḻíon tontara, mobayo-bayongbí kon inta muna. Aka moiangoidon in wakutunea, mayádon in sia moparang takin tontaranea inta mobayong inta sinouḷutan in pakakat in parang inta mobarong totok.

¹⁴ Dá mobayong in intau in momarontak kon i datu in butá in toḷatan. Bo tongonumai in intau inta moḻingá nongkon bangusamu, Daniel, in momarontak doman popisí in mosia in nokoontong doman kon oontongon tobatú. Táe taḷowonbí in mosia.

¹⁵ Onda intua datu kon butá in utuan mongopung kon kotá tobatú inta oyúon in tondok dinding bo mogagow. Tontara in butá in toḷatan diábí mokotongod, bo tontaranea mita inta nongotompiḻí diábí mokoponayow.

¹⁶ Datu in butá utuan tatua in mogaidbí podudui in ibognea bo diá bidon in moḷawang tongopiḻikmai. Bo ḻitúannea bidon in butá inta mopia tatua bo kawasaannea komintan.

¹⁷ Onda intua datu kon butá in utuan moposadia in bayongan tontaranea sin monubu kon butá in toḷatan. Bo takin makusud mongawasa kon bayongan in dodatuan in musungnea, sia in momiabí kon yopakat takinnea bo mopoyotonibuḷoi in adínea bobay takin i datu in Mesir tatua; táe tomayánea tatua in diábí kodapotan.

¹⁸ Mopaḷut mako kon tua monubu in sia kon bangusa mita kon bingkí in dagat, bo mobayong in taḷowonnea. Táe tobatú itoi kon butá in intau in mopogogaibí in singkuḻe inta inaidannea tatua, nodapotbí in motuḻí kon pinoningkuḻeannea tatua kon inia.

¹⁹ Datu in butá in utuan tatua in mobuibí kon tondok dinding mita in butánea tontaní, táe sia in taḷowondon bo diá bidon in habar bui kon inia.

²⁰ Sia in baḷuian bidon in datu tobatú inta mopotabá kon pogawainea inta moḻingá sin mosipun kon pajak takin pakisa sin modugang kon kaoyúonan in dodatuannea. Tongábí motoyong bo ḻimodon in datu tatua, táe diábí mositayowan mako bo deemanbí doman kon poparangan.”

Datu in butá kon utuan inta moraat

²¹ Malaekat tatua in noguman bui, “Datu moiduduimai inta nomarenta kon butá in utuan in intaubí biasanea inta deeman bui in datu. Táe sia in mamangoibí kon wakutu inta diá binutu-butungmai bo mogagow kon ḷoḻitúan in datu pinongin akaḷnea.

²² Bayongan in tontara inta moḷawang kon inia, nodapot in Imang Moḷobenpa, in upetonneabí modait poḷat yopúon.

²³ Sia in moḻiongbí kon dodandian mita inta bagupa pinomianea takin bangusa mita ibanea. Bo kodugang-kodugangdon in ropotnea, umpakabí tongá in sia nomarenta kon negara inta nointok.

²⁴ Pinongin tompobaḻik tubuonnea in butá mita inta mopia kon dodai in intaunea mita nobiag noodom kon tua. Sia in mogaidbí kon onu inta diápa kon dodai in onda in inaidan in mogoguyangnea. Bo sia in mosilaibí magí-mako kon intaunea mita bayongan in pakakat inta inagow bo kaoyúonan inta nouḻínea kon parang. Motayak in sia kon daya in monubu kon tampat mita inta oyúon in sinondok in dinding, táe wakutunea in ḷagidon modait.

²⁵ Onda intua mobaranidon totok in sia in mogoiní kon intau mobayong sin baḻíon tontara sin monubu kon datu in butá in toḷatan inta ain nosadia domandon monayow kon inia takin tontara inta moropot bo mobarong totok. Táe ki datu in butá in toḷatan diábí mokotongod sin sia in inuboḷan.

²⁶ Mononongginanea mita inta totok in modagin kon inia in mopoḷabúbí kon inia. Mobayong in tontaranea mita in koḻimodan, bo tontaranea mita in yompatonbí kodariton.

²⁷ Onda intua datu doyowa tatua in ḻimitú kon meja tobatú bo mongaan moyotakin, takin mosia in nonomayá kon inta moraat, bo mosia in mosiakaḷan. Táe tomayá monia tua in diábí motuoi sin deemanpa wakutunea.

²⁸ Onda intua datu in butá kon utuan in mobui kon butánea takin kodia-dia in bayongan pakakat inta inagow inta nouḻínea. Sia in moniat mako kon morimumud kon agama inta pinirisaya in umat i Allah. Sia in mogaidbí kon onu in koibognea aidan bodongka mobui kon butánea tontaní.

²⁹ Diá moonggot kon tua monubu bui in sia kon butá in toḷatan, táe bungainea in torupabí nongkon inta muna.

³⁰ Sin intau mita in Rum takin kapaḷnea mita in mamangoi nongkon Siprus bo momarang kon inia, dá angoiandon totok in ondok in sia. Bo mobuidon in sia takin tumorú totok bo moḷongasi morimumud kon agama in umat i Allah. Sia in dumuduibí kon tonggina in intau inta ain nomaḻidawan kon agama tatua.

³¹ Bo sia in nokidia in tontara mita inta nokokotor kon Baḷoi i Tuhan. Mosia in momopatbí kon kuruban muḷoi in singgai bo moposindog in inta mokokoningkim inta sinangoian Aid moraat inta mokorimumud.

³² Dá takin tompobaḻiknea ki datu tatua nodondouḷug kon intau mita inta ain nonaḷámai kon agama monia, sinbá moibog motuḷung kon inia. Táe intau mita inta motoindudui kon i Allah in nobaranibí in noḷawang kon inia.

³³ Intau mita inta mobijaksana inta nobaḻí itoi in rayat in mopomangaḻebí kon mobayong in intau. Táe diá moonggot kon tua, tongonumai in kon sigad monia tua in koḻimodan popisí in parang andeka popisí in tuḷú, bo tongonumai doman in intau in pogagowan bo dakopon.

³⁴ Koyogot in poḻimodan tatua mobaḻí, umat i Allah in mokouḻí kon totuḷung topiḻik, táe mobayong in intau in dumugang kon i monia tongábí popisí in kopontingan monia tontaní.

³⁵ Tongosilai nongkon itoi mita inta mobijaksana in koḻimodanbí, táe tua in mobaḻíbí totungkuḷ kon umat modapot in mosia mobaḻí modarit. Tua in mobaḻíbí modapot in singgai tumi, singgai inta ain sinantú i Allah.

³⁶ Datu in butá in utuan in mogaidbí kinoibog in ginanea. Takin ḷumoḷatú sia in moguman kon sia in moḷobe-ḷoben nongkon dewa taondakabí, nodapotbí in moḷobe-ḷoben nongkon i Allah Inta Totok in Moḷantud. Sia in motaaubí in mogaid kon tua modapot in torú i Allah modait. Sin onu inta ain sinantú i Allah mustibí aidan muna.

³⁷ Ki Datu tatua in diábí mopandungmai kon i dewakabí táonda inta sinumba in mogoguyangnea, noitakin doman in dewa sosumbaanmai in bobay mita. Diábí pinandungneamai in dewa mita tatua sin inanggapnea kon siabí in moḷobe-ḷoben nongkon i monia.

³⁸ Noyotoḻikudon intua, sia in mohoromatbí kon dewa inta diápa kon dodai in onda in sinumba in mogoguyangnea, ná dewa moḷoḷukad kon tondok dinding mita. Sia in moposumbabí in buḷawan, saḷaka, permata bo sosumba mita inta nopia totok ibanea kon dewa inta diápa kon dodai in onda in sinumba in mogoguyangnea.

³⁹ Sia in momiḻíbí kon intau mita inta mosumba kon dewa ibanea mako, sin monubu kon tondok dinding mita inta moropot. Ki ine in mosumba kon i dewa tatua yo ogoianneabí in kahoromatan moḷoben bo ḷoḻitúan inta moḷantud bo butá nobaḻí tondannea.

⁴⁰ Aka imbuitdon in kawasa i datu in butá in utuan motoyongdon mopaḷut, ki datu in butá in toḷatan in monubudon kon inia. Bo ki datu in butá in utuan in motuḻí kon pinonubuan tatua totok in tumagab. Sia in mopotabábí in mobayong totok in kereta in parang, kabaḷo bo kapaḷ. Sia in monububí naonda bo ḷunud, bo mongawasa kon mobayong in butá.

⁴¹ Nodapotbí in butá inta mopia in tubuonneabí doman, bo puḷúan ribu in intau ḻimodonnea. Táe dodatuan mita in Edom, Moab bo tonsilai inta totok in moponting nongkon dodatuan in Amon in mosaḷamatbí.

⁴² Kon tungkuḷ in sia mongawasadon kon dodatuan mita tatua, dodatuan in Mesir in diábí doman mokoḷagui.

⁴³ Sia in mogagowbí kon kapunyaan in Mesir ná buḷawan bo saḷaka takin kapunyaan ibanea inta totok in momahaḷ. Sia in duḷuanbí in intau in Libia bo Sudan.

⁴⁴ Bo habar nongkon pomukaan bo utuan in mokotaḻikokogbí kon inia, dá moparangdon totok in sia bo moḻimod kon mobayong in intau.

⁴⁵ Noidapotbí in sia moposindog in ḷoḷaigan in dodatuannea kon sigad in dagat bo buḷud tampat in Baḷoi Tuhan. Táe onda intua matoi in sia bo diábí tobatúmai in intau in motuḷung kon inia.”