DANIEL 10 - Alkitab Singog In Mongondow Masa In Tanaa

Oontongon i Daniel kon Ongkag in Tigris

¹ Kon taong intoḷunea kon pinomarentaan i Datu Koresh kon Persia, koyow tobatú pinoniata kon i Daniel inta dinonoi doman ki Beltsazar. Koyow tatua in totuubí, táe mororiga totok komangaḻean. Kon dodai in moḷongasi momangaḻe kon tua ki Daniel in notarima kon insilang soaḷ mangaḻe in koyow tatua kon bonu in tobatú oontongon.

² Kon dodai intua akuoi in koyogot in nopuasa toḷu nodiminggu notompod.

³ Kon dodai intua diábí in akuoi nokaan kon kaanon inta mopia andeka ponoyá; akuoi in diábí nonginum kon anggur, bo diábí doman nonayi-nayidmai kon buok.

⁴ Kon singgai indoyowa nopuḷú bo opat kon buḷan imitánea kon taong tatua, akuoi in sinimindog mako kon bingkí in Ongkag in Tigris inta moḷoben tatua.

⁵ Akuoi in iḷumangag, bo inontongku in intau tobatú inta nogiḷambung nongkon linen bo baan nongkon buḷawan taakan.

⁶ Awaknea in mopouḻi-uḻinag naonda bo permata, pogotnea in ná kobayag in sindar in kilat, bo matanea in mopodoko-dokot naonda bo tuḷú. Kokaḷ bo sioḷnea in mopouḻi-uḻinag naonda bo bitú inta iradatan, bo singognea in kodongogan naonda bo singog in intau mobarong.

⁷ Tongábí akuoi tontaní in nokoontong kon oontongon tatua. Intau mita inta noyotakinku in diábí nokoontong kon tua, táe mosia in inangoian in ondok dá noḷagui bo nogadop.

⁸ Akuoi in sinaḷáan aku-akuoi mita, sindaḷan nonaridimai kon oontongon inta nokotaḻikokog tatua. Akuoi in diádon kodaya bo pogotku i inimilaidon totok.

⁹ Kon dodai in dinongogku in singognea, noitambuḷoḷokdon in akuoi nodapot in noitongkob kon butá.

¹⁰ Onda intua oyúon in ḻima noḻiai kon inakó bo nokopobangon kon inakó sindaḷan kinumadai kon ḻima bo duḷudku.

¹¹ Malaekat tatua in noguman kon inakó, “Daniel, iko in kinotabi i Allah. Bangondon bo sindogdon bo indongogai in singogku mita tanaa kopiaan. Akuoi naa in pinotabádon namangoi kon inimu.” Naonda in sia noguman kon tua, sinimindogdon in akuoi takin urot.

¹² Bo gumannea kon inakó, “Daniel, dika moondok. Ki Allah in nokidongogdon kon sambayangmu pinangkoi kon singgai muna iko nonantú kon nopoompá kon inimu tontaní sinbá mobaḻí mobijaksana. Akuoi in namangoidon nobaḻí tubag in sambayangmu.

¹³ Malaekat moḷoḷukad kon dodatuan in Persia noḷawang kon inakó doyowa nopuḷú bo mita nosinggai in koonggotnea. Bo ki Mikhael, tobatú itoi in malaekat mita, namangoi bo notuḷung kon inakó. Sinaḷáanku in sia kon tua, kon Persia.

¹⁴ Akuoi in namangoi sin mopobaḻí kon inimu momangaḻe kon onu inta mobaḻí kon singgai moiduduimai kon bangusamu. Oontongon tanaa in soaḷbí singgai moiduduimai.”

¹⁵ Kon dodai in sia noguman kon tua, kinumuyung in akuoi bo diádon nokosingog.

¹⁶ Onda intua malaekat inta naonda bo intau tatua nopotonggó in ḻimanea bo noḻiai kon bibigku. Akuoi in noguman kon inia, “Tuang, oontongon tanaa in nokororiga totok kon ginaku nodapot in akuoi totokdon in diá nokopongonu.

¹⁷ Akuoi in naonda bo bobantung tobatú inta sinimindog mako kon tayowon i tuangnea. Naondabí in pongongumanku kon i Tuang? Ropotku in nodaitdon bo mosisí in poginaanku.”

¹⁸ Dá komintanpa doman sia in noḻiai kon inakó, bo kinorasaanku kon nodugangdon in ropotku.

¹⁹ Sia in noguman, “Ki Allah in notabi kon inimu, tuamai dikadon moḻia-ḻiaw in gina andeka moondok, yo, koropotdon!” Kon dodai in sia noguman natua, kinorasaanku kon nodugangdon bui in ropotku bo noguman, “Posingogdon, Tuangku. Ki Tuang in nodugangdon kon ropotku.”

^20-21 Bo sia in notubag, “Kinotaauanmu degá mongo nongonu sin namangoi in akuoi kon inimu? Makusudnea in moguman kon inimu onu inta pinais kon bonu in Buk Kobobanar. Tanaa akuoi in musti mobui sin moparang monayow kon malaekat moḷoḷukad Persia. Nopaḷut mako kon tua malaekat moḷoḷukad kon Yunani in mamangoi. Diábí in motuḷung kon inakó koḻikudbí in ki Mikhael, malaekat moḷoḷukad in Israel, negaramu.