DANIEL 1 - Alkitab Singog In Mongondow Masa In Tanaa

OUMAN INTA NOBAḺÍ KON I DANIEL BO YOBAYATNEA MITA 1:1–6:29 Tayowmobiag mita in Yahudi kon komaḻig i Nebukadnezar

¹ Toḷu notaong naonda in ki Datu Yoyakin nomarenta kon Yohuda, ki Nebukadnezar datu in Babel, nonubu kon kotá in Yerusalem bo nongopung kon kotá tatua.

² Inogoi i Tuhan in sia in nonaḷow kon i Datu Yoyakin bo poḷat nogagow kon tongosilai in pakakat mita inta koboḻi kon Baḷoi Tuhan. Intau mita inta sinokodakopnea, dinianea kon kuil in dewanea kon Babel, bo pakakat mita inta koboḻi inta inagownea, sinagúnea kon bonu in gudang mita in kuil tatua.

³ Onda intua ki datu nomarenta kon i Aspenas, tongguḷu in motoḷuadí in komaḻig, sin momiḻí kon tongonumai in tayowmobiag buí in datu andeka in intau moḷoben kon sigad in intau mita in Israel inta sinokodakop.

⁴ Mosia in mustibí tayowmobiag inta diá in bogit. Musti moḷunat, norosikoḷa moḷantud, mopandoi bo mobarong in kotaauan monia bo patus mopobayá in oaidan kon bonu in komaḻig. Ki Aspenas in mustibí motundú kon i monia mobaca bo momais kon bonu in singog in Babel.

⁵ Ki Datu in nonantú doman kon kaanon bo oinumon kon i monia in mustibí motongkai ná inta sinadia kon motoḷuadí i datu. Naonda in toḷudon notaong in potundúan kon i monia, mosia in musti mayá kon tayowon i datu sin mopobayá in oaidan kon komaḻig.

⁶ Kon sigad in tayow mobiag mita tatua oyúon doman in ki Daniel, ki Hananya, ki Misael bo ki Azarya, komintan nongkon suku in Yohuda.

⁷ Tongguḷu in motoḷuadí in komaḻig nomaḷui kon tangoi mita monia nobaḻí: ki Beltsazar, ki Sadrakh, ki Mesakh bo ki Abednego.

^8-9 Pinodoyon kon totuḷung i Allah, ki Daniel in kinoibog bo kinotabi i Aspenas. Ki Daniel in nonantúdon kon doíbí moponajis in awaknea takin mokaan bo monginum kon anggur nongkon komaḻig in datu, tuamai in nopoigum in sia kon i Aspenas sinbá ogoiandon in kaanon ibanea.

¹⁰ Popisí in moondok kon i datu, dá ki Aspenas in noguman, “Ki Datubí tontaní in nonantú kon kaanon bo inumonmu, dá aka koontongannea kon iko diá totok in mosehat aka poyotongkaionmai in tayowmobiag mita ibanea, yo notantúbí kon ḻimodonnea in akuoi.”

¹¹ Onda intua iyosingog i Daniel intua takin moḷoḷukad inta pinoki ḷukadan i Aspenas sin moindoi kon i Daniel bo yobayatnea taya toḷu tua. Guman i Daniel,

¹² “Tungkuḷaidon in kami kon bonu in mopuḷú nosinggai; ogoiaidon in kami in tongákabí kuyat bo tubig.

¹³ Naonda in mopuḷúdon nosinggai, poyotongkaidon in pogot nami takin tayowmobiag mita inta nokaan kon kaanon inta sinantú i datu, bo tantúdon podoyon kon onu inta inontongmu tua.”

¹⁴ Noibog in moḷoḷukad tatua bo sinungkuḷannea kon bonu in mopuḷú nosinggai.

¹⁵ Naonda in notompodon in wakutu tatua, mosia in koontongan moseha-sehat nongkon bayongan in tayowmobiag inta nokaan kon kaanon inta notongkai in kaanon i datu.

¹⁶ Pinangkoi kon tua moḷoḷukad tatua diádon nogoḷud kon i monia in kaanon bo inumon inta sinantú i datu, táe tongádon inogoian in kuyat bo tubig.

¹⁷ Ki Allah in nobogoi kon inaya opat in hikmat bo kototaau kon noyagi-yagimai in pais. Koḻikud intua ki Daniel inogoian doman in pandoi moginsilang kon mangaḻe in oontongon bo togoindop.

¹⁸ Kon imbuit in toḷu notaong kon pinobalajaran monia inta ain sinantú i datu, dinia i Aspenas in tayowmobiag mita tatua kon tayowon i Datu Nebukadnezar.

¹⁹ Naonda in nongonguman i monia komintan, nouḻímai i datu kon ki Daniel, ki Hananya, ki Misael bo ki Azarya in noiḷontú kon tayowmobiag ibanea kon bayongan in sinotaau. Dá nomangkoidon in mosia nopobayá in oaidan kon bonu in komaḻig i datu.

²⁰ Pomuḷoi in ki datu mongonguman kon soaḷ inta paraḷuon insilangan bo raion, dá indoianneamai kon tonggina bo tubag inaya opat tua in mopia-pia totok nongkon tonggina bo tubag in bayongan mononoḻindap bo mototaau mita kon bayongan in dodatuannea.

²¹ Ki Daniel in umuranbí nopobayá in oaidan nodapot kon i datu Koresh nongkon Persia nopotungkud in Babel.