AYUB 9 - Alkitab Singog In Mongondow Masa In Tanaa

Ki Ayub

^1-2 Táe ki Ayub in notubag, “Totuu, kinotaauanku, singogmu mita tatua in diábí noitaḷá. Táe, diábí doman intau mopelekara moḷawang kon i Allah bo monaḷow kon i-Nia?

³ Toribu in ḻibóon i Allah, tobatúmai diábí in kotubagan in intau.

⁴ Ki Allah tua in totokbí in moarip bo mokawasa; ki ine in mokotongod in moḷawang kon i-Nia?

⁵ Ki Allah in momamping kon buḷud takin diábí kotaa-taauanmai in intau, bo mopokaḻintuang pongin torú bo rogi.

⁶ Baḻíon i Allah in ḻinug nodapot in nodandú in butá naa, bo oigi tumbok in dunia modandú totok,

⁷ Ki Allah in motaaubí mogimaḷow kon mata in singgai in diá momuká kon dodai in doḷo-doḷom, bo diá mobogoi kon tundi mita monindar kon tungkuḷ in doḷom.

⁸ Binuká-Nea in toḷungayá bo diábí in notuḷung; iritakan-Nea in ḻikud in naga in dagat.

⁹ Sinampat-Nea in tundi mita in toḷatan kon ḷangit, bo tundi doman Biduk, tundi Belantik bo tundi Kartika.

¹⁰ Diá komangaḻean naton in bayongan in oaidan-Nea, diábí in kita mokoiap kon aid-Nea mita inta mokoherang.

¹¹ Sia in sinumaḻib kon tayowonku, táe diá inontongku; Sia in sinumaḻib kon sikumai, táe diá doman noniatakumai.

¹² Aka Sia in mogagow, yo ki ine in mokobaḻí mogimaḷow kon i-Nia? andeka mokobaḻí moḻibó kon i-Nia, ‘Ei, onu in aidan-Mu?’

¹³ Ki Allah in diábí motagú kon torú bo patú in gina-Nea; mototuḷung mita i Rahab in noondok doman kon i-Nia.

¹⁴ Dá naondabí in akuoi mokobayow kon i-Nia? Tosingogon naonda in potubagku kon i-Nia?

¹⁵ Umpaka akuoi diá kotaḷá, onu in dayaku, koḻikud in mopoigum in totabi kon i Allah hakimku?

¹⁶ Aka kuma bo Sia in motubag aka akuoi mokuani, moḻia-ḻiaw in ginaku, totuu degá kon moibog in Sia mokidongog kon singogku?

¹⁷ Sia in nomutú kon inakó pinongin deḷang, bo nodugang kon rorigaku takin diá in kinodoyonan.

¹⁸ Diábí pinomayá-Nea in akuoi mogina umpaka tongá motoyong; nodapot in pinopoumaan-Nea akuoi in inta mopait totok inta motoyang.

¹⁹ Degá musti in akuoi moropatoi takin-Nea? Táe indoian, totuu motoyang in ropot-Nea! Aka kuma bo pongaduku in Sia, ki ine in kobaḻí mogoiní kon i-Nia mayá in pongadilan?

²⁰ Akuoi in motoindudui bo diá nogaid kon dosa, táe bibigku naonda bo moguman kon inta noyoposi kon tua; pomuḷoi in singog inta momuká kon bibigku, naonda bo mopotaḷá kon inakó.

^21-22 Akuoi in diábí kotaḷá, táe diábí pandungonku. Mobúdon in akuoi in mobiag. Aka kon inakó yo diádon in moponting; inta kotaḷá bo inta mobanar, notongkaibí in kobiagannea: Tumpaḷabí yopúon i Allah in taya dua.

²³ Aka intau inta diá kotaḷá bo modaḻí matoi, ki Allah in tongábí kumosing.

²⁴ Dunia in inogoi i Allah kon inta mongoraat, bo hakim mita binilogan-Neadon komintan. Ki Allah in nogaid kon bayongan tanaa, aka deeman Sia, yo ki inepa?

²⁵ Singgaiku mita moitaḻib moḻikat totok, bo moḷagui takin diá in sanang.

²⁶ Naonda bo uangga moḻikat, kobiaganku moitaḻib moḻikat totok, ná koḻikat in ḷagapan boniá monampí, modomok kon kokaanonnea.

^27-28 Aka akuoi moibog momomi bo kumosing moḷunganga, aka tungkuḷanku moḻiong kon bayongan in roriga, dá roriga in ginaku moiangoidon bui, mogaḷow kon inakó; sin kinotaauanku, ki Allah in umuranbí mopotaḷá kon inakó.

²⁹ Dá, aka natua, onupabí in motaauku aidan?

³⁰ Diábí in sabong in mokodarit kon dosaku!

³¹ Sinagom i Allah in akuoi kon yoyatan, dapot in ḷambungku monganggapdon kon inakó mokorongó.

³² Aka kuma bo ki Allah tua in intaubí, yo kotubagankubí in Sia; bo kami in mayá in pongadilan sin mopoyotutui in bayongan in rogenggeng.

³³ Táe kon sigad nami diá in hakim inta motaau mopoyotutui kon inaminda.

³⁴ Igumon mako ki Allah mogogai in mohukum kon inakó bo mopoyayú in kotoyangan-Nea nongkon inakó!

³⁵ Akuoi in diábí moondok kon i-Nia bo mosingog in tanaa, sin akuoi in nonotaau kon ginaku tontaní.