AYUB 8 - Alkitab Singog In Mongondow Masa In Tanaa

Ki Bildad

^1-2 Bo nosingogdon in ki Bildad, “Modapotpa in toonu in iko in mosingog natua? Singogmu mita naonda bo tompot inta mogirup moropot.

³ Ki Allah in diábí kon dodai in onda in momelung kon koadilan; diábí kon dodai in onda in diá mokoposindog kon inta mobanar.

⁴ Degá ki adímu mita in binaradosadon kon i-Nia, dá patusbí in mosia ihukum-Nea.

⁵ Táe aka Iko moniung kon i-Nia, mopoigum in totabi bo mopoigum in ampung,

⁶ aka ginamu mojujur, diá in noitaḷá, ki Allah in ḷagibí motuḷung kon inimu, bo mobaḻí tontuḻínea, tonibuḷoimu in buidon tompiaan.

⁷ Kaoyúonanmu inta nobuḻi tua in diábí in mangaḻenea poyotongkaionmai kon onu in inta bain bui mouḻímu.

⁸ Intau moarip tungkuḷ intua musti indoianmu, bo tano-tanobonmu in pongalaman in mogoguyang.

⁹ Kobiagan naton in notoyong, kita in diábí nonotaau kon onu bo onu; singgai mita naton naonda bo oḻinow.

¹⁰ Indongogaipa in singog in intau moarip tatua koḻipod, mosia in nobogoi in totundú tanaa kon inimu,

¹¹ ‘Tongábí kon tampat inta oyúon in tubig mobiag in bumbung; bakung in tongábí mobiag kon butá inta noyoná.

¹² Aka moingkag in tubignea, bumbung tua in matoibí, moiunabí kon pinomuḷa ibanea. Bokaka noḷumbápabí bo deemanpabí wakutunea, sia in pongkóon bo popobaraguna.

¹³ Natuata in intau inta diá kotuhan. Sia in nokoḻiong kon i Allah, dá nobuḻidon in kamang.

¹⁴ Siningkoi tougat inta moḷukó tua in pongongatanea; baḷom-baḷoi in tontoḷawá in nobaḻí oandoḷannea.

¹⁵ Moropot degá in pugad tatua aka baḻíon oandoḷan? Mokotahang degá in siningkoi tatua aka baḻíon kokadaian?’

¹⁶ Naonda bo padang, mosehat in intau inta diá kotuhan; aka sindaran in singgai, mobiag in sia moḷumbá bo momuḻing kon gobá.

¹⁷ Uakatnea in moikeket kon batu mita kon butá; moikeket totok, diábí mogampang motundan.

¹⁸ Táe, tungkuḷaika, rabut in tanaa mako in padang tatua, dá naonda bo diábí kon dodai in onda in sia in kon tua.

¹⁹ Oo, kasanangan in intau moraat tongábí tua; intau ibanea in mamangoi bo monoḷuan kon inia.

²⁰ Táe ki Allah in diábí kon dodai in onda in monaḷámai kon intau inta motoindudui, bo diábí doman kon dodai in onda in Sia in motuḷung kon intau moraat.

²¹ Bibigmu in baḻíon-Neabí kumosing, bibigmu in modondongbí takin pia in gina.

²² Intau inta mondoí kon inimu in mooyábí bo morasa kon moompádon, bo baḷoi in intau moraat in poguyaatonbí modapot in moyopú.”