AYUB 7 - Alkitab Singog In Mongondow Masa In Tanaa

¹ Intau tua in naonda bo pinakisa mogaid kon oaidan; mobogat in kobiagannea naonda bo kobobiag in intau noniguan;

² naonda bo ata inta mogoḷat mako kon totuḷung; naonda bo mogogaid inta mogoḷat mako kon tondan in pinogaidannea.

³ Kon buḷanannea kobiaganku diá in mangaḻenea; muḷoi in doḷom ginaku mopuḻing in robonoḷ.

⁴ Aka akuoi mayá mosiug, doḷom moonggot mobayag; kotanobanku in bayag, diá mopia in mosiug in korasaanku.

⁵ Awakku nopuḻing in oḷuasi bo dugú pongukudan; kuḻitku sinompaḻían bo ḷuaian in bobog.

⁶ Kobiaganku inta diádon in kamang ḻimikat in mopobayá in imbuitnea, noiḻiu kon ḻikat in intau mogogaboḷ moburow kon gogaboḷannea.

⁷ Toropdon, o Allah, kobiaganku in tongábí tompot poginaan; kobiaganku inta mopia in nobuḻi, diá in toimpaḷot.

⁸ Tanaa Iko in noindoi kon inakó – táe diábí noonggot intua. Aka akuoi bain tayakon-Mu, dá diá bidon.

^9-10 Naonda bo goḷom inta ontongon mako bo mayádon, intau in matoi domandon, diá bidon mobui mangoi. Bayongan intau inta nokoimontandon nonotaau kon inia, mokoḻiongdon kon inia bo diá bidon toroponnea bui.

¹¹ Tuamai akuoi in diá bidon motaau in tongá kibio-biómai! Pomporí bo pait in ginaku in diábí motaau bunionku. Mustibí in akuoi mobuká kon bibigku, bo mopoḷuai in onu in kon bonu in ginaku.

¹² Nongonu sin akuoi in umuranbí indoian-Mu bo ḷukadan-Mu? Eta degá akuoi naa naga in dagat inta mokoanib?

¹³ Akuoi in inumuḻid bo monungkuḷ mopoguḻí in ḷopí; akuoi in mopogaan in ginaku inta mokayow.

¹⁴ Táe gogondokon-Mu in akuoi in togoindop; Popoangoi-Mu in togoindop moraat bo gina ḷumayang.

¹⁵ Dá moibo-ibogbí in akuoi tagangan bo matoi bo dika in mobiag kon bonu in awak nopuḻing in roriga naa.

¹⁶ Moḷopí bo mobú in akuoi in mobiag; moibogdon in akuoi in matoi! Pomayádon mako in akuoi, sin diá in mangaḻe in kinobiaganku.

¹⁷ Nongonu sin intau in mopontingbí kon ini-Mu? Nongonu sin dodianea in umuranbí taridian-Mu?

¹⁸ Tantú-Mu angoion taridian in sia pomuḷoi in doḷo-doḷom, bo pomuḷoi mako tungkuḷan-Mu in sia.

¹⁹ Degá toonu in Iko mobobui kon inakó, dá moiḻiomdon in akuoi kon ibogku?

²⁰ Ei moḷoḷukadku, morugi degá in Iko popisí in dosaku? Nongonu sin tanáan-Mubí mako in piot-Mu in akuoi? Degá mobogatdon totok in aidku kon ini-Mu?

²¹ Diádon degá mokoampung in Iko kon dosaku? Diádon degá in Iko mokopopat kon taḷáku? Diádon moonggot bo akuoi moiuḻid kon bonu in poḷoḷobongan, bo aka tayakon-Mu in akuoi, diá bidon mouḻí-Mu.”