AYUB 5 - Alkitab Singog In Mongondow Masa In Tanaa

¹ Pomaḷúdon, ei Ayub, oyúon degá in motubag? Malaekat táonda in pokituḷunganmu?

² Tongábí intau inta bodok in matoi dinia in nakit in ginanea.

³ Nokoimontandon inontongku in intau bodok; kobiagannea koontongan moroton totok. Táe nodaḻídon kinutukku in pinogutunannea.

⁴ Dá ki adínea mita in diábí nokoimontanmai in sinuḷungan; doíbí in moibog moduḷu kon i monia kon pongadilan.

⁵ Onu in batunon monia kon gobánea, nodait kinaan in intau inta diá in bonu in siannea. Nodapot in gandum inta kon yuak in dugi, nodait kinaan in intau inta ginogoi. Kapunyaan bo kaoyúonan monia umuran tarapon mako in intau inta moibog in kapunyaan.

⁶ Deemanbí nongkon dunia in momuká in moraat; deemanbí nongkon butá momuká in roriga.

⁷ Deeman! Táe intaubí tontaní inta mopoangoi in bodito kon inia, naonda bo rosik in baga in tuḷú momukábí nongkon tuḷúnea tontaní.

⁸ Aka akuoi in ná kaadaanmu, yo mokuanibí in akuoi kon i Allah. Kon i-Nia in popongaduanku, poḷat moposarakan in pelekaraku.

⁹ Aid mita i Allah diá in poḻiuan; diábí komangaḻean naton intua. Inta mokoherang mita inta inaidan-Nea, diádon koiapan bo diábí modait-dait.

¹⁰ Sia in nopoangoi in uyan kon tudu in butá, dá gobá bo rawang nobuntad sin kinouyanan.

¹¹ Siabí in ki Allah inta nopoḷantud kon intau inta moompá in dodia, bo moposanang kon intau inta noyoyiga.

^12-13 Iḷamboian-Nea in tomayá in intau diá motuḻid in gina, dinomok-Nea in intau inta mobarong in akaḷ, dá bayongan inta iḷongasi monia in diá motuoi, bo mosia in kinoakaḷan bui in uboḷ monia tontaní.

¹⁴ Kon tungkuḷ in singgai mosia kokoḷoban in sindip, mongokap naonda bo doḷom.

¹⁵ Táe ki Allah in noposaḷamat: kon intau nobogá nongkon kopatoian, kon intau inta moyangkó nongkon pinononggataan.

¹⁶ Tanaa in oyúonpa bui in kamang kon intau inta diá koonu bo onu. Bo intau moraat in tongádon kibio-biómai diádon moposingo-singog, sin pinomponandon i Allah in bibignea.

¹⁷ Nomujurdon totok in iko aka ki Allah nonoboḷow kon inimu! Dika moyaat in gina aka torúan-Nea in iko.

¹⁸ Sin ki Allah in mopouma in takit, yo Siabí doman in mongundam. Bo ḻima-Nea inta nosambok, in inta bui momidai.

¹⁹ Aka anib bo mopogogondok, iko in umuranbí posaḷamaton.

²⁰ Aka koantugan in malarat in kaanon, yo iko in diábí matoi in gogoy. Aka parang motoyangdon totok, yo iko in moiyayúbí kon popatoi.

²¹ Iko in ḷukadanbí nongkon tapud bo ouman inta diá totuu; sinayowanmu in bodito takin diá moondok.

²² Aka aid moromú bo gogoy moibaba, yo motababí in iko bo tongábí kumosing. Iko in diábí moondok bo moḻia-ḻiaw in gina, in tumayow kon biag moraat inta morogi.

²³ Gobá tudunea inta pinajekomu in diábí in batunea; biag kaḻig in diábí mogaḷow kon inimu.

²⁴ Iko in moamanbí in mogutun kon ḷoḷaiganmu; bo aka indoianmu in dombamu mita, yo komintanbí nosaḷamat, diábí in nogaat.

²⁵ Ki adí bo ki ompumu in diá bidon koiapan, mosia in nádon kobayong in bonok kon rawang.

²⁶ Naonda bo gandum inta noḷutú, iratab kon wakutunea, iko in mobiagbí doman mopia modapot in mogoguyang.

²⁷ Ayub, tua komintan in aindon sinaridian nami. Totuubí in tosingogon tatua, dá tarimadon mako.”