AYUB 41 - Alkitab Singog In Mongondow Masa In Tanaa

¹ Mokodomok degá in iko kon i bangkeḻé Lewiatan, tongá momaké in kail in toyá? Kotokiganmu degá in dilánea tongá mopomaké in tontogot mita potogot?

² Mokobaḻí degá in iko mopouḷak in tontogot kon ngiungnea andeka mopokaud in kokaud uatoi kon ayoinea?

³ Degá mopoigum in sia kon inimu sinbá buḻianmu? andeka moyosingogmu, mopoigum in totabi?

⁴ Degá in sia mogaid kon yopakat takinmu, bo modandi kon umuran mobantung kon inimu?

⁵ Degá togotonmu in sia ná motogot kon ḷagapan inta biniagmu, inta mokosanang kon bobantung mita bobay?

⁶ Degá sia in potaḷui in intau mita inta mododomok kon toyá bo silaion magí-mako kon intau mita mopopotaḷui?

⁷ Koturakanmu degá in kuḻitnea mopomaké in pandong toḷu in matanea andeka takuḷonmu in sia in ginubat inta moiḷambai kon uḷunea?

⁸ Ḻiaidon in sia komintanpa, bo diá bidon iko moḻiai bui; poropatoian tatua in diábí koḻionganmu modapotkabí in toonu.

⁹ Bayongan in intau inta mokoontong kon Lewiatan, in mobaḻíbí moḻemé bo moumpag togopuḷongon.

¹⁰ Rumogi in sia aka guḷungon kon siugnea; diábí tobatúmai intau in mokobaḻí simindog kon tayowonnea.

¹¹ Ki ine in mokobaḻí monayow kon inia bo diá tompaḻían? Kon dunia naa diábí in mokoaid kon natua.

¹² Igai bá oumanonku in bayongan awak in Lewiatan, pinomayá ropotnea bo batangannea inta moḷunat.

¹³ Diábí tobatúmai in intau in mokoberak kon ḷambung ḷuainea andeka mokoḷambai kon ḷambung in parang inta pinakénea.

¹⁴ Ki ine in mokobuká kon tungginea inta moropot, inta nopuḻing in bagang mita mongoroton?

¹⁵ Naonda bo kaḻeaw inta nopipid, tuata in ḻikudnea noikompit nodagin, ná batu in kotogatnea.

¹⁶ Moyoguntuḷ, noitogot nodagin, dá umpaka tompot diá mokotuot.

¹⁷ Kaḻeaw tatua in moropot totok noyokaan dá diábí kopoyotontanían.

¹⁸ Aka Lewiatan mobaan, moisangket in sindar; matanea in mopouḻi-uḻinag naonda bo pomukaan in singgai.

¹⁹ Renté in tuḷú moiroput nongkon bibignea; baga in tuḷú moirosik magí-mako.

²⁰ Poyok in mosipun nongkon bonu in ngiungnea, ná poyok in kayu inta pinondudub kon siup in kuyon.

²¹ Poginaannea in mokodokot kon baga; dokot in tuḷú ḷumuai nongkon bibignea.

²² Sindunnea in moropot totok, dá modait moondok in kon tayowonnea.

²³ Diábí in noḻemé kon kuḻitnea; diábí mokobotak sin motogat naonda bo uwaja.

²⁴ Ginanea ná kotogat in batu, diábí kotaauannea in ḻia-ḻiaw in gina moroton bo motogat ná batu poḷoḻintog.

²⁵ Aka simindog in sia, intau inta totok in moropot in koinggamáan doman in baraninea, kinodaitan in daya popisí in moondok totok.

²⁶ Diábí in pitow in mokotompaḻí kon inia; pandong, piot andeka ginubat in diábí mokonakit kon inia.

²⁷ Uatoi in inanggapnea tongá ná koaḷus in bonok bo bitú in nádon korugá in kayu inta noampod.

²⁸ Diábí in piot in mokountun kon inia; batu inta pinogandur kon inia tongá naonda bo wawa.

²⁹ Bobobak inanggapnea bonok noingkag tougat; kumosing in sia aka intau moponakuḷ in ginubat.

³⁰ Unap kon siannea naonda bonsig in botoḷ inta moḷanit. Naonda bo pakakat pomomupuḷ sia in nongari kon yoná bo binotaknea.

³¹ Dagat kinauinea dá naonda bo tubig modidí; naonda bo pansi pinodungúan kon ḷana inta mogoḷagak.

³² Sia in nonaḷámai kon ḻiod in sioḷ inta monindar, dagat binaḷuiannea nobaḻí burá inta mobudó in batangannea.

³³ Kon tudu in butá diábí in mokotaḷow kon inia; mahaḷuk inta diábí koondok, tuata in sia!

³⁴ Mahaḷukpa inta totok in moḷantud yo inanggapnea doman totok in moompá; kon sigad in bayongan mahaḷuk moraat, sia in nobaḻí datu.”