AYUB 40 - Alkitab Singog In Mongondow Masa In Tanaa

^1-2 Ei Ayub, sinontotanmu in Akuoi, ki Allah Inta Totok mokawasa; moibog degá in iko umundok andeka moibog in iko momayow?”

Ki Ayub

^3-4 Dá ki Ayub in notubag kon i Tuhan, “Akuoi in mosingog naonda bo intau bodok, o Tuhan. Onu in motaauku potubag? Diá bidon in onuka in motaauku singogon.

⁵ Noiḻiudon in bayong in siningogku.”

⁶ Bo, nongkon bonu in uḷu in tompot ki Tuhan in nosingog bui kon i Ayub.

Ki Tuhan

⁷ Bo ki Tuhan in noguman kon i Ayub, “Tayowaidon in Akuoi saḷaku ḷoḷaki, bo tubagaidon in bayongan ḻibóon-Ku tanaa.

⁸ Degá bayowanmu in koadilan-Ku, bo mopobanar kon inimu bo mopotaḷá kon i-Nakó?

⁹ Moropot degá in iko ná Akuoi? Degá mokogonugur in singogmu ná singog-Ku?

¹⁰ Ḷambáaidon in awakmu in kaoyúonan bo tangoi moḷantud, pakédon in koagungan bo kololuhur.

¹¹ Indoiaidon in mosia inta mododia in ginanea; poḷuaidon in torúmu bo poompádon in mosia.

¹² Oo, bobuidon in intau inta mokaḷakuang, potungkudon in sia! Rimumudon in intau moraat kon tampatnea.

¹³ Ḷobongdon in mosia komintan kon bonu in ḷobud; kobangdon in mosia kon bonu in dunia intau minatoi.

¹⁴ Dá dayowon-Kubí in iko sin iko in nountung takin ropotmu tontaní.

¹⁵ Taridika in Behemot, ki mahaḷuk tuyá; ná iko, sia in Akuoi doman in nomaḻí. Bonok mita in nobaḻí kokaanonnea, naonda bo sapi bo biag biasa.

¹⁶ Táe indoiaika in ropotnea kon bonu in awaknea bo ropot kon tapúnea mita!

¹⁷ Pinobanderanea in iputnea naonda bo pangkoi in aras, tapú mita in paanea moroton bo motogat.

¹⁸ Tuḷannea mita in moropot naonda bo bitú, sioḷnea in motorindog naonda bo uwaja mita.

¹⁹ Kon sigad in bayongan mahaḷuk-Ku siabí tua inta totok in mokoherang; tongábí ki Inta Nomia in mokopotungkud kon inia!

²⁰ Kon buḷud mita tampat in biag mita ḻindong moyambá takin pia in gina, nobiagdon in bonok inta kokaanonnea.

²¹ Sia in nosiug kon ḻimonag in bonok dodugian, kon yuak in bumbung kon yoná mita nogadop in sia.

²² Bonok dodugian nogoḻingoi kon inia nongkon oḻinownea mita. Pangkoi in gandarusa kon bingkí in ongkag nogoḻiung kon inia.

²³ Diábí in sia moondok umpaka Ongkag in Yordan inta totok in motoḷog, sia in umuranbí diá moondok umpaka tubignea moitampurang kon pogotnea.

²⁴ Ki ine in mokobaḻí momompon kon matanea, bo modomok kon inia poḷat motokig kon tungginea?