AYUB 37 - Alkitab Singog In Mongondow Masa In Tanaa

¹ Deḷang in nokopomuká kon ondok in ginaku bo putúku in modoḷodok.

² Indongogai in singog i Allah, ei bayongan monimu; indongogai in gotup inta iḻumuai nongkon bibig-Nea.

³ Kon sinangkub in ḷangit, binuḻian-Nea in kilat; pinoki dia-Nea in batu in gotup kon popod mita in dunia.

⁴ Onda intua, kinodongogandon in singog-Nea mogonugur, gotup mopodongog doman in gonugur in singognea; bo kon yuak in singognea inta mogonugur, batu in gotup mongilat in monampí.

⁵ Pinodoyon in parenta i Allah, dá nobaḻí in mujizat, inta mokoherang mita inta diá kinotaauan naton.

⁶ Salju noḷabú kon butá sin pinarenta-Nea; uyan morogot namangoi sin pinotabá-Nea.

⁷ Pinogogai-Nea in oaidan in intau, sinbá kotaauan monia kon Sia in koyogot mogaid.

⁸ Bo biag ḻindong in tumuot kon bonu in bubú bo angob, bo mogadop kon bonu in pugadnea.

⁹ Nongkon toḷatan ḷumuai in tompot moropot bo nongkon utuan mamangoi in tumping.

¹⁰ Poginaan i Allah mokotogat kon tubig inta mobayong, binaḻí eis inta motogat.

¹¹ Ḷokutoi dinatogan-Nea in tubig, bo goḷom in monindar sinimbayagan in gotup.

¹² Goḷom mita in ḷumayug kon sinangkub in dunia, podudui in parenta i Allah kon i monia mayá in bayongan tampat.

¹³ Ki Allah in nobogoi in uyan sin momuntad kon butá, andeka doman mohukum kon umat intau; degá mopoontong doman kon i monia, kon totuu moḷoben in tabi-Nea inta mononoi.

¹⁴ Kibio-biópamai topiḻik, uḻe Ayub, bo indongogaipa; taridiai in inta mokoherang mita inta pinomia i Allah.

¹⁵ Kinotaauanmu degá mongo naonda in pomomarenta i Allah, dá kilat in monindar nongkon goḷom bo ḷokutoi?

¹⁶ Kinotaauanmu degá naonda in goḷom moiḷayug bungai in aid i Allah inta mokoherang totok?

¹⁷ Diá, iko in tongábí motaau mogamui sin mopatú aka butá dapúon in tompot in toḷatan.

¹⁸ Motaau degá in iko mobaḻí ná ki Allah mobuká kon toḷungayá bo mopotogat naonda bo logam andeka posilag?

¹⁹ Tundúpa in kami onu in musti poguman nami kon i Allah; diábí in motaau nami insilangan, raian nami naa in diá in bonunea.

²⁰ Doíbí in akuoi mopoigum mosingog kon i Allah dika-dikabo oyúon in kodoyonan-Nea in mopobodito kon inakó.

²¹ Tanaa in sindar in ḷangit totuu mobayag dá mokotuḷowdon kon mata; tompot in mogirup mondarit kon ḷangit.

²² Sindar mopodara-darag nomuká nongkon utuan, bo kamuliaan i Allah mokoherang kon gina naton.

²³ Totuu kon moḷoben in kawasa i Allah naton; diá mokosanggup in kita in dimiug kon i-Nia, Sia in mojujur bo umuran moadil; diábí kon dodai in onda in Sia in mondorot kon intau.

²⁴ Tuamai in patusbí in Sia horomaton i inekabí, bo intau inta mongaku moarip, diábí pinandung-Neamai.”