AYUB 34 - Alkitab Singog In Mongondow Masa In Tanaa

^1-2 Iko nion in mopandoi bo mobayong in akaḷ? Dá, indongogaipa in bayongan tosingogonku tanaa.

³ Kotaauan in intau kon kaanon tua in mopia naonda in konanamannea, bo tosingogon moarip aka indongogannea.

⁴ Pelekara tanaa in musti taridion naton bo raion naton moyotakin.

⁵ Guman i Ayub, ‘Diábí in noitaḷá kon inakó, táe ki Allah in doí mobogoi kon onu in moadil kon inakó.

⁶ Akuoi in inanggap nonguboḷ, sin noguman kon akuoi in diá dinosa. Tanaa in akuoi in pinaḻi-palíanmai, umpaka in akuoi diá kotaḷá.’

⁷ Degá nokoimontandon in moiko nokoontong kon intau ná ki Ayub naa? Sia in mopobui-buimai in mohojat kon i Allah.

⁸ Sia in moibog moyobayat in intau mita moraat bo moyotakin in intau mita mokotor.

⁹ Sia in noguman, kon diábí in mangaḻenea aka sia bo moḷongasi mogaid kon ibog i Allah.

¹⁰ Ei intau mita inta moarip, indongogai! Umpaka dá ki Allah Inta mokawasa totok mogaid kon moitaḷá?

¹¹ Sia in mohukum kon intau podudui in aidnea, mopoaid kon inia podudui in dodianea.

¹² Ki Allah Inta Totok in mokawasa diábí mogaid kon inta moraat; bayongan in intau inogoian-Nea koadilan.

¹³ Ki ine in nobogoi in kawasa kon i Allah? Ki ine in nokiḷukad in dunia naa kon i-Nia?

¹⁴ Aka kuma bo ki Allah in morabut kon nyawa in intau, bo mogamá bui kon tompot kobiagannea,

¹⁵ dá matoidon in bayongan mahaḷuk inta nobiag, bo intau in mobaḻí ḷobud ná inta dungkuḷ.

¹⁶ Dá, aka iko moarip, taridiaibí, buká in bongoḷanmu bo indongogaidon.

¹⁷ Degá ki Allah inta moadil bo inta motorindog tua in potaḷáanmu? Degá kainimukamai dá doíbí in ki Allah in moadil?

¹⁸ Ki Allah in mohukum kon datu bo pongawasa aka mosia in moraat bo moromú.

¹⁹ Sia in doíbí dumotá kon datu mita, andeka mopouna in intau nooyúon nongkon intau nobogá. Sin mosia komintan in Siabí in nomaḻí.

²⁰ Moonggot kon doḷom, mosia in motaaubí in daḻí matoi. Ki Allah in mohukum kon pongawasa bo moyopú in mosia; Diábí in roriga-Nea in moḻimod kon intau motorindog.

²¹ Sia in moindoi mako kon kobobiag in intau, inindoian-Nea in bayongan ḷampangnea.

²² Diábí in sindip, umpakabí mopungit totok, in mokobuni kon intau baradosa.

²³ Diá bidon paraḷu in ki Allah monantú kon wakutunea, intau in mamangoi sin adilon-Nea.

²⁴ Diá bidon monaridi bo momirikisa in Sia in mopogogai kon pongawasa bo moduí kon toḻiunea.

²⁵ Sin, kinotaauan-Nea onu in inaidan monia; dá dinudú-Nea bo irimumud in mosia kon dodai in doḷom.

²⁶ Mosia in sinokap-Nea popisí in dosa monia, kon tayowon in intau mita ihukum-Nea in mosia.

²⁷ Sin, mosia in diá dinumudui kon ibog-Nea bo diá mokidongog kon parenta-Nea mita.

²⁸ Mosia in nokopopisí kon inta nobogá morogamui ombaḷ monia inindogogan i Allah.

²⁹ Aka ki Allah in monantúdon kon tongá kibio-biómai, diábí tobatúmai in intau mokobaḻí mosingog kon i-Nia. Aka mogadop in Sia, diábí tobatúmai intau in mokouḻí kon i-Nia.

³⁰ Dá bangusa mita in diá mokopongonu in mogimaḷow kon inta moraat mongawasa.

³¹ Ayub, degá dosamu kon i Allah inakumudon? degá ain nodandi in iko kon diádon bui mogaid kon dosa?

³² Degá nopoigumdon in iko sinbá poontong-Neadon in taḷámu? Nongibotdon degá in iko kon diádon mogaid kon tua?

³³ Umpaka yo indongogan i Allah onu in koibogmu, naonda in aid i Allah diá sinarimamu? Tanaa, iko in musti monantú, deemanbí akuoi. Pogumandon onu in singogonmu!

³⁴ Bayongan in intau moarip notantúbí kon moibog kon tua; intau mobijak inta mokodongog kon singogku in mogumanbí

³⁵ kon ki Ayub in mosingog takin diá momangaḻe, bo tosingogonnea diá in mangaḻenea.

³⁶ Aka tosingogon mita i Ayub bo taridionmai, yo moniatadon kon singognea tua in naonda bo intau moraat.

³⁷ Taḷánea in dinugangandon in tobatú dosa; sia in nomarontak kon i Allah, bo noningkuḻe kon i-Nia kon tayowon naton.