AYUB 33 - Alkitab Singog In Mongondow Masa In Tanaa

¹ Tanaa, uḻe Ayub, indongogaipa kotaridion in singog mita inta potaauku naa.

² Nosadiadon naa in akuoi sin mosingog.

³ Motuḻidbí in ginaku in mosingog; onu in pogumanku tua in sabanarnea.

⁴ Roho i Allah in nomaḻí kon inakó, bo nobogoi in kobiagan kon inakó.

⁵ Dá, aka mokotubag, tubagai in akuoi. Sadiadon in potubagmu.

⁶ Sin kon i Allah, iko bo akuoi in diábí in yoposinea nongkon butá ḷamentong pinomia-Nea in kitada.

⁷ Dá, dikabí in iko moondok kon inakó; deemanbí makusudku monaḷow kon inimu.

⁸ Dinongogkudon onu in siningogmu, bo kinomangaḻeanku onu in makusudmu.

⁹ Iko in noguman, ‘Akuoi in nodarit, diábí in aidku noiḻimpat. Diábí in nokotor bo diábí nogaid kon noitaḷá.

¹⁰ Táe ki Allah in motayak kon kodoyonan moḷawang kon inakó, bo binaḻí-Nea in akuoi saturu.

¹¹ Sia in notogot in rante kon sioḷku; bo umuran moindoi mako kon dodiaku.’

¹² Uḻe Ayub, noitaḷá totok in singogmu! Sin ki Allah in moḷobe-ḷoben in intau.

¹³ Nongonu sin iko in moponapudbí kon i Allah kon Sia in doí mokidongog kon amui in intau?

¹⁴ Ki Allah in mosingog pinongin daḷan noyagi-yagimai, tongá diá tobatúmai in intau nonondudut kon singog-Nea.

¹⁵ Umpaka intau nosiug noḷoḷot kon dodai in doḷom, kon bonu in togoindop bo oontongon, ki Allah in mosingog.

¹⁶ Ki Allah in nopotabá kon i monia mokidongog; sinaḻikokogan-Nea in mosia in toboḷow mita.

¹⁷ Makusud-Nea sinbá mosia in mogogai mogaid kon dosa bo monaḷámai kon kaḷakuang monia.

¹⁸ Diábí pinomayá-Nea mako kinoantugan in inta mokobodito; inoḻingoian-Nea in mosia nongkon kopatoian.

¹⁹ Ki Allah in nonoboḷow kon intau pinongin nopoangoi in takit dá awaknea in modaitdon monakit.

²⁰ Ki inta notakit doídon mongaan, umpaka kaanon inta totok in mopia táe mokototukadon.

²¹ Awaknea irumutuk totok, tuḷannea mita in koontongandon komintan.

²² Sia in gogiódon mobui kon dunia mosindip dunia in intau minatoi noidiugdon kon inia.

²³ Degá tobatú kon sigad in toribu in malaekat i Allah inta moponorop kon intau in oaidannea, in mamangoi sin motuḷung kon inia.

²⁴ Takin tabi in malaekat tatua in moguman, ‘Buḻiaidon in sia, diábí motaau in sia moponag kon dunia in intau minatoi. Naa in doit potobut, sinbá moiḷuatdon bui in sia.’

²⁵ Awaknea in mobaḻídon moropot totok mopia ná awak in tayowmobiag.

²⁶ Aka mosambayang in sia, ki Allah in motabibí kon inia, dá sia in modayow kon i Allah takin ḷunganga in gina bo tompiaandon bui i Allah in kobobiagnea.

²⁷ Dá kon tayowon in intau moantó sia in moguman, ‘Inta moraat inanggapku mopia, moḷobenbí in dosaku, tongá ki Allah in diábí nohukum kon inakó.’

²⁸ Inimaḷowan i Allah in akuoi in mayá kon dunia in intau minatoi, dá nobiagpa in akuoi in tanaa.

²⁹ Mopobui-buimai, aidan i Allah in naa komintan,

³⁰ sinbá Sia in motaau moposaḷamat kon intau bo mobogoi in kopiaan kon kobiagannea.

³¹ Dá indongogaidon Ayub, buká in bongoḷan kibio-biómai, akuoipa in mosingog in naa.

³² Táe aka oyúon in koibogmu singogon, yo singogdon; bo aka iko in totuu, yo ooankubí.

³³ Táe aka diá, kibio-biómaidon bo indongogaipa in akuoi, akuoi in motundú kon hikmat kon inimu.