AYUB 32 - Alkitab Singog In Mongondow Masa In Tanaa

Tosingogon mita i Elihu

¹ Popisí in ki Ayub in noyakin totok kon sia in diábí kotaḷá, dá totakinnea taya toḷu tua in doídon notubag kon inia bui.

² Táe kon tua oyúon in intau inta ki Elihu in tangoinea ki adí i Berakheel, buí i Bus nongkon inanakan i Ram. Sia in diádon nokotahang kon torúnea, popisí in ki Ayub ḷumabit kon totuu in sia bo mopotaḷá kon i Allah.

³ Sia in sinumorú doman kon totakin i Ayub taya toḷu popisí in mosia diádon mokobayow kon i Ayub, umpaka mosia in nopotaḷá kon inia.

⁴ Ki Elihu naa in ai-ai totok kon sigad monia, tuamai in inoḷatnea nodapot in mosia nopaḷutdon komintan nosingog.

⁵ Naonda in inontongnea kon taya toḷu in diádon mokotubag, sinumorú in sia,

⁶ bo nosingog nanaa, “Akuoi naa in noguodpa, bo moiko in nogurangdon, tuamai in moondok in akuoi bo moḻia-ḻiaw in gina in mopoyaput in tosingogonku.

⁷ Iraiku, moikobí in musti mosingog, inta guya-guyang musti mosilai kon hikmatnea.

⁸ Táe inta nobogoi in pandoi kon intau, in tongábí Roho i Allah Inta Totok in mokawasa.

⁹ Intau mobaḻí moarip, deemanbí popisí in nogurangdon in kobiagannea; intau in nonotaau kon inta mobanar, deemanbí popisí in nobarongdon in umurnea.

¹⁰ Tuamai, indongogaipa in akuoi; ogoipa in akuoi mopotaau in tosingogonku.

¹¹ Nosabar totok in akuoi in nokidongog kon dodai in moiko nosingog, bo mogoḷat mako kon dodai in moiko motayak kon tosingogon mita inta mobijaksana.

¹² Totok in sinondudutku mako; dinongogku in moiko diá mokobayow. Taḷá kon tosingogon mita i Ayub diá koponiataan monimu.

¹³ Naondabí in moiko bo motaau moguman kon hikmat ain nouḻí monimu? Popisí in pakisadon moiko noguman sinaḷow. Inta motaau motubag kon i Ayub in tongábí ki Allah.

¹⁴ Kon i monimubí in pinoposingogan i Ayub, deemanbí kon inakó, táe akuoi in diábí motubag ná pinototubag monimu.

¹⁵ Ayub, Moitongau in mosia bo diádon mokotubag; diádon in motaau singogon monia.

¹⁶ Mosia in dongkadon simindog mako, diádon in mokosingog bui. Degá musti in akuoi mogoḷat umpaka mosia tongá kibio-biómai?

¹⁷ Diá, tanaa in tubaganku; tosingogonku in potaauku.

¹⁸ Diádon mokosabar in akuoi in mogoḷat. Diádon mokotahang in akuoi kon tosingogonku mita.

¹⁹ Aka akuoi tongá kibio-biómai, yo mopopar in akuoi, naonda bo botutu inta nopuḻing in anggur nobagu.

²⁰ Akuoi in mustibí mosingog, sinbá mosanang in ginaku; akuoi in mustibí mobuká kon bibigku bo mobogoi in tontubag.

²¹ Diábí in duḷuanku ki ineka kon pelekara tanaa bo diábí doman in dayowonku.

²² Pododuí mita in diábí doman kotaauanku, bo aka aidanku intua, yo Ki Allah in baḷúdon mohukum kon inakó.