AYUB 31 - Alkitab Singog In Mongondow Masa In Tanaa

¹ Pinongin ibot akuoi in modandi mongodeaga moguod diábí bobuionku takin ibog in awak.

² Onu in inaidan i Allah kon inaton? Naonda in pinototuḻí-Nea kon aid in intau?

³ Bodito bo roriga in notantúbí kon poangoi-Nea kon intau inta nogaid kon inta moraat!

⁴ Kinotaauanbí i Allah in bayongan oaidku; inontong-Nea in bayongan ḷampangku.

⁵ Akuoi in mongibot kon diápabí dodai in onda in akuoi nogaid kon noitaḷá; diápabí doman kon dodai in onda in akuoi nonguboḷ kon intau.

⁶ Biódon mako in pononimbangan i Allah kon inakó kon tudu in pososimbangan inta mopia, dá kotaauan-Neadon kon akuoi in diá kotaḷá.

⁷ Aka kuma bo akuoi in sinumabatdon kon daḷan inta moitutui, andeka ginaku noibogdon kon inta mokotor, aka ḻimaku bo nogaidon kon dosa,

⁸ dá biódon mako in intau ibanea mokaan kon onu inta pinomuḷaku, bo bayongan inta pinomuḷaku in mogoguyaat.

⁹ Aka kuma bo akuoi in nokoimontandon nongibog kon i buḷoi in topodiugku, bo umado-adop mako, sinarapku in sia kon ḻikud in ḷoḻingkop,

¹⁰ dá pomayádon mako in ki buḷoiku modungú kon kaanon in intau ibanea; bo pomayádon mako in ḷoḷaki ibanea in mosiug takinnea.

¹¹ Aka dosa inta moraat totok tua bo totuu kon inaidanku, yo patusbí in akuoi motarima kon hukuman.

¹² Dosa tatua in moyompat naonda bo tuḷú in naraka, bayongan in inta kon inakó nodait tubáannea.

¹³ Kon dodai in bobantungku nogamui sin haknea in pinotaḷáku, inindongoganku in sia bo pinoyotutuiku pinongin gina motuḻid.

¹⁴ Aka diá, yo naonda aka akuoi mayá kon i Allahku? Onu in potubagku kon dodai in Sia mamangoi mohakim kon inakó?

¹⁵ Sin ki Allah inta nopobaḻí kon inakó, in nomaḻí doman kon bobantungku mita tatua?

¹⁶ Diápa kon dodai in onda in akuoi in doí notuḷung kon intau inta mokotabi, andeka nopomayá mako kon boba-bobay mita nobiag kinobuḻian in kamang.

¹⁷ Diápa dodai in onda in pinomayáku mako in uno-unon ginogoi, bo akuoi in tongábí pia-pia mako in mongaan tontaní.

¹⁸ Nongkon mointokanpamai mosia in biniagku; kinoouput in kobiaganku kinapitku in mosia.

¹⁹ Aka ontongonku in intau inta diá koonu bo onu, inta diá mokotaḷui kon ḷambung,

²⁰ dá ogoianku in sia in ḷambung nongkon bubuḷ in dombaku tontaní, dá takin gina motuḻid dayowonnea in akuoi.

²¹ Aka kuma bo akuoi in nokoimontandon nopororigamai kon uno-unon, sin moyakin kon mountungbí in kon pelekaraku,

²² dá biódon mako moputoḷ in kokaḷku doyowa nosimpaḷ dá moitondídon nongkon obagaku.

²³ Diábí in akuoi mogaid kon natua, sin hukuman i Allah totok in nokoondok kon ginaku.

²⁴ Diábí kon dodai in onda akuoi in nopongata in kapunyaanku,

²⁵ andeka mongonguman kon kaoyúonanku.

²⁶ Diábí dodai in onda in sinumbaku in mata in singgai inta nonindar andeka buḷan inta nonimbayag nodarit.

²⁷ Diábí kon dodai in onda in akuoi noibog kon inia, andeka inayokanku in ḻimanea sin mohoromat kon inia.

²⁸ Dosa ná tatua in patusbí motarima kon hukuman matoi; sin ki Allah Inta Totok in mokawasa in sinaḷáandon.

²⁹ Diápa kon dodai in onda in nopia in ginaku popisí in musungku nororiga, andeka noḷunganga in gina popisí in nobodito in sia.

³⁰ Akuoi in diábí nosambayang sinbá matoi in musungku; diábí dodai in onda in akuoi nogaid kon dosa natua.

³¹ Intau mita inta nogaid kon inakó nonotaaubí, kon ki inekabí tarimaankubí kon baḷoiku.

³² Baḷoiku in motaaubí pongandupan i ineka; diábí kon dodai in onda bióonku mako in mosia mosiug kon daḷan.

³³ Intau ibanea in mobunibí kon dosanea, táe diábí dodai in onda in akuoi nomia ná mosia.

³⁴ Singog in intau in diábí koondokku, bo rebeg in intau, diábí pandungonku. Diábí dodai in onda in akuoi in tongá kon baḷoi andeka tongá kibio-biómai, tongá popisí in moondok in rebegon.

³⁵ Diá degá in intau in moibog mokidongog kon tosingogonku mita? Mongibot in akuoi kon totuubí intua komintan. Igumon mako ki Inta Totok in mokawasa in motubag kon inakó. Aka kuma bo onu inta pinonapud in musung kon inakó pinais komintan dá koontonganku,

³⁶ dá takin barani potaanonku, bo baḻíonku mahkota inta poḷutudku kon uḷuku.

³⁷ Potaaukubí kon i Allah in bayongan inta inaidanku; tayowankubí in Sia takin barani bo ḷumangag.

³⁸ Aka kuma bo butá inta pinajekoku aindon sinakowku, bo inagowku nongkon itoginea totok,

³⁹ aka kuma bo bungainea in nodaitku kinaan, bo monononggobá inta nomuḷa in pinomayáku mako ginogoi,

⁴⁰ biódon mako deemandon makeang bo gandum in mobiag kon gobá, táe dugidon mita bo padang.” Natuata in tosingogon mita i Ayub.