AYUB 30 - Alkitab Singog In Mongondow Masa In Tanaa

¹ Táe tanaa akuoi in siningkuḻe in intau mita inta ai-aiku mita. Dungkuḷmai ki amá monia inanggapku diá patus moḷukad kon dombaku moyotakin in ungkú moḷoḷukad.

² Kon inakó in mosia tua diá in mangaḻenea popisí in diádon moropot.

³ Mosia in ginogoi bo mororiga totok, dá nokaandon kon uakat inta noingkag kon kayuon inta moingongow.

⁴ Mosia in norabut kon uakat in bonok mita simikayu kon ḷopá moḷoben bo kinaan pinomayá daun andeka uakatnea.

⁵ Mosia in inuntun in singog moropot naonda bo intau noguntun kon mononakow.

⁶ Mosia in nogutun kon bonu in angob mita; bubú mita kon dinding in buḷud nobaḻí baḷoi monia.

⁷ Kon kayuon momaḷú in mosia naonda bo biag, moyosipun kon siungon in bonok inta simikayu kon kayuon.

⁸ Mosia tua in diá in tangoi bo diá in boḻinea, intau mita inta ain binuntun nongkon butánea.

⁹ Tanaa in namangoi in mosia bo akuoi in kinosingannea; kon i monia, akuoi in binaḻíbí monia yambá.

¹⁰ Akuoi in inanggapdon monia mokooyá bo mokorongó, nodapot in pogotku dinuyáan monia.

¹¹ Popisí in binaḻí i Allah in akuoi moyangkó diá kodaya, mosia in mopoaid kon inakó in yaat in gina monia.

¹² Banselang tatua nondangat kon inakó nongkon muna, bo koḷabúanku in sinomayádon monia.

¹³ Mosia in noḷamboi kon bayáanku sin momutú kon inakó; diá in tobatúmai in noḷamboi kon dodai in mosia nonubu.

¹⁴ Naonda bo ḷunud mosia in nondangat kon dinding poḷoḷukadanku; moyotakin in mosia mamangoi mondantug kon awakku.

¹⁵ Inta motoyang pinopoantug kon inakó; naonda bo tompot mogirup, pia in tangoiku noḷabú; naondadon bo goḷom noitaḻib, nobuḻidon in kobiaganku inta mopia.

¹⁶ Tanaa in motoyongdon in akuoi matoi; diádon in singgaan in rorigaku.

¹⁷ Aka doḷom bayongan in tuḷanku mopomporí; tumura-turak diá mooyo-oyong.

¹⁸ Ki Allah in nonagang kon sigogowku dá ḷambungku in noibambé kon awakku.

¹⁹ Akuoi in pinogambat-Nea kon bonu in yoná, akuoi in naonda bo yoyatan!

²⁰ Akuoi in nokuani kon ini-Mu, o Allah, Iko in doí notubag; aka mosambayang in akuoi, diá pandungon-Mumai.

²¹ Moraat in pinogogaid-Mu kon inakó, Iritakan-Mu in akuoi takin bayongan in ropot-Mu.

²² Pinomayá-Mu mako in tompot nopoḷayug kon inakó, kon bonu in tompot moropot pinoḷayug-Mu magí-mako in awakku.

²³ Kinotaauanku, dinia-Mu in akuoi kon bonu in dunia in intau minatoi, tampat pinosipunan kon bayongan inta nobiag.

²⁴ Nongonu sin Iko in nondangatbí kon intau inta nobodito, inta diá mokopongonu koḻikud in mopoigum tabi?

²⁵ Akuoi naa in nongombaḷ noyotakin in intau inta kinoantugan in roriga, bo inta monotabi kon intau inta diá koonu bo onu?

²⁶ Akuoi in mogoḷat mako kon pia bo bayag, táe roriga bo sindipbí in namangoi.

²⁷ Akuoi in pinoguyaat in robonoḷ bo roriga; pomuḷoi in singgai kodugang-kodugang in rorigaku.

²⁸ Kon bonu in sindip, diá in bayag, akuoi in moidondaḷoi; akuoi in sinimindog kon tayowon intau mobayong, mopoigum in totuḷung.

²⁹ Singogku in mokayow mopoigum in tabi ná ombaḷ in ungkú in kayuon bo ḷagapan unta.

³⁰ Kuḻitku in irumondí; awakku in nopokak sin pinonik in patú.

³¹ Koḻipod in dinongogku in musik ḷunganga in gina, tanaa in dongkadon amui pongombaḷan.