AYUB 29 - Alkitab Singog In Mongondow Masa In Tanaa

Tosingogon i Ayub imbuitnea soaḷ pelekaranea

¹ Ki Ayub in nongingguput kon tosingogonnea, kainia,

² “Igumon mako kobiaganku in moibuipa ná koḻipod, kon tungkuḷ in iḷukadan i Allah in akuoi.

³ Akuoi umuran sinuḷungan-Nea, sinimbayagan-Nea kon tungkuḷ in minayá kon sindip.

⁴ Tuata in singgaiku mita inta mopia, kon tungkuḷ in ki Allah noibog noyobayatku kon bonu in baḷoiku.

⁵ Kon dodai intua, ki Inta mokawasa totok nodaginpa kon inakó, bo ki adíku mita in kon ḻibukumai.

⁶ Bobiagonku nobogoi in susu mobarong totok. Mobayong doman in ḷana in pangkoi mita in zaitunku, umpaka pinomuḷa kon butá inta nobarong in batu.

⁷ Aka guyanga mita in kotá ḻimitú moyotakin, bo mogamá in akuoi kon ḷoḻitúan kon sigad monia,

⁸ simídon in intau mita inta mongobagupa, naonda in ontongondon monia in akuoi. Guyanga mita doman in simindog tumompia; sin mohoromat.

⁹ Nodapot in intau mita moḷoben mogogai in mosingog,

¹⁰ bo intaupa in ihoromat in diá doman mosingog.

¹¹ Ki ineka yo moitongaubí in mokodongog kon soaḷ akuoi; ki ine in mokoontong kon inakó, modayow kon aidku.

¹² Sin, sinuḷunganku in intau nobogá inta mokituḷung; ná doman tua in intau mita uno-unon inta diá in mototuḷungnea.

¹³ Akuoi in dinayow in intau inta totok in mosusa, sinuḷunganku in intau mita inta dongka boba-bobay dá nobiag notompia in mosia.

¹⁴ Motuḻid in aidku diábí in noitaḷá; pinosindogku onu inta moadil.

¹⁵ Aka kon intau bilog, akuoi in nobaḻí mata; kon intau ḻempeng, akuoi in nobaḻí sioḷnea.

¹⁶ Aka kon intau nobogá, akuoi in nobaḻí ki amá; kon intau ango-angoi, akuoi in nobaḻí mododuḷu.

¹⁷ Táe kawasa in intau mokotor, pinutoḷku, bo kuruban monia in pinosaḷamatku.

¹⁸ Kamangku in mokouḻí kon umur moḷanggó, bo matoi pia-pia mako kon baḷoiku tontaní.

¹⁹ Akuoi in naonda bo pangkoi in kayu inta nobiag noḷumbá, uakatnea tugat diá kodaitan in tubig bo oḷú momuntad kon tanganea.

²⁰ Akuoi in tantú dinayow in bayongan intau, bo diá kon dodai in onda nogaat in ropotku.

²¹ Intau mita kibio-biómai, aka akuoi mononggina; bayongan in singogku komintan indongogan monia kopiaan.

²² Mopaḷut mako mosingog in akuoi, diá bidon in paraḷu dugangan; tosingogon moitonop naonda bo totuyú in tubig in uyan.

²³ Bayongan in intau motarima kon singogku mita takin sanang in gina, naonda bo monononggobá motarima kon uyan kon sempo in pononobur.

²⁴ Nomomi in akuoi kon i monia kon dodai in mosia kinobuḻian in kamang; pogotku inta nosanang nokodugang kon ropot monia.

²⁵ Akuoibí in nobaḻí itoi, bo nonantú kon bayongan in tosingogon. Diniaku in mosia naonda bo datu kon yuak in tontaranea, bo iḻipoiku in mosia kon bonu in roriga in ginanea.