AYUB 28 - Alkitab Singog In Mongondow Masa In Tanaa

Dodayow kon hikmat

¹ Oyúonbí in pongongaḻian kon saḷaka; oyúon in pototubáan kon buḷawan.

² Uatoi in kinaḻi nongkon bonu in butá; nongkon batu pinoḷoḷayat in bitú.

³ Sindip moḷoben kinoḷopangan, tampat inta moonag totok in sinaridi. Kon tua, kon bonu in sindip, intau in motayak kon batu mita.

⁴ Noiyayú kon tampat inta diá in nogutun, inta diápa kon dodai in onda in iritakan bo binayáan, intau in mogaid takin kumadai kon tontogot kon bonu in bubú inta moingongow totok.

⁵ Butá mobogoi in pakéon in intau, táe kon ḻimonag in butá tatua doman, komintan sinunggai magí mako dá tombonu in butá in notungkauidon.

⁶ Batu kon bonu in butá in batu nilam nobidu, bo ḷobudnea in oyúon in buḷawan taakan.

⁷ Ḷagapan boniá diábí nonotaau in daḷan mopobayá intua, bo ḷagapan mokokaan kon tapú diápa kon dodai in onda in iḷumayug kon ḻimonikannea.

⁸ Diápa dodai onda in singa andeka mahaḷuk moraat ibanea in nongindaḷan noingongow inta mopobayá intua.

⁹ Intau in mongaḻi kon bonu in batu inta motogat totok, kinokainea in buḷud nodapot kon gantognea.

¹⁰ Kon dodai in sia nomia kon bubú poḷambai kon buḷud batu, nokouḻí in sia kon permata inta totok in mopia.

¹¹ Modapot kon uḷuan in ongkag mita in pinongaḻiannea, bo nomukayad kon onu inta noiadop.

¹² Táe kon onda in motaau potayakan kon hikmat? Kon onda in motaau pobalajaran naton sinbá momangaḻe?

¹³ Hikmat in diábí in kon sigad in intau; diábí in nonotaau kon boḻinea.

¹⁴ Gantog mita in dagat bo baḷangon in moguman kon hikmat in diábí in kon inia.

¹⁵ Hikmat in diábí motaau in toḻiuan umpakabí buḷawan taakan, bo umpaka doman uboḻian in saḷaka.

¹⁶ Buḷawan bo permata inta totok in momahaḷ diábí mokotongkai kon boḻinea.

¹⁷ Buḷawan andeka posilag moaḷus in diábí motaau poyotongkaionnea, diábí kouboḻian in buḷawan mogurang.

¹⁸ Hikmat in moḷantu-ḷantud komintan in boḻinea nongkon merjan, kristal, andeka mutiara.

¹⁹ Batu topas taakan bo buḷawan totokanea, kon ḻimonaganbí in boḻinea nongkon hikmat.

²⁰ Kon onda degá in pangkoi in kabijaksanaan? Kon onda in kouḻían naton kon komomangaḻe?

²¹ Diábí in mahaḷuk nobiag in nokoimontan nokoontong, nodapot in ḷagapan kon ḷangit diábí nokoontong.

²² Popatoi bo koyopúan in noguman doman, mosia in tongábí nokodongog kon singog mita inta diá in mangaḻenea.

²³ Tongábí ki Allah in nonotaau kon tampat in hikmat, tongábí Sia in nonotaau kon daḷan mopobayá intua,

²⁴ sin Sia in nokoontong kon popod mita in dunia; bayongan inta kon ḻimonag in ḷangit sinaridian-Nea mako.

²⁵ Kon dodai in tompot inogoian-nea in ropot, bo sinantú-Neadon in sigad mita in baḷangon;

²⁶ kon dodai in sinantú-Neadon in tampat koḷabúan in uyan, bo daḷan inta sinaḻiban in kilat bo gotup;

²⁷ kon dodai intuata hikmat in inontong-Nea, sinungkuḷan-Nea in boḻinea, bo sinantú-Neadon.

²⁸ Ki Allah in noguman kon intau, “Sinbá mokouḻí kon hikmat, ki Allah in musti horomaton monimu. Sinbá momangaḻe, inta moraat musti poyayúon monimu.”