AYUB 27 - Alkitab Singog In Mongondow Masa In Tanaa

Ki Ayub

^1-2 Ki Ayub in nongingguput kon tosingogonnea, kainia, “Pinodoyon kon i Allah inta nobiag, inta diá nobogoi in moadil kon inakó,

³ akuoi in mongibot: Aka ki Allah mobogoipa in poginaan kon inakó, aka dimukud notobatúpa in awakku,

⁴ bibigku in diábí mosingog kon uboḷ, diláku in diábí moguman kon ponguboḷ.

⁵ Dá, doíbí in akuoi moguman kon totuu in moiko; modapot in matoi umuranbí in akuoi moguman kon akuoi in diá kotaḷá.

⁶ Akuoi in umuranbí kumadai kon kotoinduduiku, bo ginaku naa in umuranbí doman modarit.

⁷ Igumon mako musungku in hukumon baḻíon intau inta nogaid kon moraat, bo ḷawangku in bongkugon baḻíon intau inta mokotor.

⁸ Oyúon degá in kamang kon intau binaradosa kon dodai in ki Allah monuntut kon dimukudnea?

⁹ Indongogan degá i Allah in ombaḷnea aka koantugan in roriga in sia?

¹⁰ Musti in sia mopoimoḷat mako kon kobobiag mopia nongkon i Allah, bo diá moḷopi-ḷopí in mosambayang kon i-Nia.

¹¹ Moiko in tundúonku kon kokokawasa i Allah, potaauku kon inimu in tomayá i Inta Mokawasa totok.

¹² Táe, moiko komintan ain nokoontong tontaní. Dá, nongonu sin moiko in mobogoibí in tonggina inta diá in mangaḻenea?”

Ki Zopar

¹³ Dá ki Zopar in nosingog, “Nanaa in pogogaid i Allah Inta Totok in mokawasa mohukum kon intau inta moromú bo moraat.

¹⁴ Aka ki adínea mobayong, yo mosia in matoi kon bonu in parang bo adí bo ompunea in mobiag mobogá.

¹⁵ Ginaḷumnea inta mobiagpa, in matoi popisí in yampoi, bo diábí ombaḷan i baḷunea mita in mosia.

¹⁶ Aka sia in nosipun kon saḷakanea mobayong bo ḷambungnea in moguntu-guntuḷ,

¹⁷ táe saḷaka bo ḷambung tatua komintan in mobaḻíbí kapunyaan in intau inta motuḻid in gina.

¹⁸ Baḷoi in intau moraat in moyapak naonda bo baḷom-baḷoi in tontoḷawá, tongábí baḷoi pongongandupan naonda bo ḷuḷung in moḷoḷukad.

¹⁹ Sia in mosiug saḷaku intau nooyúon, táe sia in diá motaau mopobui-buimai, Kon dodai in sia mobangon nongkon pinosiugannea, nobuḻidon komintan in kaoyúonannea.

²⁰ Inta motoyang noidantug naonda bo ḷunud moḷoben inta daḻí noiangoi. Tompot moropot kon dodai in doḷom nogirup nodia kon inia minayá.

²¹ Tompot in pomukaan nobuat kon inia, bo nonimpat kon inia nongkon baḷoinea.

²² Sia in dinangatan takin diá in tabi, bo nopakisa notayak kon pogadopan.

²³ Kinoḷabúannea sinomu ginoḷokapan in intau; kon bayongan tampat siningkuḻe in sia.”