AYUB 26 - Alkitab Singog In Mongondow Masa In Tanaa

Ki Ayub

^1-2 Táe ki Ayub in noguman, “Totuu mopia in pototuḷungmu kon inakó intau inta moyangkó bo mororigadon!

³ Totuu mopia in tonggina bo topotundú tatua inta ain inogoimu kon inakó, intau inta pompuḷong!

⁴ Ki ine in popoyaputanmu in singog ná tatua? Ki ine in nopotorop kon inimu mosingog natua?”

Ki Bildad

⁵ Tubag i Bildad, “Intau mita kon dunia in intau minatoi mourot; tubig bo inta nogutun momanseḷ.

⁶ Kon tayowon i Allah, dunia in intau minatoi nobukat, diá noioḻingoi dá koontongan-Nea.

⁷ Ki Allah in nobuká kon ḷangit, kon ḻimonikan in baḷangon, bo nobambé kon butá naa kon tampat inta diá in onu bo onu.

⁸ Goḷom in dinatogan-Nea in tubig inta mobayong totok, táe goḷom in diábí noyabi umpaka mobogat.

⁹ Binuni-Nea in pogot in buḷan tuḷud kon ḻikud in goḷom inta ain binuká-Nea.

¹⁰ Ginambar-Nea in inta noḻimbung kon tayowon in baḷangon sin mopoyotondí in bayag nongkon sindip.

¹¹ Aka Sia in mongguak pinongin singog modorasing, oigi mita pinotumbok kon ḷangit in mogugur.

¹² Baḷangon pinotungkud pinongin kawasa-nea bo ki Rahab in binongkug doman in pandoi-Nea.

¹³ Tompot poginaan-Nea nonimpat kon ḷangit nodapot in notarang totok; ḻima-Nea in noḻimod kon naga inta ain moḷagui.

¹⁴ Táe bayongan intua tongábí nobaḻí tomponuot in kawasa-Nea; tongábí gombong inta nodapot kon bongoḷan naton. Totuubí mobabow in komomangaḻe naton kon i Allah bo kotoyang in kawasa-Nea!”