AYUB 23 - Alkitab Singog In Mongondow Masa In Tanaa

Ki Ayub

^1-2 Táe ki Ayub in notubag, “Akuoi in nomarow bo nogamui kon i Allah; diá in akuoi mokotahang kon roriga.

³ Ah, igumon mako in kotaauanku in tampat-Nea, sinbá motaau in akuoi mayá bo moyodungkuḷ-Nea.

⁴ Dá diaanku kon tayowon-Nea in pelekaraku, nongkon bibigku naa singogonku in tosingogon pomayow.

⁵ Moibog in akuoi monotaau mongo onu in singogon-Nea, bo naonda in pototubag-Nea.

⁶ Degá umuran in Sia mopobayá in kawasa-Nea kon inakó? Diá! Notantú bidon kon indongogan-Neabí in singogku mita.

⁷ Akuoi in diábí kotaḷá bo mokobayowbí kon tayowon-Nea, dá akuoi in poniatadon kon noiḷuat modapot in mononoi.

^8-9 Tayakonku in ki Allah kon pomukaan, kon toyopan, kon toḷatan, kon utuan, táe kon ondaka in bayáanku diábí in Sia; bo diábí nouḻíku in Sia.

¹⁰ Táe kinotaauan-Neabí in bayongan in daḷanku bo bayongan in ḷampangku. Aka ná buḷawan akuoi in sinoba, yo moniatabí kon ginaku in nodaritbí.

¹¹ Akuoi in motoinduduibí kon i-Nia takin satia; diábí kon dodai in onda in akuoi in sinumabat nongkon daḷan inta sinantú-Nea.

¹² Parenta mita i Allah umuran dinuduianku, ibog-Nea dinuduianku, bo deemanbí ibogku tontaní.

¹³ Ki Allah tua in diábí mobaḷu-baḷui; diábí in mokoḷawang kon i-Nia. Sia in mopobayábí onu inta kinoibog-Nea.

¹⁴ Sia in mogaidbí kon onu in tomayá-Nea kon inakó, bo koḻikud intua nobayongpabí in tomayá-Nea.

¹⁵ Popisí in moondok kon i-Nia, nourot in akuoi; aka totok in raionku intua komintan, dá modugangdon in ondokku.

^16-17 Inta Totok in mokawasa nonginggamá kon bayongan in baraniku. Akuoi in moondok sin ki Allah, deemanbí popisí in sindip, umpaka sindip tua in moḻipung kon inakó, bo mogoḻingoi kon pogotku.