AYUB 20 - Alkitab Singog In Mongondow Masa In Tanaa

Ki Zopar

^1-2 Bo ki Zopar in notubag, “Uḻe Ayub, nokuyang in ginaku kon inimu, tanaa in moibogdon in akuoi ḷagi motubag.

³ Tosingogonmu mita tatua in totuudon kon moningkuḻe, táe kinotaauanku naonda in pototubag.

⁴ Táe kinotaauanmu degá kon nongkon dungkuḷpabímai totok, pinangkoipa kon intau muna pinoḻitú kon dunia,

⁵ ḷunganga in intau moraat tongábí motoyong, bo kasanangan in intau moraat tongá tokokiap?

⁶ Umpaka kawasanea nodapot in toḷungayá, modapot in uḷunea moitunduḷ kon goḷom,

⁷ táe moinggamábí in sia dapot in mononoi, mayá nongkon dunia pinongin daḷan inta mokooyá. Intau mita inta nokoimontandon nonotaau kon inia, in moḻibóbí “Uḻe, kon onda in binayáannea?”

⁸ Sia in mobuḻi naonda bo oḻinow in togoindop, moinggamá naonda bo oontongon kon dodai in doḷom.

⁹ Sia in diádon ontongon in mata; sia in diá bidon kon pogogutunannea.

¹⁰ Inta koḻipod sinakownea nongkon intau inta diá koonu bo onu musti toḻiuan i adínea mita.

¹¹ Umpaka sia in nobagupa bo motorindog, táe topípa bo mobaḻídon in sia ḷobud inta diá baraguna.

^12-13 Totuu moromimit in kororaat kon bonu in bibignea! Motabi in ḷagi moḻiom kon tua; tuamai in sinagúnea kon siup in dilánea sinbá moonggot in konanamannea.

¹⁴ Táe kaanon tatua in mobaḷui kon bonu in bobuḷadían, mobaḻí rasum mopait mododia kon popatoi.

¹⁵ Kapunyaan sinakow inta iḻiomnea, pakisadon pinototukanea; pinoḷuai i Allah intua nongkon bonu in siannea.

¹⁶ Intau moraat in monginumbí kon rasum inta mododia kon bodito, sia in matoibí intua naonda bo sinobak in uḷag mobisa.

¹⁷ Diábí konanamannea in ḷana in zaitun inta mobayong totok, andeka susu bo biluk inta moiḻimpo-ḻimpó.

¹⁸ Bayongan in kauntungannea musti pobuionnea; onu inta siniḷopíannea diábí konanamannea.

¹⁹ Sin sia in mondorot bo mopomayá mako kon intau inta diá koonu bo onu; sia in mogagow kon baḷoi mita inta deeman sia in noposindog.

²⁰ Sin turánea in moiḻiudon totok, dá diábí in sia mooro-orop.

²¹ Aka mongaan in sia dá kodaitonneabí komintan, tuamai in kobiagannea motompia diá mononoi.

²² Kon tungkuḷ in mooyúondon totok in sia, roriga bo robonoḷ in ginanea mamangoi moiantug kon inia.

²³ Kon tungkuḷ in sia diá mogoga-gogai in momonu kon siannea, ki Allah in sinumorúdon totok bo nohukum kon inia.

²⁴ Aka ḷumuat in sia kon pitow uwaja, yo sia in paḻíanbí in piot bitú.

²⁵ Sia in kinotugatan piot, dá sinompaḻían; ruit in piot inta mopouḻi-uḻinag noiḷambai kon awaknea, dá ginanea inagíandon in ondok.

²⁶ Norimumudon in bayongan kapunyaan inta sinagúnea; sia takin bayongan in motoḷuadínea kinaan in tuḷú inta deeman pinoyongkit in intau.

²⁷ Ḷangit nopoontong in koraatnea; butá in simindog monggitum kon inia.

²⁸ Bayongan in kaoyúonannea in moinggamábí popisí in torú i Allah.

²⁹ Natuata in ukur in intau moraat, ukur inta sinantú i Allah kon inia.”