AYUB 2 - Alkitab Singog In Mongondow Masa In Tanaa

Ibilis nonungkuḷ bui kon i Ayub

¹ Mahaḷuk mita in soroga bui namangoi kon i Tuhan, bo Ibilis in kon tua doman.

² Dá ki Tuhan in noḻibó kon inia, “Nongkon onda in iko?” Ibilis in notubag, “Nongkon binayáan namagi-namako nodondaḷoi kon dunia.”

³ Ki Tuhan in noḻibó bui, “Degá sinaridimudon in mogogundoi-Ku ki Ayub? Kon sinangkub in dunia naa diábí in intau in ná kotoindudui bo kopopianea tua. Sia in nosumba kon i-Nakó bo diábí kon dodai in onda in nogaid kon inta moraat. Sia in umuranpabí mosatia kon i-Nakó, umpakabí iko ain nodondouḷug kon i-Nakó kon mopobodito kon inia umpaka diá in kinodoyonannea.”

⁴ Táe Ibilis in notubag,, “Dimukud bo awak mosehat in moḷobe-ḷoben in mangaḻenea nongkon kapunyaan. Intau in mokobaḻíbí in mobogoi kon bayongan kapunyaannea asaḷ bo umuran mobiag in sia.

⁵ Akakuma bo awaknea potakiton-Mu, yo notantú bidon kon bayá-bayábí in sia mongutuk kon ini-Mu!”

⁶ Dá ki Tuhan in noguman kon Ibilis, “Mopia, aidaidon kon inia onu in koibogmu, asaḷ dika ḻimodonmu in sia.”

⁷ Dá Ibilis in minayádon nongkon tayowon i Tuhan, bo nopomuká in bituḷ mita kon bayongan in awak i Ayub pinangkoi kon paḷad in sioḷ noidapot kon tudu in uḷu.

⁸ Bo ki Ayub iḻimitú kon diug in yoyatan, bo nogamá kon bonsig in posilag sin pongukud kon awaknea.

⁹ Ki buḷoinea in noguman kon inia, “Umpaka yo umuranpa doman in iko motoindudui kon i Allah? Kutukdon mako in Sia, bo kopatoidon!”

¹⁰ Tubag i Ayub, “Iko nion in mosingogbí naonda bo intau dondunguḷ! Umpaka yo tongábí in kita moibog motarima kon onu inta mopia nongkon i Allah, bo inta diá mopia in diábí tarimaan naton?” Dá, umpakabí in ki Ayub kinoantugandon in bayongan bodito tatua, diábí in sia nopoyaput in tosingogon moḷawang kon i Allah.

Yobayat mita i Ayub namangoi

¹¹ Bodito inta noiantug kon i Ayub in kinodongogandon in yobayatnea taya toḷu, ki Elipas, nongkon kotá in Téman, ki Bildad intau in Suah bo ki Zopar intau in Naama. Mosia in noyopakat kon mayá moindoi bo moḻipoi kon inia.

¹² Táe naonda in inontong monia nongkon noyayú, gogió bo diádon kinotaauan monia. Mosia in nongombaḷ noropot bo nomerak kon ḷambung monia poḷat noponabud in ḷobud kon toḷungayá bo kon uḷu.

¹³ Pitu nosinggai bo pitu nogobii in mosia iḻimitú mako kon butá, kon diugmai i Ayub, takin diá noposingo-singog, sin inontong monia kon totuu mobogat in roriganea.