AYUB 19 - Alkitab Singog In Mongondow Masa In Tanaa

Ki Ayub

^1-2 Táe ki Ayub in notubag, “Nongonu sin umuranbí monimu potaḷáan in akuoi, bo rorigaan monimu in tosingogon?

³ Mopobui-buimaidon in moiko moningkuḻe kon inakó, bo pogutúon monimu in akuoi takin diá in oyá.

⁴ Aka kuma bo noitaḷá in aidku, yo diábí intua mokoporugimai kon i monimu.

⁵ Kai monimukamai dá moikobí in mopia-pia in akuoi; rorigaku in inanggap monimu poponiataan in taḷáku.

⁶ Pokotaaudon kon akuoi naa in koyogot iroriga i Allah, bo dinomok kon bonu in poyogaḷap-Nea.

⁷ Akuoi in nomanseḷ sin iroriga-Nea totok tua, táe diá tobatúmai in intau in nopandungmai kon inakó. “Kon onda in koadilan,” baḷúku, táe diá in nokidongog kon inakó.

⁸ Iḷamboian i Allah in daḷanku, diá motaau tumaḻib in akuoi, lorongku mita binaḻí-Nea nosindip totok.

⁹ Inagow-Nea komintan in bayongan kapunyaanku, bo tangoiku mopia in pinoguyaat-Nea.

¹⁰ Sia in nondangat kon inakó nongkon bayongan tampat, naonda bo intau norabut kon uakat in pinomuḷa, bo pinomayánea mako natua bo noḷaḷow, natuata in pinogogamá-Nea kon bayongan in kamangku.

¹¹ Torú i Allah kon inakó dumoko-dokot; akuoi in inanggap-Nea nobaḻí musung-Nea.

¹² Tontara-Nea in nonubu diá koḷamboian; daḷanku iḷamboian, bo ḷoḷaiganku kinopung.

¹³ Ginaḷum bo utatku pinoyayú-Nea kon inakó; akuoi in naonda bo intau ango-angoi kon bayongan in intau inta nogogintaauanku.

¹⁴ Inanakanku komintan yumayú; yobayatku mita diádon mokotorop kon inakó bui.

¹⁵ Bobantungku bobay kinoḻionganneadon in akuoi, ki tuang monia; inanggapnea in akuoi intau inta diá nogogintaauannea.

¹⁶ Inoiníku in bobantungku, táe doí in sia sinumubag, umpaka dinondouḷuganku kinopia in sia.

¹⁷ Ki buḷoiku doídon mokobó kon poginaanku, kiutatku nogaḷum kon iná bo amá morongó in dimiug kon inakó.

¹⁸ Akuoi in siningkuḻe in mongoadí mita kon daḷan; aka akuoi simindog, akuoi kosingan.

¹⁹ Mokoontong kon inakó yobayatku modagin morongó; akuoi sinaḷáan monia inta kinotabiku.

²⁰ Awakku dongkadon kuḻit nobakut kon tuḷan. Gogiódon akuoi matoi bo dimukudku in mayá.

²¹ Uḻe yobayatku mita, kotabipa in akuoi, sin ḻima i Allah nosambok kon inakó.

²² Ki Allah tantú mondorot kon inakó; nongonu sin dayananbí monimu in Sia? Diápa degá moguḻí in ibog monimu in moposikisa?

²³ Ah, igumon mako singogku mita in paison, dá umuran toropon;

²⁴ igumon mako pakangon in uatoi kon batu, sinbá monahang kino ouput in wakutu.

²⁵ Kinotaauanku kon soroga oyúon in mototuḷungku; kon imbuitnea mamangoi in Sia motuḷung kon inakó.

²⁶ Umpaka kuḻitku pinaḻi-paḻían bo nobotak, táe kon dodai in akuoi oyúonpa in awakku, indoiankubí in ki Allah.

²⁷ Matakubí tontaní in poindoiku kon i-Nia, bo kon inakó Sia in mobaḻí yobayat. Nonakit totok in ginaku sin moiko in moguman,

²⁸ ‘Naonda in pononuntut kon inia?’ Moiko in notayak kon dodoyonan sin momia kon pelekara.

²⁹ Táe, tanaa in koondokdon kon pitow! Sin ki Allah in tumorú bo mohukum kon intau binaradosa; dá kotaauandon monimu, kon oyúonbí in ki Allah inta monisig kon intau.”