AYUB 18 - Alkitab Singog In Mongondow Masa In Tanaa

Ki Bildad

^1-2 Dá tubag i Bildad, “Uḻe Ayub, toonu iko in mogogai mosingog? Kibio-biómaidon, bo indongogaipa in tanaa mosingog in kami.

³ Nongonu sin kainimu in kami naa in dondunguḷ, bo potongkaionmu in sapi in kami?

⁴ Torúmu in tongábí mokotakit kon awakmu. Musti degá tongá popisí in iko dunia naa kobuḻian in intaunea, bo buḷud mita in pampingon nongkon kinoukatannea?

⁵ Togá in intau moraat in notantú bidon kon piongon; tuḷúnea in diá bidon poyongki-yongkiton bui.

⁶ Bayag kon bonu in ḷoḷaigannea in mokudowdon; togá ponimbayagnea in diá bidon monindar.

⁷ Ḷampangnea inta mopia mobaḻídon moipape magí-mako; tomayánea tontaní in mokopopisí kon inia moipintud.

⁸ Sia in mopobayá ná pukot dá noitokigdon in sioḷnea.

⁹ Singkodnea in noibaaḷ kon ḻikot, dá kinodomokandon in sia.

¹⁰ Kon butá, noiadop in potait; kon daḷan, oyúon in bubú bo puḷut.

¹¹ Intau moraat sinaḻikokogan in inta mokokoningkim nongkon bayongan tampat; Ondok dinumudui kon inia kon pomuḷoi in ḷampang.

¹² Koḻipod moropot in sia, tanaa in mororigadon in sia; bodito umuran moitakin kon i nia kon ondakabí

¹³ Kuḻitnea kinarat in takit inta mororiga; kokaḷ bo sioḷnea in moburuk notombobog.

¹⁴ Sia in inagow nongkon ḷoḷaigannea tampatnea inta moaman, bo pinogambat sin mayá tumayow kon popatoi.

¹⁵ Tanaa in ki inekabí motaaubí in mogutun kon bonu in ḷoḷaigannea, bo kon tua sinabudan in balerang, ponabang kon takitnea.

¹⁶ Uakatnea mita in noingkag bo noḷaot; tanganea mita noingkag bo noḷaḷow.

¹⁷ Sia in diá bidon kinotaauan kon bonunea andeka kon ḷuai in kotá; diá bidon in tobatúmai in intau in nokotoropa kon tangoinea.

¹⁸ Nongkon nobayag in sia pinoguntun minayá in sindip; nongkon dunia in intau nobiag inuntun in sia.

¹⁹ Adí bo buí diá bidon kon inia; kon ḻipúnea diá bidon tobatúmai in kiagatnea.

²⁰ Nokodongogmai kon kobobiagnea intau mita kon toyopan noitaḻikokog, bo intau mita inta nogutun kon pomukaan nourot mako sin moondok.

²¹ Natuata in kobiagan in intau moraat, mosia inta diá mopandungmai kon i Allah.”