AYUB 16 - Alkitab Singog In Mongondow Masa In Tanaa

Ki Ayub

^1-2 Táe ki Ayub in notubag, “Mokakit in dongogonku in singog natua; ḻipoimu tongábí mokororiga.

³ Toonu in moiko mogogai mosingog kon ambungangaḷ? Onu in nokopopisí kon i monimu motubag?

⁴ Aka kuma bo moiko nion in akuoi, bo akuoi in moiko, dá motaaubí doman in akuoi mosingog ná tatua. Yagi-yagidon in singogonku; totokbí in momombiḻing akuoi.

⁵ Ginamu in irotonankubí in noyagi-yagimai in tongganut; tosingogonku mita in mokoḻipoibí.

⁶ Aka akuoi mosingog, rorigaku in diábí mooyong; aka akuoi kibio-biómai, onu in mangaḻenea?

⁷ Ki Allah, nopobaḻí kon inakó moyoyiga; bayongan in motoḷuadíku iyopú.

⁸ Sia in noḷawang bo nodomok kon inakó. Tanaa in morutukdon totok in awakku, bo kain intau moantó tua in pinoniataan kon akuoi ain binaradosa.

⁹ Pinongin torú ki Allah in nomera-merak kon awakku; takin noyaat totok in gina inimindoi in Sia kon inakó.

¹⁰ Bukáan in intau mita koḷobenon in bibig monia sin moningkuḻe kon inakó; akuoi iḻibutan bo putongiku in sinokap.

¹¹ Ki Allah in nobogoi kon inakó kon intau moraat; akuoi pinogonagnea kon kawasa in intau mokotor.

¹² Koḻipod kobiaganku in noaman bo notompia, táe ki Allah in nodaḻí nonubu kon inakó. Sindunku in dinomok-Nea bo pinogambat in akuoi; binaḻínea in akuoi pobobalajaran ponanaan.

¹³ Takin diá in tabi umurannea pioton in akuoi, dá noibuntaradon in bonu in sianku.

¹⁴ Sia in nonubu naonda bo intau mopoparang, bo nopobui buimai nonompaḻí kon inakó.

¹⁵ Akuoi in nogiḷambung in kinopatoian nobaḻí tomponuot kon morobonoḷ in dodob, bo iḻimitú kon tudu in ḷobud sin sinaḷow.

¹⁶ Pogotku inumura sin nongombaḷ, kokiap in mataku nobobagá bo inumuḷow.

¹⁷ Táe diábí in akuoi nogaid kon inta moraat; noniata kon motuḻidbí in sambayangku kon i Tuhan.

¹⁸ Ei dunia, raat kon inakó dikabí bunion; dika pomayá mako in kuaniku mopoigum in koadilan.

¹⁹ Kinotaauanku kon mododuḷuku oyúon kon soroga; Sia in nobaḻí sakusi kon diábí in akuoi binaradosa.

²⁰ Akuoi siningkuḻe in yobayatku mita bo kinosingan; koomba-ombaḷ in akuoi bo namangoi kon tayowon i Allah mopoigum in totuḷung.

²¹ Ah, igumon mako ki Allah tontaní in moduḷu kon inakó kon tayowon-Nea, naonda bo intau inta totu-totuu motuḷung kon yobayatnea.

²² Taongku mita inta kiagatnea in noyakagdon; topiḻikpa bo mayá in akuoi bo diá bidon mobui mangoi.